އިރާނުގެ ދައުލަތުގެ ޓީވީއިން ވަގުތުން ހަބަރު ދައްކަމުން ދަނިކޮށް، މުޒާހަރާއަށް ތާއީދު ކުރާ ގްރޫޕަކުން ހެކްކުރުމުގެ ހަމަލާއެއް ދީފި އެވެ.
ހެކްކުރުމުން ހަބަރު މެދުކެނޑި ޓީވީއިން ފެނުނީ މާސްކެއްގެ މަންޒަރެވެ. އޭގެ ފަހުން ފެނުނީ އިސް ލީޑަރު އާޔަތުﷲ އަލީ ހާމަނާއީގެ ފޮޓޯއެއް ވަށައި އަލިފާން ހުރި މަންޒަރެކެވެ.
އެ ހަމަލާ ދިނީ "އަދާލަތު އަލީ" ނުވަތަ އަލީގެ އިންސާފު ނަމަކަށް ކިޔާ ގްރޫޕެކެވެ.
މީގެ ހަތަރު ހަފުތާ ކުރިން އިރާނުގައި މުޒާހަރާ ފެށީ ބުރުގާ ނާޅައި ހުރުމުން ހައްޔަރު ކުރި އުމުރުން 22 އަހަރުގެ އަންހެނަކު މަރުވި މައްސަލައިގަ އެވެ.
މަހްސާ އާމިނީ މަރުވީ ފުލުހުންގެ އަނިޔާތަކުގެ ސަބަބުން ކަމަށް އާއިލާއިން ތުހުމަތު ކުރެ އެވެ. އެކަމަކު ފުލުހުން އެކަން ދޮގުކުރެ އެވެ.
މުޒާހަރާތައް ހަމަނުޖެހުމަށް ބަދަލުވެ، ހޮނިހިރު ދުވަހު އެކަނިވެސް ތިން މީހުން މަރުވި އެވެ. އަމިއްލަ ޖަމިއްޔާތަކުން ބުނީ މަރުވި މީހުންގެ ޖުމްލަ އަދަދު 150 އަށް ވުރެ މަތިވާނެ ކަމަށޭވެ.
