"ދުޝްމަނުންގެ ހުވަފެން ސީދާކުރުމުގެ ފުރުސަތު ދަރިވަރުން ނުދޭނެ" ކަމަށް އިރާނުގެ ރައީސް އިބްރާހިމް ރައިސީ ވިދާޅުވެއްޖެ އެވެ.
އިރާނުގައި ބުރުގާ ނާޅައި ހުރުމުން ހައްޔަރު ކުރި 22 އަހަރުގެ މަހްސާ އާމިނީ މަރުވި މައްސަލައިގައި ފެށި މުޒާހަރާތައް ވަނީ ހަތަރު ވަނަ ހަފުތާއަކަށް ދިގުދެމިގެން ގޮސްފަ އެވެ.
މުޒާހަރާތަކުގެ ތެރެއިން ހަމަނުޖެހުން ބޮޑުވެ، ގިނަ ބަޔަކު ވަނީ މަރުވެފަ އެވެ. ޔުނިވާސިޓީތަކާއި ސްކޫލްތަކުގައި ވެސް މުޒާހަރާ ކުރާ ކަމަށް ރިޕޯޓުތައް ބުނެ އެވެ.
"ދުޝްމަނުން ހީކުރީ އެ މީހުންގެ ނުބައި އެދުންތައް ހާސިލްކުރެވޭނީ ޔުނިވާސިޓީ ތެރެއިން ކަމަށް. އަޅުގަނޑުމެންގެ ދަރިވަރުންނާއި ޕްރޮފެސަރުން ތިބީ ހޭލާ ކަމެއް އެ މީހުން ނުދަނޭ،" ރައިސީ ވިދާޅުވި އެވެ.
ރައިސީ އެގޮތަށް ވިދާޅުވީ ވެރިރަށް ތެހްރާންގެ އަލް ޒަހްރާ ޔުނިވާސިޓީގެ އާ ދިރާސީ އަހަރު ފެށުމަށް ބޭޢްވި ރަސްމިއްޔާތުގެ ތެރެއިންނެވެ. އެއީ އަންހެން ދަރިވަރުންނަށް ހާއްސަކޮށް 1964 ގައި ހުޅުވި ޔުނިވާސިޓީއެކެވެ.
"ސައިންސާއި އިލްމުގެ ރޮނގުން ދުޝްމަނުން ބަލިކުރާނެކަން ޔަަގީން،" ރައިސީ ވިދާޅުވި އެވެ. ފާރްސް ނިއުސް އެޖެންސީން ބުނީ އެ ޔުނިވާސިޓީގެ ދަރިވަރުން ވެސް މުޒާހަރާ ކުރި ކަމަށެވެ.
އިރާނުގައި ސަައިންސްގެ ދާއިރާއަށް ހާއްސަ އެންމެ ބޮޑު ޝަރީފް ޔުނިވާސިޓީގެ ކްލާސްތައް މިދިޔަ ހޯމަ ދުވަހުން ފެށިގެން ގެންދަނީ އޮންލައިންކޮށެވެ.
