އިރާނުގައި ފުލުހުންގެ ބަންދުގައި ހުއްޓައި އުމުރުން 22 އަހަރުގެ މަހްސާ އާމިނީ މަރުވީ ބަލިވެގެން ކަމަށް ތަހުގީގުން ނިންމައިފި އެވެ.
ބުރުގާ ނާޅައި ހުރުމުން މަހްސާ އާމިނީ ހައްޔަރު ކުރިތާ ތިން ދުވަސް ފަހުން މަރުވީ ކޯމާއެއްގައި އޮވެފަ އެވެ. އާއިލާއިން ތުހުމަތު ކުރަނީ ފުލުހުން އަނިޔާކުރި ކަމަށެވެ.
އޭނާގެ މަރާ ގުޅިގެން ފެށި މުޒާހަރާތައް ތިން ހަފުތާއަށް ދެމިގެން ގޮސްފައިވާ އިރު، ބޮޑެތި ހަމަނުޖެހުންތައް ހިނގައި ގިނަ އަދަދެއްގެ ބަޔަކު މަރުވެފައިވެ އެވެ.
އިރާނުގެ ފޮރެންސިކް އޯގަނައިޒޭޝަނުން ހުކުރު ދުވަހު ބުނީ "މަހްސާ އާމިނީ މަރުވީ ބޮލާއި، މުހިއްމު ގުނަވަންތަކާއި، އަތާއި ފަޔަަށް ލިބުނު ޒަހަމްތަކެއްގެ ސަބަބުން ނޫން" ކަމަށެވެ.
އެ އިދާރާއިން ނެރުނު ބަޔާނުގައި ބުނީ އޭނާ މަރު ގުޅިފައި ވަނީ "އުމުރުން އަށް އަހަރުގައި ސިކުނޑީގެ ޓިއުމަރަކާ ގުޅިގެން ހެދި ސާޖަރީއަކާ" ކަމަށެވެ.
މަހްސާ އާމިނީގެ އާއިލާއިން ފުލުހުންނާ ދެކޮޅަށް ޝަކުވާ ހުށަހަޅާފައިވާ އިރު، އާއިލާއިން ގަބޫލުކުރަނީ އޭނާ މަރުވީ ބޮލަށް އަނިޔާ ކުރުމުން ކަމަށެވެ.
އިރާނުގައި އަންހެނުން ބުރުގާ އެޅުމަކީ މަޖުބޫރު ކަމެކެވެ. ބުރުގާ ނާޅާ ހުރުމުން ހައްޔަރު ކުރި މަހްސާ އާމިނީގެ މަރަށް ފަހު ކުރަމުންދާ މުޒާހަރާތަކުގައި ބުރުގާ އަޅަން މަޖުބޫރު ކުރުމާ ދެކޮޅަށް އަޑުއުފުލަ އެވެ.
