ފައިސާގެ ބަދަލުގައި ރިސޯޓް ހަދާނެ ރަށެއް ލިބޭ އުސޫލުން، ހަ ރަށެއްގެ އެއާޕޯޓު އަޅަން ބޭނުންވާ ފައިސާގެ ތެރެއިން ބައެއް ހޯދަން ދިވެހި ކުންފުންޏަކާ އިއްޔެ ހަވާލުކޮށްފި އެވެ.
ދެކުނުދުނި އިންވެސްޓްމެންޓް ނަމަކަށް ކިޔާ ކުންފުންޏަކާ އެކު ސަރުކާރުން އިއްޔެ ސޮއިކުރި ފައިނޭންސިން އެއްބަސްވުމުގެ ދަށުން އެ ކުންފުނިން ހަރަދުކުރާނީ ބ. ތުޅާދޫ، ށ. ބިލެތްފަހި، ތ. ވިލުފުށި، ހދ. މަކުނުދޫ، ފ. މަގޫދޫ އަދި ރ.އަތޮޅުގެ ދެކުނު ބިތުގެ ރަށެއްގައި ރީޖަނަލް އެއާޕޯޓް އެޅުމަށެވެ.
އެ މަޝްރޫއު އަށް ފައިނޭންސް ކުރާނެ ބަޔަކު ހޯދަން އެންމެ ފަހުން އިއުލާނުކޮށްފައިވަނީ މި އަހަރުގެ އޯގަސްޓް މަހު އެވެ. އެ އިއުލާނާ ގުޅިގެން ދެކުނު ދުނި އިންވެސްޓްމެންޓް ފިޔަވައި އިތުރު ބަޔަކު ޝައުގުވެރިކަން ފާޅުކޮށްފައިވާ ކަމަކަށް ޕްލޭނިން މިނިސްޓްރީން ނުބުނެ އެވެ.
ދެކުނު ދުނި އިންވެސްޓްމެންޓް އެންމެ ފުރަތަމަ އިކޮނޮމިކް މިނިސްޓްރީގައި ރަޖިސްޓްރީކޮށްފައި ވަނީ މުހައްމަދު ނަޒީރުގެ ނަމުގައި 2004 ގަ އެވެ. އެއަށް ފަހު ކުންފުނީގެ ހިއްސާދާރުން އިތުރުކޮށްފައި ވަނީ މި އަހަރުގެ ޖެނުއަރީ މަހު އެވެ.
އިކޮނޮމިކް މިނިސްޓްރީގެ ބިޒްނަސް ޕޯޓަލްގައިވާ ގޮތުން އެކުންފުނީގެ ހިއްސާދާރުންނަކީ މުހައްމަދު ނަޒީރު، ސަބީރު އަހުމަދު، ހުސައިން ހިލްމީ، ހަސަން ޒަރީރު، ނުޒުހާ އަބްދުލް ބާރީ އަދި ގިޔާސް އަބްދުލް ބާރީ އެވެ.
ނަޒީރު ފިޔަވައި އެހެން މީހުން ހިއްސާދާރުންގެ ގޮތުގައި ކުންފުންޏާ ގުޅިފައި ވަނީ ޖެނުއަރީ 6، 2022 ގަ އެވެ.
ބިޒްނަސްޕޯޓަލްގައިވާ މައުލޫމާތުން އެނގޭ ގޮތުގައި ވިޔަފާރިއެއް ކުރުމުގެ އެއްވެސް ހުއްދައެއް އެކުންފުނިން އަދި ހޯދައިފައެއް ނެތެވެ. އަދި އެއީ ކޮން ވިޔަފާރިއެއް ކުރާ ކުންފުންޏެއް ކަމެއް ވެސް އެނގޭކަށް ނެތެވެ.
