މާލެ އަތޮޅުގެ ހަ ފަޅެއްގައި ފްލޯޓިން ސިޓީތަކެއް ހަދަން ޑަޗް ޑޮކްލޭންޑްސްއާ ހަވާލުކޮށްފައިވާ އިންޓަގްރޭޓަޑް ޓޫރިޒަމް ޕްރޮޖެކްޓުގެ ފުރަތަމަ ފިޔަވަހީގެ ދަށުން ހަދަމުންދާ ސިޓީގެ ފުރަތަމަ ބްލޮކް ނިންމައި ފޮޓޯ އާންމުކޮށްފި އެވެ.
ފްލޯޓިން ސިޓީއެއް އެޅުމަށް ނެދަލޭންޑްސްގެ ޑަޗް ޑޮކްލޭންޑް ކުންފުންޏަށް 200 ހެކްޓަރުގެ ފަޅެއް ވަނީ ދީފަ އެވެ. "ފްލޯޓިން ސިޓީ މޯލްޑިވްސް"ގެ ނަން ދެވިފައިވާ މި އެއް ބިލިއަން ޑޮލަރުގެ ޕްރޮޖެކްޓުގެ ފުރަތަމަ ފިޔަވަހީގެ ތެރޭގައި ރިސޯޓާއި ޑޮކްޔާޑާއި ލަގްޒަރީ ވިލާތަކުގެ އިތުރުން ދިވެހިންނަށް ވިއްކާލަން އަޅާ ގެތައް ހިމެނެ އެވެ.
ފުރަތަމަ ތަރައްގީކުރަނީ އާރަށާ އެންމެ ކައިރިން އޮންނަ 200 ހެކްޓަރުގެ ފަޅެވެ. އެ ފަޅުގައި ތަރައްގީކުރާ 5000 ހައުސިން ޔުނިޓުގެ މަސައްކަތް ނިމުނު ފެބްރުއަރީ މަހުގެ 10 ގައި ހަވާލުކުރީ ބައިސަން މޯލްޑިވްސްއާ އެވެ.
ބައިސަން އިން ތައްޔާރުކުރި ފުރަތަމަ ބްލޮކު ވަނީ އެކްސްޕީރިއެންސް ސެންޓަރެއްގެ ގޮތުގައި ހުޅުވާލުމަށް ނިންމާފަ އެވެ. އަދި، އަންނަ އަހަރުގެ ދެވަނަ ކުއާޓަރުގައި އަސްލު ޔުނިޓުތައް ނިމޭނެ ކަމަށް އެ މަސައްކަތްކުރަމުންދާ ކުންފުނިން މައުލޫމާތު ދެ އެވެ.
މޫސުން ތަންދިނުމާ އެކު އަންނަ ހަފްތާގައި އެ ބްލޮކް އާރަށާ ކައިރީގައި އޮންނަ ފަޅަށް ގެންދާނެ ކަމަށް ވެސް އެ ކުންފުނިން މައުލޫމާތު ދެ އެވެ.
ޑަޗް ޑޮކްލޭންޑްސްގެގެ ސީއީއޯ ޕައުލް ވަނީ މި މަޝްރޫއަކީ ކާމިޔާބު މަޝްރޫއަކަށް ވާނެ ކަމަށް މީގެކުރިން ވަނީ ވިދާޅުވެފަ އެވެ. އަދި، ދިވެހިން "މާޔޫސްކޮށް ނުލާނެ" ކަމަށް ވެސް ޕައުލް ވިދާޅުވި އެވެ.
އޭނާ ވިދާޅުވި ގޮތުގައި ހައުސިން މަޝްރޫއު ކުރިއަށް ގެންދަން ލިބުނު ހުއްދައާއެކު، ކުރިއަށް އޮތް ތިން އަހަރާއި ފަސް އަހަރާ ދެމެދުގެ މުއްދަތެއްގައި މި މަޝްރޫއު ނިމި، ފްލޯޓިން ސިޓީގައި އަމަލީ ކުލަތައް ޖެހިގެންދާނެ އެވެ.
ފްލޯޓިން ސިޓީގައި ގާއިމްކުރާ ގެތައް ވިއްކުމަށް އެ ކުންފުނިން ގަސްދު ކުރާ އަގަކީ 250،000 ޑޮލަރު ކަމަށް ޕައުލް ވިދާޅުވި އެވެ.
މި މަޝްރޫއު ކުރިއަށް ގެންދިއުމަށް ނިންމާފައިވަނީ ފަޅުގެ ވަށައިގެން ރަށްތަކެއް ހިއްކައިގެން އެތެރޭގައި ފްލޯޓިން ގެތައް އަޅައިގެންނެވެ. އެގޮތުން ހިއްކާ ރަށްތަކުގެ ތެރެއިން، ކަނުގައި އިންނަ ރަށުގައި ރިސޯޓެއް ތަރައްގީ ކުރާނެ ކަމަށް އެ ކުންފުނިން ބުނެ އެވެ. އަދި، ދެން ހިއްކާ ރަށްތަކަކީ ޔޮޓް މެރީނާ ސަރަހައްދަކާއި ޕިކްނިކް އައިލެންޑަކާއި ރެސްޓޯރެންޓުފަދަ ތަންތަން އަޅަން ހަމަޖެހިފައިވާ ތަނެކެވެ.
