މެޑްރިޑް (އޮކްޓޫބަރު 6) - ޔުއެފާ ޗެމްޕިއަންސް ލީގުގައި ރޭ ރެއާލް މެޑްރިޑާއި ޔުވެންޓަސް ކުޅުނު މެޗުތަކުން މޮޅުވިއިރު، ބެންފީކާ އިން ޕީއެސްޖީ ހުއްޓުވައިިފި އެވެ.
ރެއާލުން ވަނީ އަމިއްލަ ދަނޑުގައި ޔޫކްރެއިންގެ ޝަހުތަރު ޑޮނެސްކް 2-1 އިން ބަލިކޮށްފަ އެވެ. އިޒްރޭލްގެ މެކަބީ ހައިފާ އަތުން ޔުވެންޓަސް މޮޅުވީ 3-1 އިންނެވެ. ޕީއެސްޖީ އާއި ބެންފީކާ އެއްވަރުވީ 1-1 އިންނެވެ.
ރޭގެ މެޗުގައި ރެއާލުން ވަނީ ފުރަތަމަ 28 މިނިޓް ތެރޭ ދެ ގޯލު ޖަހައިފަ އެވެ. އެ ގޮތުން 13 ވަނަ މިނިޓްގައި ރޮޑްރީގޯ އެ ޓީމަށް ލީޑުނަގައިދިންއިރު، 28 ވަނަ މިނިޓްގައި ރޮޑްރީގޯ ތަނަވަސްކޮށްދިން ފުރުސަތެއްގައި ރެއާލްގެ ދެ ވަނަ ގޯލު ޖެހީ މި ވަގުތު ރަނގަޅު ފޯމެއް ދަމަހައްޓަމުން އަންނަ ވިންގް، ވިނީޝިއުސް ޖޫނިއާ އެވެ.
މެޗުގެ 39 ވަނަ މިނިޓްގައި ޝަހުތަރުން ވަނީ ގޯލެއް ޖަހައިފަ އެވެ. އެ ޓީމުގެ މި ލަނޑު ކާމިޔާބުކޮށްދިނީ އޮލެކްސަންޑާ ޒުބްކޯފް ބޮލުންނެވެ.
މިއީ 2014-2015 ވަނަ އަހަރުގެ ސީޒަނަށް ފަހު ރެއާލުން ޗެމްޕިއަންސް ލީގުގެ ފުރަތަމަ ތިން މެޗުން މޮޅުވި ފުރަތަމަ ފަހަރެވެ. ރެއާލް އެއް ވަނައިގައި އޮތީ ތިން މެޗުން ނުވަ ޕޮއިންޓާ އެކު އެވެ. ދެ ވަނައިގައި އޮތީ ތިން މެޗުން ހަތަރު ޕޮއިންޓް ހޯދި ޝަހުތަރު އެވެ. ރޭ ސެލްޓިކް އަތުން 3-1 އިން މޮޅުވި، އާރްބީ ލައިޕްޒިގު ތިން ވަނައިގައި އޮތީ ތިން މެޗުން ތިން ޕޮއިންޓް ހޯދައިގެންނެވެ. ފުލުގައި އޮތް ސެލްޓިކް އަށް ތިން މެޗުން ލިބުނީ އެއް ޕޮއިންޓް އެވެ.
ޔުވެންޓަސް މި ފަހަރުގެ ޗެމްޕިއަންސް ލީގު ފެށީ ފުރަތަމަ ދެ މެޗުން ޕޮއިންޓެއް ވެސް ނުލިބި އެވެ. ރަށުންބޭރުގައި ޕީއެސްޖީ އަތުން ފުރަތަމަ މެޗުގައި ބަލިވިއިރު، ދެ ވަނަ މެޗުގައި އަމިއްލަ ދަނޑުގައި ބެންފީކާ އަތްދަށުވި އެވެ.
އެކަމަކު، ރޭ އަމިއްލަ ދަނޑުގައި މެކަބީ ހައިފާ އަތުން މޮޅުވެ، މި ފަހަރުގެ ޗެމްޕިއަންސް ލީގުގައި ފުރަތަމަ ޕޮއިންޓްތައް ހޯދި އެވެ.
ރޭގެ މެޗުގައި ޔުވެންޓަސްގެ ތިން ގޯލުގެ ތެެރެއިން ދެ ލަނޑު ޖެހީ މި ފަހަރުގެ ޓްރާންސްފާގައި އެ ޓީމު ދޫކޮށްލާނެ ކަމަށް ބެލެވުނު ފްރާންސްގެ މިޑްފީލްޑަރު، އޭޑްރިއަން ރަބިއޯ އެވެ. އަނެއް ގޯލު ޖެހީ ޑޫސާން ވްލަހޯވިޗް އެވެ. މި ތިން ގޯލު ޖަހަން ވެސް ފުރުސަތު ތަނަވަސްކޮށްދިނީ އެންހެލް ޑި މާރިއާ އެވެ.
މެކަބީ ހައިފާގެ ހަމައެކަނި ގޯލު ޖެހީ ދެ ވަނަ ހާފުގައި ޑިން ޑޭވިޑް އެވެ. މި މެޗުގައި މެކަބީ ހައިފާ އިން ވެސް ގިނަ އެޓޭކްތަކެއް ކުރިއިރު، ދެ ހަމަލާއެއް ގޯލުގެ ދަނޑިއަށް ވެސް އަމާޒުވި އެވެ.
ބެންފީކާ ދަނޑުގައި ރޭ ޕީއެސްޖީން ލީޑުނެގީ 22 ވަނަ މިނިޓްގައި ލިއޮނަލް މެސީ ޖެހި ގޯލުންނެވެ. މިއީ ކީިލިއަން އެމްބާޕޭ އާއި ނޭމާ ގުޅިގެން އުފެއްދި އެޓޭކެއްގައި މެސީ އަށް ލިބުނު ފުރުސަތުގެ ބޭނުންހިފައިގެން ޖެހި ގޯލެކެވެ.
ޕީއެސްޖީ އަށް ލީޑުގައި އޮވެ، ފުރަތަމަ ހާފު ވެސް ނިންމައިނުލެވުނެވެ. މެޗުގެ 41 ވަނަ މިނިޓްގައި ބެންފީކާގެ އެންޒޯ ފެނާންޑޭޒްގެ ހުރަހެއް ދިފާއުކުރަން އުޅުމުގެ ތެރޭގައި ޕީއެސްޖީގެ ޑަނީލޯ ޕެރޭރާ އަތުން ބޯޅަ ވަނީ ބައިކޮޅަށެވެ.
މެޗުގެ ދެ ވަނަ ހާފުގައި ޕީއެސްޖީ އަށް އަލުން ލީޑުނަގައިދޭން ނޭމާ އާއި އަޝްރަފް ހަކީމީ ވަނީ ރަނގަޅު ހަމަލާތަކެއް ފޮނުވާލައިފަ އެވެ. އެކަމަކު، ބެންފީކާ އިން ވަނީ ރަނގަޅަށް ޑިފެންސްކޮށް، ޕީއެސްޖީ އަތުން ޕޮއިންޓެއް ހޯދައިފަ އެވެ.
ގްރޫޕް އެޗްގެ އެއް ވަނައިގައި އޮތް ޕީއެސްޖީ އާއި ދެ ވަނައިގައި އޮތް ބެންފީކާ އަށް ތިން މެޗުން ހަތް ޕޮއިންޓް ލިބިފައިވާއިރު، ތިން ވަނައިގައި ޔުވެންޓަސް އޮތީ ތިން މެޗުން ތިން ޕޮއިންޓް ހޯދައިގެންނެވެ. އެންމެ ފުލުގައި އޮތް މެކަބީ ހައިފާ އަށް އަދި ޕޮއިންޓެއް ނުލިބެ އެވެ.
