އިރާނުގެ މުޒާހަރާތަކުގެ ތެރެއިން މަރުވި 16 އަހަރުގެ އަންހެން ކުއްޖެއްގެ ގަބުރު ގެއްލިފައިވާ ކަމަށް އާއިލާއާ ގާތް ފަރާތްތަކާ ހަވާލަދީ ބީބީސީއިން ރިޕޯޓުކޮށްފި އެވެ.
އާއިލާއިން ބުނީ ކުއްޖާގެ ހަށިގަނޑު ވަގަށް ގެންދިޔައީ ސަލާމަތީ ފައުޖުން ކަމަށާއި ސިއްރުން އަވަށެއްގައި ވަޅުލާފައިވާ ކަމަށެވެ. އާއިލާއިން ކުރިން ނިންމީ ހޯމަ ދުވަހު ވަޅުލުމަަށެވެ.
ވެރިރަށް ތެހްރާންގައި ނިކާ މުޒާހަރާ ކުރީ ސެޕްޓެމްބަރު 20 ވަނަ ދުވަހު އެވެ. އޭގެ 10 ދުވަސް ފަަހުން އޭނާ ކުއްލިއަކަށް ގެއްލުނެވެ.
އެކުވެރިޔަކަށް ފޮނުވި އެންމެ ފަހު މެސެޖުގައި ނިކާ ބުނީ ސަލާމަތީ ފައުޖުތަކުން އޭނާގެ ފަހަތުން އެބަ އަންނަ ކަމަށެވެ.
އޭގެ ފަހުން އާއިލާއަށް ނިކާގެ ހަށިގަނޑު ފެނުނީ ތެހްރާންގައި މީހުން ބަންދު ކުރާ މަރުކަޒެއްގެ މޯޗަރީއިންނެވެ. އޭނާގެ ބޮޑު ދައިތަ ބުނީ ހަށިގަނޑު ބަލަން ވެސް ފުރުސަތު ނުދިން ކަމަށެވެ.
އާއިލާއިން އެ މީހުންގެ އަވަށް ހޮރާމްއާބާދަށް ހަށިގަނޑު ގެންދިޔައީ އާދީއްތަ ދުވަހު އެވެ. އެއީ ނިކާގެ 17 ވަނަ އުފަން ދުވަހެވެ.
ސަލާމަތީ ފައުޖުތަކުން ޕްރެޝަރު ކުރާތީ ޖަނާޒާއެއް ނުބާއްވަން އާއިލާއިން ނިންމި އެވެ. އެކަމަކު ކުއްލިއަކަށް ހަށިގަނޑު ގެއްލުމުން، އާއިލާއިން ބުނީ ސަލާމަތީ ފައުޖުން އައިސް ހަށިގަނޑު ވަގަށް ގެންގޮސް، ވެޔިސިޔަން އަވަށުގައި ވަޅުލާފައިވާ ކަމަށެވެ.
އެ މަައްސަލައިގަައި ހޮރަމްއާބާދުގައި ވަނީ މުޒާހަރާކޮށްފަ އެވެ. ނިކާއާ ގުޅޭ ގޮތުން ސޯޝަަލް މީޑިއާގައި ޕޯސްޓު ކުރި އޭނާ ބޮޑު ދައިތަ މިދިޔަ އާދީއްތަ ދުވަހު ވަނީ ހައްޔަރުކޮށްފަ އެވެ.
