އިރާނުގައި ބުރުގާ ނާޅާ ހުރުމުން ހައްޔަރު ކުރި އަންހެނަކު މަރުވި މައްސަލައިގައި ފެށި މުޒާހަރާތަކުގައި ސްކޫލް ދަރިވަރުން ވެސް ބައިވެރިވާން ފަށައިފި އެވެ.
ސްކޫލް ދަރިވަރުން ޔުނުފޯމުގައި ތިބެ، ބުރުގާ ނަގައި، އަޑު އުފުލާ މަންޒަރު ފެންނަ ވީޑިއޯތައް ވަނީ އާއްމުވެފަ އެވެ. އިރާނުގައި މީގެ ދެ ހަފްތާ ކުރިން ފެށި މުޒާހަރާ ވަނީ ހޫނުވެފަ އެވެ.
ހޯމަ ދުވަހު ކަރަޖްގައި ސްކޫލް ކުދިންތަކެއް ފިރިހެނަކު ސްކޫލުން ނެރި، އޭނާއާ ދިމާލަށް ހަޅޭއް ލަވައި، ފެންފުޅި އުކާ މަަންޒަރު ފެންނަ ވީޑިއޯއެއް ވެސް ދަނީ ދައުރުވަމުންނެވެ.
ކަރަޖްއިން ނެގި އިތުރު ވީޑިއޯއެއްގައި ވެސް ފެންނަނީ ޔުނިފޯމްގައި ތިބި ކުދިން ތަނަކަށް ޖަމާވެ، ހުރިހާ އެންމެން އެއްބައިވެ ނިކުތުމަށް ގޮވާ މަންޒަރެވެ.
ދެކުނު ޝިރާޒް ސިޓީގައި ސްކޫލް ކުދިން މަަގު ބަންދުކޮށް މުޒާހަރާ ކުރި އެވެ. އޭގެ އިތުރުން ވެރިރަށް ތެހްރާން އަދި ހުޅަނގު އުތުރުގެ ސަގޭޒް އާއި ސަނަންދަޖްގައި ވެސް ދަރިވަަރުން އެއްވި އެވެ.
މުޒާހަރާތައް ފެށީ ފުލުހުން ހައްޔަރު ކުރި އަންހެނަކު މަރުވި މައްސަލައިގަ އެވެ. މަހްސާ އާމިނީ ހައްޔަރު ކުރީ ބުރުގާ ނާޅާ ހުރުމުންނެވެ. ތުހުމަތު ކުރެވޭ ގޮތުގައި އޭނާ މަރުވީ ފުލުހުންގެ އަނިޔާތަކުގެ ސަބަބުންނެވެ.
އިރާނުގައި އަންހެނުން ބުރުގާ އެޅުން މަޖުބޫރެވެ. އާއިލާއިން ތުހުމަތު ކުރާ ގޮތުގައި ފުލުހުން ވަނީ މަހްސާ އާމިނީގެ ބޮލުގައި މުގުރުން ތަޅައި، ފުލުހުންގެ އުޅަނދުގެ ލުމަށް ފަހު، ބޯ ތަންތަނުގައި ޖައްސައި ޖައްސާފަ އެވެ.
ފުލުހުން ބުނީ އަނިޔާކުރި ކަމުގެ އެއްވެސް ހެއްކެއް ނެތް ކަމަށާއި އޭނާ މަރުވީ ހިތް ހުއްޓިގެން ކަމަށެވެ. އިރާން ހިޔުމަން ރައިޓްސް ޖަމިއްޔާއިން ބުނީ ހަމަނުޖެހުންތަކުގައި މިހާތަނަށް 133 މީހުން މަރުވެފައިވާ ކަމަށެވެ.
