ހަތް ވަނަ ގަރުނުގައި ފޮރުވާފައި ހުރި ރަން ފައުނުތަކެއް އުތުރު އިޒްރޭލުގެ ގުދުރަތީ ރިޒާވެއްގެ ފާރުތަކުގެ ތެރެއިން ފެނިފައިވާ ކަމަށް އާކިއޮލޮޖިސްޓުން ބުނެފި އެވެ.
ހާމަން ސްޓްރީމް ކައިރިން ފެނުނު އެ ތަކެތީގެ ބަރުދަނުގައި 170 ގްރާމް ހުއްޓެވެ. ބެލެވޭ ގޮތުގައި އެއީ މީލާދީ ގޮތުން 635 ވަނަ އަހަރު މުސްލިމުން އެ ހިސާބުގައި އުޅުނު އިރު ފޮރުވާފައިވާ ތަކެއްޗެވެ.
ތަޖުރިބާކާރުން ބުނާ ގޮތުގައި ބައިޒަންޓައިން އެމްޕަޔާ ނިމި، މުސްލިމުންގެ ބާރު ފެތުރުނު އިރާ ގުޅޭ ހޯދުންތައް އެ ރަން ފައުނުތަކުން ލިބެ އެވެ.
ބައިޒަންޓައިން އެމްޕަޔާއަކީ 1000 އަހަރަށް ވުރެ ދިގު މުއްދަތަކަށް ދެމި އޮތް ރޯމަން އެމްޕަޔާގެ އިރުމަތީ ފަޅިއަށް ކިޔާ ނަމެވެ.
"މި ތަކެތީގެ ވެރިމީހާ، ހަނގުރާމައިގެ ނުރައްކާ ބޮޑުވުމުން، ފަހުން މި ތަކެތި ނެގުމުގެ ބޭނުމުގައި ފޮރުވީ ކަމަށް ބެލެވޭ،" އާކިއޮލޮޖިސްޓުންގެ ޓީމުގެ ޑިރެކްޓަރު ޔޮއާވް ލެރޭ ބުންޏެވެ.
އޭގެ އިތުރުން ބައިޒަންޓައިން ވެރިކަމުގެ އެންމެ ފަހު 40 އަހަރުގައި ބަނިއަސް ސިޓީގެ އިގްތިސާދު އޮތް ގޮތާ ގުޅޭ މައުލޫމާތު ވެސް ރަން ފައުނުތަކުން ލިބޭ ކަމަށް އޭނާ ބުންޏެވެ.
ޑރ. ގެބްރިއެލާ ބިޖޮވްސްކީ ފައުނުތައް ހިފައިގެން.
ރަން ފައުނުތަކުގެ އިތުރުން، އާކިއޮލޮޖިސްޓުންގެ މަސައްކަތުން ވަނީ އިމާރާތްތަަކުގެ ބައިތަކާއި، ފެން ދައުރު ކުރާ ހޮޅި އާއި ބްރޮންޒް ފައުނާއި އެހެން ގިނަ ތަކެތި ފެނިފަ އެވެ.
ފަައިސާއާ ބެހޭ ތަޖުރިބާކާރު ޑރ. ގެބްރިއެލާ ބިޖޮވްސްކީ ބުނީ ބައެއް ފައުނުތައް ނިސްބަތް ވަނީ އެމްޕެރާ ފޯކަސްގެ ޒަމާނަށް ކަމަށާއި އެކަމަކު ގިނަ ފައުނުތައް ނިސްބަަތް ވަނީ އޭގެ ފަހުން އައި އެމްޕެރާ ހެރާކްލިއަސްގެ ޒަމާނަށް ކަމަށެވެ.
