އިރާނުގައި ފެށި މުޒާހަރާތައް ހޫނުވެ ހަމަނުޖެހުން އުފެދުނީ އެމެރިކާ އާއި އިޒްރޭލާ ހެދި ކަމަށް ރޫހާނީ ލީޑަރު އާޔަތުﷲ އަލީ ހާމަނާއީ ވިދާޅުވެއްޖެ އެވެ.
މުޒާހަރާތަކާ ގުޅިގެން ފުރަތަމަ ފަހަރަށް ވާހަކަ ދައްކަވަމުން އާޔަތުﷲ ވިދާޅުވީ "ހަމަނުޖެހުން އިންޖިނިއާ" ކުރީ އިރާނުގެ ދުޝްމަނުންނާއި އެ މީހުންގެ ބައިވެރިން ކަމަށެވެ. ހަމަނުޖެހުމުގައި ގުރުއާންގެ މުސްހަފް އަންދާފައިވާ ކަމަށް ވެސް ތުހުމަތު ކުރެއްވި އެވެ.
ސަލާމަތީ ފައުޖުތަކަށް އާޔަތުﷲ ގޮވާލެއްވީ އިތުރު ހަމަނުޖެހުންތައް ކޮންޓްރޯލް ކުރަަން ތައްޔާރަށް ތިބުމަށެވެ. އާޔަތުﷲ އެގޮތަށް ވިދާޅުވީ ފުލުހުންނާއި ސިފައިންގެ ގްރެޖުއޭޝަން ހަފްލާއެއްގަ އެވެ.
"ހެއްކެއް އަދި ތަހުގީގެއް ހިންގުމެއް ނެތި މަގުމަތި ނުރައްކާކޮށް، ގުރުއާން އަންދައި، އަންހެނުންގެ ހިޖާބުތައް ނަގައި، މިސްކިތާއި ކާރުގައި ހުޅުޖެހުމަކީ އާދައިގެ ކަންކަމެއް ނޫން،" އޭނާ ވިދާޅުވި އެވެ.
މުޒާހަރާތައް ފެށީ ފުލުހުން ހައްޔަރު ކުރި އަންހެނަކު މަރުވި މައްސަލައިގަ އެވެ. މަހްސާ އާމިނީ ހައްޔަރު ކުރީ ބުރުގާ ނާޅާ ހުރުމުންނެވެ. ތުހުމަތު ކުރެވޭ ގޮތުގައި އޭނާ މަރުވީ ފުލުހުންގެ އަނިޔާތަކުގެ ސަބަބުންނެވެ.
އިރާނުގައި އަންހެނުން ބުރުގާ އެޅުން މަޖުބޫރެވެ. އާއިލާއިން ތުހުމަތު ކުރާ ގޮތުގައި ފުލުހުން ވަނީ މަހްސާ އާމިނީގެ ބޮލުގައި މުގުރުން ތަޅައި، ފުލުހުންގެ އުޅަނދުގެ ލުމަށް ފަހު، ބޯ ތަންތަނުގައި ޖައްސައި ޖައްސާފަ އެވެ.
ފުލުހުން ބުނީ އަނިޔާކުރި ކަމުގެ އެއްވެސް ހެއްކެއް ނެތް ކަމަށާއި އޭނާ މަރުވީ ހިތް ހުއްޓިގެން ކަމަށެވެ. އިރާން ހިޔުމަން ރައިޓްސް ޖަމިއްޔާއިން ބުނީ ހަމަނުޖެހުންތަކުގައި މިހާތަނަށް 133 މީހުން މަރުވެފައިވާ ކަމަށެވެ.
