އިންޑިއާގެ ވައިގެ ސަރަހައްދުން ދަތުރު ކުރަމުން ދިޔަ ފްލައިޓެއްގައި ބޮމެއް އޮތްކަމުގެ ބިރާ އެކު އިންޑިއާ އެއާ ފޯސްގެ ޖެޓުތައް ހަރަކާތްތެރިވެއްޖެ އެވެ.
ބޮމެއް އޮތްކަމުގެ މައުލޫމާތު ލިބުނީ އިރާނުގައި ރަޖިސްޓްރީކޮށްފައި އޮތް ފްލައިޓެއްގަ އެވެ. އަސްކަރީ ޖެޓުތައް ފްލައިޓް ކައިރިން ދަަތުރުކޮށް، އިންޑިއާގެ ދެ އެއާޕޯޓަކަށް ޖެއްސޭނެ ކަމަށް އެންގި އެވެ.
އެހެން ނަމަވެސް، ފަހުން އިރާނުން އިންޑިއާގެ އެއާ ފޯސްއަަށް އެންގީ ބޮމެއް އޮތް ކަމަށް ލިބުނު މައުލޫމާތު ކުށް ކަަމަށެވެ. އަދި އިންޑިއާއިން ދެއްކި ދެ އެއާޕޯޓުގައި ވެސް ބޯޓު ޖައްސަން ބޭނުން ނޫން ކަމަށް ޕައިލެޓް އެންގި އެވެ.
ފްލައިޓް ރޭޑާ24 ގެ މައުލޫމާތުން ދައްކާ ގޮތުގައި މަހަން އެއާގެ ފްލައިޓް ޑަބްލިއު581 ތެހްރާނުން ފުރައިގެން ދާން ހަމަޖެހިފައި އޮތީ ޗައިނާގެ ގުއާންގްޒޫ އަށެވެ.
އެހެން ނަމަވެސް އިންޑިއާގެ އުތުރު ވައިގެ ސަރަހައްދުގައި ގިނައިރުތަކެއް ވަންދެން އެ ބޯޓު ބުރު ޖެހި އެވެ. އޭގެ ފަހުން އަނެއްކާވެސް ދަަތުރު ކުރިއަށް ގެންގޮސް، މިޔަންމާއަށް އެތެރެވި އެވެ.
