އިރާނުގެ ދުޝްމަނުންގެ ރޭވުން ފެއިލްވެފައިވާ ކަމަށް އެ ގައުމުގެ ރައީސް އިބްރާހިމް ރައިސީ އާދީއްތަ ދުވަހު ވިދާޅުވެއްޖެ އެވެ.
ރައިސީ އެގޮތަށް ވިދާޅުވި އިރު، އިރާނުގައި ސަރުކާރާ މެދު އާއްމުން ހިތްހަމަނުޖެހި ފެށި މުޒާހަރާތައް މިހާރު ވަނީ ތިން ވަނަ ހަފުތާއަކަށް ދިގުދެމިގެން ގޮސްފަ އެވެ.
"ދުޝްމަނުން ރޭވުމަކައިގެން އައީ އިރާނު ދުނިޔެއިން އެކަހެރިކޮށް ބާކީކޮށްލުމަށް. އެކަމަކު އެ ރޭވުން ފެއިލްވެއްޖެ،" އިރާނުގެ ރައީސް އޮފީހުން ނެރުނު ބަޔާނުގައިވެ އެވެ.
ރައިސީ ވިދާޅުވީ އިގްތިސާދީ ގޮންޖެހުންތަކުން އަރައިގަނެ، މެދުއިރުމަތި އަދި ދުނިޔޭގައި އިރާނު ހަރަކާތްތެރިވާން ފަށާފައި ވަނިކޮށް، ދުޝްމަނުން ރޭވީ ގައުމު ފަހަތަށް ވައްޓާލަން ކަމަށެވެ.
މީގެ ކުރިން މުޒާހަރާތަކާ ގުޅިގެން ރައިސީ ވިދާޅުވީ މުޒާހަރާ ކުރަމުންދާ މީހުންނާ ދެކޮޅަށް ހިކުމަތްތެރިކަމާ އެކު ފިޔަވަޅު އަޅާނެ ކަމަށެވެ.
ފުލުހުންގެ ބަންދުގައި ހުރި އަންހެނަކު މަރުވުމުން ފެށި މުޒާހަރާތަކުގައި މިހާތަނަށް 90 އަށް ވުރެ ގިނަ މީހުން މަރުވެފައިވާ ކަމަށް އޮފިޝަލުން ބުނެ އެވެ.
މަހްސާ އާމިނީ ނަމަކަަށް ކިޔާ އަންހެނަކު ހައްޔަރު ކުރީ ބުރުގާ ނާޅާ ހުރުމުންނެވެ. ތުހުމަތު ކުރެވޭ ގޮތުގައި އޭނާ މަރުވީ ފުލުހުންގެ އަނިޔާތަކުގެ ސަބަބުންނެވެ.
އިރާނުގައި އަންހެނުން ބުރުގާ އެޅުން މަޖުބޫރެވެ. އާއިލާއިން ތުހުމަތު ކުރާ ގޮތުގައި ފުލުހުން ވަނީ މަހްސާ އާމިނީގެ ބޮލުގައި މުގުރުން ތަޅައި، ފުލުހުންގެ އުޅަނދުގެ ލުމަށް ފަހު، ބޯ ތަންތަނުގައި ޖައްސައި ޖައްސާފަ އެވެ.
ފުލުހުން ބުނީ އަނިޔާކުރި ކަމުގެ އެއްވެސް ހެއްކެއް ނެތް ކަމަށާއި އޭނާ މަރުވީ ހިތް ހުއްޓިގެން ކަމަށެވެ.
މަހްސާ އާމިނީގެ މަަރުގެ މައްސަލަ ތަހުގީގު ކުރައްވާނެ ކަމަށް ރައިސީ ވިދާޅުވި އެވެ. އެކަމަކު އިންޓީރިއާ މިނިސްޓަރު އަހްމަދު ވާހިދީ ވިދާޅުވީ އޭނާއަށް އަނިޔާކޮށްފައި ނުވާ ކަމަށެވެ.
