ބ. ދަރަވަންދޫ ސިއްހީ މަރުކަޒުގައި އިންޑިއާ ސަރުކާރުގެ އެހީއާ އެކު ތަރައްގީކުރި އެމަޖެންސީ ރެސްޕޮންސް ޔުނިޓްގައި ހިދުމަތްދޭން މިއަދު ފަށައިފި އެވެ.
ދެ ބުރިއަށް ހަދާފައިވާ އެ އިމާރާތަކީ، އިންޑިއާ ސަރުކާރުން ރާއްޖޭގެ އިޖުތިމާއީ އަދި އިގްތިސާދީ ދާއިރާއަށް އެހީވުމަށް 2019 ވަނަ އަހަރު ދިން އެހީގެ ދަށުން ގާއިމްކުރަން ނިންމި ތަނެކެވެ. އެކަމަކު މުޅި ތަނުގެ ހަރަދު ހަމަޖައްސާފައިވަނީ ދިވެހި ސަރުކާރުގެ އެހީއާ ވެސް އެކު އެވެ. އެ ޔުނިޓް ނިންމަން 8 މިލިއަނަށްވުރެ ގިނަ ރުފިޔާ ހަރަދުކޮށްފައިވެ އެވެ. ނުވަ ލައްކަ ރުފިޔާ ހަރަދުކޮށްފައިވަނީ ރާއްޖޭގެ ސަރުކާރުންނެވެ.
އެ ޔުނިޓުގައި އަވަސް ފަރުވާދޭ 10 އެނދުގެ ވޯޑަކާއި އޮފީސް ސެގްމެންޓަކާއި ނާސިން ސްޓޭޝަނެއް ގާއިމްކޮށްފައިވެ އެވެ.
އިންޑިއާ ސަރުކާރުގެ އެހީގައި ކުރިއަށްގެންދާ މި މަޝްރޫއާއި، އިތުރު އެހެން މަޝްރޫތަކުގެ މަގްސަދު ހާމަކޮށް ހައިކޮމިޝަނުން ނެރުނު ނޫސްބަޔާނެއްގައި ބުނީ، މިފަދަ އެހީތެރިކަން ފޯރުކޮށްދިނުމުގެ ބޭނުމަކީ، ހިދުމަތްތައް އަޕްގްރޭޑްކޮށް، ރާއްޖޭގެ ކަންކޮޅުތަކުން ހޮވާލެވޭ ސަރަހައްދުތަކުގެ ސިއްހީ ހިދުމަތް ދޭ ތަންތަނުގެ ގާބިލުކަން އިތުރަށް ވަރުގަދަކުރުމަށް އެހީތެރިވެދިނުން ކަމަށެވެ.
