ކޮވިޑް-19 ވައިރަހުގެ އެކި ޖީންތައް ދަނެގަނެ، ޖީން ސީކުއެންސީ ހެދުމުގެ ގާބިލްކަން ހުރި ރާއްޖޭގެ ލެބޯޓަރީ ތަރައްގީ ކުރުމަށް އެމެރިކާއިން އެހީތެރިކަން ފޯރުކޮށްދީފި އެވެ.
ޔޫއެސްއޭއެއިޑީގެ ފަރާތުން ނެރުނު ބަޔާނެއްގައި ބުނެފައި ވަނީ ހެލްތު މިނިސްޓްރީން ހިންގުމަށް ހަމަޖެހިފައިވާ ނެޝަނަލް ހެލްތު ލެބޯޓަރީއަށް ހަދިޔާ ކުރީ "ޖީން ސީކުއެންސިން ވަސީލަތް ގާއިމުކުރުމަށް އެ ލެބޯޓަރީއަށް ބޭނުންވާ އެކުއިޕްމަންޓާއި އެހެނިހެން ތަކެތި" އެ ޖަމިއްޔާއިން ރާއްޖެއަށް ކަނޑައަޅާފައި ހުންނަ މިޝަންގެ ގަވަރަންސް އެންޑް ވަލްނަރަބަލް ޕޮޕިއުލޭޝަންގެ އޮފީހުގެ ޑިރެކްޓަރު ކެވިން ޑީން ވިދާޅުވި އެވެ.
"މިއަދު މި ފާހަގަކުރަނީ ކޮވިޑްއާ ދެކޮޅަށް ކުރާ މަސައްކަތް ކުރިއަށްގޮސްފައިވާ ހިސާބު. ސަތޭކަ އެތައް ޒަރޫރީ ތަކެއްޗާއި ސަޕްލައިޒް މި ވަނީ ނޭޝަނަލް ހެލްތު ލެބޯރަޓަރީއަށް ފޯރުކޮށްދީފަ. ޖީން ސީކުއެންސިން ފެސިލިޓީ މި ވަނީ ފުރިހަމައަށް ތަރައްގީކޮށް، ބޭނުންކުރަން ފެށުމަށް ތައްޔާރުވެފަ،" ތަކެތި ހަދިޔާ ކުރުމަށް މިއަދު ބޭއްވި ރަސްމިއްޔާތެއްގައި ޑީން ވިދާޅުވި އެވެ.
އެ ރަސްމިއްޔާތުގައި ވާހަކަ ދައްކަވަމުން ޑީން އިތުރަށް ވިދާޅުވީ އެ ލެބޯޓަރީގައި މަސައްކަތް ކުރާ މުވައްޒަފުން ތަމްރީނު ކުރުމަށް ވެސް އެމެރިކާއިން އެހީތެރިވާނެ ކަމަށެވެ.
"ޔޫއެސްއޭއައިޑީ އަދި ދުނިޔޭގެ ސިއްހަތު ޖަމިއްޔާގެ ފަރާތުން ފޯރުކޮށްދޭ ފަންނީ އެހީތެރިކަމާއެކު މި ލެބޯޓަރީގެ މުވައްޒަފުންނަށް ކޮވިޑް-19ގެ މޮލެކިއުލާ ޑައިގްނޮސްޓިކްސް އަދި ޖީނޯޓައިޕިންއާ ގުޅުންހުރި ތަމްރީނުތައް ފޯރުކޮށްދީ، މިކަމުގައި އެހީތެރިވެދޭނެ،" އޭނާ ވިދާޅުވި އެވެ.
ކޮވިޑުގެ ބަލިމަޑުކަން ފެށުނު ފަހުން އެމެރިކާއިން ވަނީ ރާއްޖެއަށް 639،990 ވެކްސިން ހަދިޔާކޮށްފަ އެވެ. އެމެރިކާއިން ދިނީ ފައިޒާ ވެކްސިނެވެ. އޭގެ އިތުރުން ހަތް މިލިއަން ޑޮލަރުގެ އެކި ސާމާނުތައް ހަދިޔާކޮށްފައިވެ އެވެ. އަދި 60 ވެންޓިލޭޓަރު ވެސް ވަނީ ހަދިޔާކޮށްފަ އެވެ.
