ބާލިން (ސެޕްޓެމްބަރު 18) - ޖަރުމަނު ލީގުގައި ރޭ ޝާލްކާ އަތުން ބޮރޫޝިއާ ޑޯޓްމަންޑް މޮޅުވި މެޗުގައި އެ ޓީމުގެ ކެޕްޓަން، މާކޯ ރެއުސް ކުޑަހުޅަށް އަނިޔާވެ، އަންނަ ނޮވެމްބަރު މަހު ގަތަރުގައި ފަށާ ފީފާ ވޯލްޑް ކަޕްގައި ނުކުޅެވުމުގެ ބިރުބޮޑުވެއްޖެ އެވެ.
ރެއުސް، 33، ގެ ކުޑަހުޅަށް އަނިޔާވެގެން އަށިގަނޑުގައި ބޭލިއިރު، އޭނާ އަށް ހުރީ ރޮވިފަ އެވެ. ޑޯޓްމަންޑްގެ މެޑިކަލް ޓީމާ ހަވާލާދީ ޖަރުމަނުގެ ނޫސްތަކުން ރިޕޯޓްކުރާގޮތުގައި ރެއުސްގެ އަނިޔާގެ ތަފްސީލް އެނގޭނީ މިއަދު ހަދާ ޓެސްޓްތަކަށް ފަހު އެވެ.
މީގެ ކުރިން ރެއުސްގެ ކުޑަހުޅަށް ލިބިފައިވާ އެކި އަނިޔާތަކުގެ ސަބަބުން އޭނާ އަށް ދެ މަހެއްހާ ދުވަހަށް ވަނީ ކުޅުމާ ދުރަށް ދާންޖެހިފަ އެވެ. އެ ގޮތަށް މި ފަހަރު ވެސް ދިމާވެއްޖެނަމަ، ޔަގީނުން ވެސް ވޯލްޑް ކަޕް ފެށެންވާއިރަށް ރެއުސް އަށް ފިޓްވެގެން އެނބުރި ދަނޑަށް ނާދެވޭނެ އެވެ.
މިދިޔަ އަހަރުގެ ނޮވެމްބަރު މަހު އެންމެ ފަހުން ޖަރުމަނު ގައުމީ ޓީމަށް ކުޅުނު ރެއުސް މި ސީޒަން ފަށާފައިވަނީ ރަނގަޅު ފޯމެއްގަ އެވެ. އެހެންވެ، މި ފަހަރުގެ ވޯލްޑް ކަޕަށް ޖަރުމަނުގެ ކޯޗު، ހަންސީ ފްލިކް ނަގާ ސްކޮޑުން ރެއުސް އަށް ފުރުސަތު ލިބޭނެ ކަމަށް އޮތީ ބެލެވިފަ އެވެ. އެކަމަކު، ލިބުނު އަނިޔާގެ ސަބަބުން މިހާރު ރެއުސް އަށް މި އޮތީ ވޯލްޑް ކަޕަށް ފިޓް ވުން ވެސް އެއީ ޗެލެންޖަކަށް ވެފަ އެެވެ.
ޖަރުމަނުގެ މެޗެއްގެ ތެރެއިން ރެއުސް: އޭނާ ވަނީ ޖަރުމަނު ޓީމަށް ކުޅުނު 48 މެޗުން 15 ގޯލު ޖަހާފައި.
ހުނަރުވެރި އެޓޭކިން މިޑްފީލްޑަރެއްގެ ގޮތުގައި ފާހަގަކުރެވޭ، ރެއުސް އަކީ ބައިނަލްއަގުވާމީ ބޮޑު މުބާރާތްތަކާ ދިމާކޮށް ބަދުނަސީބު ރެކޯޑެއް އޮތް ކުޅުންތެރިއެކެވެ.
އެ ގޮތުން 2012 ވަނަ އަހަރު ޕޮލެންޑާއި ޔޫކްރެއިންގައި ބޭއްވި ޔޫރޯ ފުޓްބޯޅަ މުބާރާތަށް ތައްޔާރުވާން ޖަރުމަނުން ކުޅުނު އެންމެ ފަހު މެޗުގައި ރެއުސް އަށް އަނިޔާވެ އެ މުބާރާތް ގެއްލުނެވެ.
ޖަރުމަނުން 2014 ވަނަ އަހަރު ބްރެޒިލްގައި ބޭއްވި ފީފާ ވޯލްޑް ކަޕް ކާމިޔާބުކުރިއިރު، އެ މުބާރާތް ފެށެން ކުޑަ ދުވަސްކޮޅަށް ވެފައި ވަނިކޮށް ރެއުސް އަށް އެ މުބާރާތް ވެސް ގެއްލުނެވެ. އޭގެ ދެ އަހަރު ފަހުން، 2016 ވަނަ އަހަރު ފްރާންސްގައި ބޭއްވި ޔޫރޯ އަށް ތައްޔާރުވާން ޖަރުމަނުން ކުޅުނު އެންމެ ފަހު މެޗުގައި ރެއުސް އަށް އަނިޔާވެ، އެ މުބާރާތުގައި ކުޅުމުގެ ފުރުސަތު ވެސް ގެއްލުނީ އެވެ.
އެންމެ ފަހުން، 2018 ވަނަ އަހަރު ރަޝިއާގައި ބޭއްވި ވޯލްޑް ކަޕްގައި ރެއުސް ކުޅުނެވެ. އެކަމަކު، އެ ފަހަރު މުބާރާތުގެ ގްރޫޕް ސްޓޭޖުން ޖަރުމަނު ކެޓީ، ވޯލްޑް ކަޕްގައި އެ ޓީމުގެ އެންމެ ދަށް ނަތީޖާތަކާ އެކު އެވެ. މިދިޔަ އަހަރު ބޭއްވި ޔޫރޯ ފުޓްބޯޅަ މުބާރާތުގައި ރެއުސް ނުކުޅުނީ، ފަލަމަސްގަނޑަށް ލިބުނު އަނިޔާ އަކުން ރިކަވާނުވާތީ އެވެ.
