ބުރުގާ ނާޅާ ހުރުމުން އިރާނުގެ ދީނީ ފުލުހުން ހައްޔަރު ކުރި ޒުވާން އަންހެނަކު ކުއްލި ގޮތަކަށް މަރުވުމުން، ނުރުހުން ފާޅުކޮށް ގިނަ ބަޔަކު މުޒާހަރާކޮށްފި އެވެ.
އުމުރުން 22 އަހަަރުގެ މަހްސާ އާމިނީ މަރުވީ ހުކުރު ދުވަހު އެވެ. މަންޒަރު ދުށް ފަރާތްތަކުން ބުނީ ފުލުހުންގެ ކާރު ތެރޭގައި މަހްސާ އާމިނީއަށް އަނިޔާކުރި ކަމަށެވެ. އެކަމަކު ފުލުހުން އެކަން ދޮގުކުރެ އެވެ.
މަހްސާ އާމިނީ ޖަނާޒާ ހޮނިހިރު ދުވަހުގެ ފަތިހު އޮތް އިރު، ގިނަ އަދަދެއްގެ އަންހެނުން ވަނީ ފުލުހުންނާ މެދު ނުރުހުން ފާޅުކުރުމުގެ ގޮތުން ބުރުގާތައް ބާލައި، އަޑު އުފުލައިފަ އެވެ.
އިރާނުގައި އަންހެނުން ބުރުގާ އެޅުމަކީ މަޖުބޫރު ކަމެކެވެ. ސޯޝަލް މީޑިއާގައި ދައުރުވި ވީޑިއޯތަކުން ފެންނަ ގޮތުގައި މުޒާހަރާ ކޮންޓްރޯލް ކުރަން ފުލުހުން އާއްމުންގެ ތެރެއަށް ބަޑި ޖެހި އެވެ.
ގިނަ ބަޔަކަށް އަނިޔާވި އިރު، ބައެއް މީހުން ހައްޔަރު ކުރި ކަމަަށް ރިޕޯޓުތައް ބުނެ އެވެ. އިރާނުގެ ރައީސް އިބްރާހިމް ރައިސީ ވަނީ މަހްސާ އާމިނީ މަރުވި ގޮތުގެ ތަހުގީގެއް ހިންގަން އަމުރު ކުރައްވައިފަ އެވެ.
