ބާލިން (ސެޕްޓެމްބަރު 17) - ޖަރުމަނު ލީގުގައި މިރޭ ކުޅުނު މެޗުން އޮއުސްބާގް އަތުން 1-0 އިން ބަލިވެ، އެންމެ ފަހުގެ ޗެމްޕިއަން ބަޔާން މިއުނިކްގެ ލީގު ފޯމަށް އިތުރަށް އަސަރުކޮށްފި އެވެ.
މި މެޗުން ބަޔާން ބަލިވިއިރު، ޖަރުމަން ލީގުގައި ބަޔާން އެންމެ ފަހުން ކުޅުނު ތިން މެޗުގައި ވެސް އެ ޓީމަށް މޮޅެއް ނުލިބެ އެވެ.
މިރޭގެ މެޗަށް ފަހު ބަޔާން ކޯޗު ހޫލިއަން ނާގަލްސްމަން ބުނީ އެ ޓީމުގެ ލީގު ފޯމަށް އަސަރުކޮށްފައިވާ ސަބަބު ދެނެގަންނަން ވަރަށް ގިނަ މަސައްކަތްތަކެއް ކުރިއަށް އޮތް ދުވަސްތަކުގައި ކުރާނެ ކަމަށެވެ. އަދި ފޯމު ރަނގަޅު ކުރަން ޓީމަށް ބަދަލު ގެންނަން ޖެހޭ ކަންކަމަށް އެ ބަދަލުތައް ގެންނަން ފަސްނުޖެހޭނެ ކަމަށް އޭނާ ވަނީ ބުނެފަ އެވެ.
އޮއުސްބާގަށް މެޗުގެ ފުރަތަމަ ހާފުގައި ލީޑުނަގައިދޭން ލިބުނު ފުރުސަތުން މެކްސިމިލިއަން ބައުއާ ބޮލުން ޖެހި ބޯޅަ ދިޔައީ ހުރަސްދަނޑިމަތިންނެވެ. ބަޔާނަށް ލީޑުނަގައިދޭން ފުރަތަމަ ހާފުގައި ޖަމާލް މުސިއާލާ އަށް ލިބުނު ފުރުސަތުން އޭނާ ގޯލަށް ޖެހި ބޯޅަ އޮއުސްބާގްގެ ބައުއާ ވަނީ ވަނީ ސަލާމަތްކޮށްފަ އެވެ.
އޮއުސްބާގް ދަނޑުގައި މިރޭ ކުޅުނު މެޗުގެ 59 ވަނަ މިނިޓުގައި އެ ޓީމަށް ލަނޑު ޖަހައިދިނީ މެރްޖިމް ބެރީޝާ އެވެ. އޭރިއާތެރެއިން ބެރީޝާ އަށް ލިބުނު ބޯޅަ އޭނާ ވަނީ ހަމަޖެހިލާފައި ގޯލުގެ ކަނަށް ފޮނުވާލައިފަ އެވެ.
ބަޔާނަށް އެއްވަރުކޮށްދޭން ތޯމަސް މުލާ ހުސްކޮށް އޭރިއާތެރެއަށް ވަދެ ޖެހި ޝޮޓް އޮއުސްބާގްގެ ކީޕަރު ރަފާ ގިކިއެވިޗް ވަނީ މަތަކޮށްފަ އެވެ. އަދި މެޗުގެ އިތުރު ވަގުތުގައި ބަޔާނަށް ލިބުނު ކޯނަރަކުން އެ ޓީމުގެ ގޯލްކީޕަރު މެނުއަލް ނޯޔާ ބޮލުން ފޮނުވާލި ބޯޅަ ވެސް އޮއުސްބާގް ގޯލުގައި މި މެޗުގަައި މޮޅު ކުޅުމެއް ދެއްކި، ކީޕަރު ގިކިއެވިޗް ވަނީ މަތަކޮށްފަ އެވެ.
މިއީ މި ސީޒަންގެ ލީގުގައި އޮއުސްބާގް އަމިއްލަ ދަނޑުގައި މޮޅުވި ފުރަތަމަ މެޗެވެ.
މި މެޗުގެ ނަތީޖާއާ އެކު ބަޔާން އޮތީ 12 ޕޮއިންޓާއެކު ތާވަލްގެ ހަތަރު ވަނައިގަ އެވެ. މި ހަފުތާގައި ކުޅޭ މެޗުތަކުގެ ނަތީޖާތައް ނުކުންނަ ގޮތަކުން، ބަޔާން ގަދަ ހަތަރަކުން ވެސް ވެއްޓިދާނެ އެވެ.
ޖަރުމަން ލީގުގައި މިރޭ ވާދަވެރި ޝާލްކޭ އަތުން 1-0 އިން މޮޅުވެ ބޮރޫޝިއާ ޑޯޓްމަންޑް ވަނީ 15 ޕޮއިންޓާއެކު ތާވަލްގެ އެއްވަނަ އަށް ޖެހިލައިފަ އެވެ. މެޗުގެ ހަމައެކަނި ލަނޑު ޖެހީ ބަދަލު ކުޅުންތެރިއެއްގެ ގޮތުގައި ކުޅެންއެރި އުމުރުން 17 އަހަރުގެ ކުޅުންތެރިޔާ ޔޫސުފާ މައުކޯކޯ އެވެ.
ޖަރުމަން ލީގުގައި މާދަމާ ވުލްފްސްބާގާ ދެކޮޅަށް ކުޅޭ މެޗުން ޔޫނިއަން ބާލިން މޮޅުވެއްޖެ ނަމަ، އެ ޓީމު އަލުން ތާވަލްގެ އެއްވަނަ އަށް ޖެހިލާނެ އެވެ. ޔޫނިއަން ބާލިން މި ވަގުތު ދެވަނައިގައި އޮތީ 14 ޕޮއިންޓާއެކު އެވެ. -- އޭއެފްޕީ
