ޕެރިސް (ސެޕްޓެމްބަރު 17) - ދާދި ފަހުން އަވަހާރަވި ރާނީ އެލިޒަބަތު ދެ ވަނައިގެ ހަނދާން އާ ކުރުމުގެ ގޮތުން ޔުއެފާ ޗެމްޕިއަންސް ލީގުގައި މި ހަފުތާގައި ރޭންޖާސް އިން ނަޕޯލީއާ ދެކޮޅަށް ކުޅުނު މެޗުގެ ކުރިން ލަވައެއް ޖެހި މައްސަލަ ޔުއެފާ އިން ބަލާނެ ކަމަށް އިނގިރޭސި މީޑިއާތަކުން ރިޕޯޓްކޮށްފި އެވެ.
ބާރަ އަހަރުގެ މެދުކެނޑުމަކަށް ފަހު ރޭންޖާސް އިން ޗެމްޕިއަންސް ލީގުގައި ކުޅުނުއިރު، އެ ޓީމުގެ ދަނޑުގައި ކުޅުނު ފުރަތަމަ މެޗުގެ ކުރިން ރާނީ އެލިޒަބަތު ދެ ވަނަ އަށް ހާއްސަކޮށް "ގޯޑް ސޭވް ދަ ކިންގް" ލަވަ ޖެހުމަށް ޔުއެފާގައި އެދުނެވެ. އޮންނަ ޕްރޮޓޮކޯލް ތެރެެއިން އެކަން ކުރެވެން ނެތް ކަމަށް ޔުއެފާ އިން ރޭންޖާސް އަށް އެންގި ނަމަވެސް، އެ ކްލަބުން ވަނީ ނަޕޯލީ އަތުން 3-0 އިން ބަލިވި މެޗުގެ ކުރިން އެ ލަވަ ޖަހައިފަ އެވެ.
އިނގިރޭސި މީޑިއާ ރިޕޯޓްތައް ބުނާ ގޮތުން ޔުއެފާ އިން މިހާރު އިންތިޒާރު ކުރަމުން އަންނަނީ ނަޕޯލީ އާއި ރޭންޖާސް ބައްދަލުކުރި މެޗު އޮފިޝަލުންގެ ރިޕޯޓްތަކަށެވެ. އެ ރިޕޯޓްތަކަށް ބެލުމަށް ފަހު، ޑިސިޕްލިނަރީ ފިޔަވަޅެއް އަޅަން ޖެހިއްޖެނަމަ ޔުއެފާ އިން އެ ގޮތަށް ކުރިއަށްދާނެ ކަމަށް ރިޕޯޓްތައް ބުނެ އެވެ.
ޔުއެފާގެ ހުއްދައާ އެކު އިނގިރޭސި ގިނަ ކްލަބްތަކަކުން ވަނީ ޗެމްޕިއަންސް ލީގު ފެށުމުގެ ކުރިން ރާނީ އެލިޒަބަތު ދެ ވަނައިގެ ހަނދާނުގައި ހަމަހިމޭން ކަމުގެ ސުކޫތެއް ގެނެސްފަ އެވެ. ޔުއެފާގެ މެޗު ޕްރޮޓޮކޯލްގެ އުސޫލުތަކުގެ ތެރެއިން އިތުރު ކަމެއް ކުރެވެން ނެތުމުން، އެއްވެސް ކްލަބަކުން އިތުރު ހަރަކާތެއް ނުބާއްވަ އެވެ.
