ރޯމް (ސެޕްޓެމްބަރު 15) - ކްރިސްޓިއާނޯ ރޮނާލްޑޯގެ ކެރިއަރުގައި ޔޫރޮޕާ ލީގުގައި ޖެހި ފުރަަތަމަ ގޯލާ އެކު، މެންޗެސްޓާ ޔުނައިޓެޑުން މިރޭ މޮލްޑޯވާގެ ޝެރިފް ޓިރާސްޕޯލް 2-0 އިން ބަލިކުރިއިރު، ފިންލެންޑްގެ އެޗްޖޭކޭ އަތުން 3-0 އިން ކުރިހޯދައި ރޯމާ އިން މި ފަހަރުގެ މުބާރާތުގެ ފުރަތަމަ މޮޅު ހޯދައިފި އެވެ.
މި ސީޒަން ފެއްޓުމުގެ ކުރިން ޗެމްޕިއަންސް ލީގު ކުޅޭ ކްލަބަކަށް ބަދަލުވާން ރޮނާލްޑޯ އޭނާގެ އޭޖެންޓް ޖޯޖް މެންޑޭޒް މެދުވެރިކޮށް ގިނަ މަސައްކަތްތަކެއް ކުރި އެވެ. އެކަމަކު، ޔުނައިޓެޑުން ރޮނާލްޑޯ ދޫކޮށްލަން ބޭނުންނުވާތީ އާއި އެކަށީގެންވާ ރަނގަޅު ބިޑެއް ކުރަން ގިނަ ކްލަބްތަކުން ބޭނުންނުވާތީ ރޮނާލްޑޯ ޔުނައިޓެޑްގައި މަޑުކުރީ އެވެ.
ކޯޗު އެރިކް ޓެން ހާގްގެ އިރުޝާދުގެ ދަށުން މި ސީޒަނުގައި ރޮނާލްޑޯ ޔުނައިޓެޑްގެ ފުރަތަމަ އެގާރައިގައި ކުޅެފައިވަނީ ތިން މެޗުގަ އެވެ. އޭގެ ތެރެއިން ދެ މެޗަކީ ޔޫރޮޕާ ލީގުގެ މެޗުތަކެވެ. ޝެރިފް ކޮޅަށް މިރޭ ރޮނާލްޑޯ ޖެހީ ޕެނަލްޓީ އަކުން ޔުނައިޓެޑްގެ ދެ ވަނަ ގޯލެވެ. މިއީ ޗެމްޕިއަންސް ލީގުގައި އެންމެ ގިނަ ގޯލު ޖެހުމުގެ ރެކޯޑް އޮތް ރޮނާލްޑޯ ޔޫރޮޕާ ލީގުގައި ޖެހި ފުރަތަމަ ގޯލެވެ. އަދި ކްލަބް ކެރިއަރުގެ 699 ވަނަ ގޯލު ވެސް މެ އެވެ.
ޝެރިފް ދަނޑުގައި ޔުނައިޓެޑަށް ލީޑުނަގައިދިނީ އިނގިރެސި ވިންގް، ޖޭޑަން ސަންޗޯ އޭރިއާތެރެއިން ގޯލުގެ ތިރީ ކަނަށް ފޮނުވާލި ބޯޅައިންނެވެ.
މިއީ މި ފަހަރުގެ ޔޫރޮޕާ ލީގުގައި ޔުނައިޓެޑްގެ ވެސް ފުރަތަމަ މޮޅެވެ. ޔުނައިޓެޑް ފުރަތަމަ މެޗުން އަމިއްލަ ދަނޑުގައި ވިޔަރެއާލް އަތުން 1-0 އިން ބަލިވިއިރު، މިރޭ ކުުޅުނު މި ގްރޫޕްގެ އަނެއް މެޗުން ވިޔަރެއާލް ވަނީ ސައިޕްރަސްގެ އޮމޯނިއާ އަތުން 2-1 އިން މޮޅުވެފަ އެވެ.
ރޯމާގެ ޑިބާލާ ގޯލު ޖެހުމަށް ފަހު އުފާފާޅުކުރަނީ.--- ފޮޓޯ: އޭއެފްޕީ
ކުރިން ޔުނައިޓެޑާއި ޕޯޓޯ އަށް ޔޫރޮޕާ ލީގު ކާމިޔާބުކޮށްދިން ހޯސޭ މޮރީނިއޯ ކޯޗުކޮށްދޭ ރޯމާ އިން މި ފަހަރުގެ މުބާރާތުގައި ކުޅުނު ފުރަތަމަ މެޗުން ވަނީ ބަލްގޭރިއާގެ ލުޑޮގޮރެޓްސް އަތުން މިދިޔަ ހަފްތާގައި ބަލިވެފަ އެވެ. އެކަމަކު، މިރޭ އަމިއްލަ ދަނޑުގައި ފިންލެންޑްގެ އެޗްޖޭކޭ ބަލިކޮށް ރޯމާ އިން ވަނީ ރަނގަޅު މޮޅެއް ހޯދައިފަ އެވެ.
ރޯމާ އިން ތިން ގޯލު ވެސް ދެ ވަނަ ހާފުގައި ޖެހިއިރު، އެ ޓީމުގެ ލަނޑުތައް ޖެހީ ޕައޮލޯ ޑިބާލާ، ލޮރެންޒޯ ޕެލެގްރީނީ އަދި ލޫޝިއާނޯ ބެލޮޓީ އެވެ.
ރޯމާ ހިމެނޭ ގްރޫޕްގައި އެންމެ ރެކޯޑް ރަނގަޅީ ރެއާލް ބެޓިސް އެވެ. ފުރަތަމަ މެޗުގައި އެޗްޖޭކޭ އަތުން މޮޅުވި ބެޓިސް ވަނީ މިރޭ ލުޑޮގޮރެޓްސް އަތުން 3-2 އިން މޮޅުވެފަ އެވެ.
ޔޫރޮޕާ ލީގުގެ ގްރޫޕް ބީގައި މިރޭ ޔޫކްރެއިންގެ ޑިނަމޯ ކިއޭވް ދަނޑުގައި ސައިޕްރަސްގެ އޭއީކޭ ލަނާކާ ވަނީ 1-0 އިން މޮޅުވެފަ އެވެ. މި ގްރޫޕްގެ އަނެއް މެޗުގައި ފްރޭންސްގެ ރެނެސް އާއި ތުރުކީގެ ފެނަބާޗޭ ވަނީ 2-2 އިން އެއްވަރުވެފަ އެވެ.
މިރޭގެ އެންމެ ހައިރާންކުރަނިވި ނަތީޖާ އަކީ ޔޫރޮޕާ ލީގުގެ ގްރޫޕް އެފްގައި ޑެންމާކްގެ މިޓްޔައެލަންޑް އަމިއްލަ ދަނޑުގައި އިޓަލީގެ ލާޒިއޯ އަތުން 5-1 އިން ހޯދި މޮޅެވެ. މިއީ އިޓަލީގެ ޓީމެއް އަތުން ޔޫރަޕްގެ މުބާރާތެއްގައި ޑެންމާކްގެ ކްލަބަކަށް ލިބުނު އެންމެ ބޮޑު މޮޅެވެ. މި ގްރޫޕްގެ އަނެއް މެޗުގައި މިރޭ ނެދަލެންޑްސްގެ ފެޔަނޫޑް ވަނީ ފަސޭހަކަމާ އެކު 6-0 އިން އޮސްޓްރިއާގެ ސްޓާމް ގްރާޒް ބަލިކޮށްފަ އެވެ.
