ޗީޝީނޯ، މޮލްޑޯވާ (ސެޕްޓެމްބަރު 15) - ޔުއެފާ ޔޫރޮޕާ ލީގުގައި މިރޭ މެންޗެސްޓާ ޔުނައިޓެޑުން ކުޅެން ޖެހޭ މޮލްޑޯވާގެ ޝެރިފް ޓިރާސްޕޯލް އަކީ ރެއާލް މެޑްރިޑް ވެސް ބަލިކުރި ޓީމެއް ކަމަށާއި އެހެންވުމުން އެއީ ފަސޭހައިން ނެގޭނެ ޓީމެއް ނޫން ކަމަށް ޔުނައިޓެޑްގެ ކޯޗު އެރިކް ޓެން ހާގް ބުނެފި އެވެ.
މިދިޔަ އަހަރުގެ ޗެމްޕިއަންސް ލީގު ގްރޫޕް ސްޓޭޖުގައި ޝެރިފުން ރެއާލް ދަނޑުގައި 2-1 އިން އެ ޓީމު ބަލިކުރިއިރު، ޔޫކްރެއިންގެ ޝަހުތަރު ޑޮނެސްކް އަތުން ވެސް މޮޅުވި އެވެ. އެކަމަކު، ޝެރިފް ދަނޑުގައި ރެއާލް 3-0 އިން މޮޅުވި އެވެ.
މި ފަހަރުގެ ޔޫރޮޕާ ލީގުގައި ޝެރިފް ކުޅޭއިރު، އެ ޓީމު ވަނީ ފުރަތަމަ މެޗުން ސައިޕްރަސްގެ އޮމޮނިއާ އަތުން 3-0 އިން މޮޅުވެފަ އެވެ. ޔުނައިޓެޑް ފުރަތަމަ މެޗުގައި އަމިއްލަ ދަނޑުގައި ވަނީ 1-0 އިން ރެއާލް ސޮސިއެޑާޑް އަތުން ބަލިވެފަ އެވެ.
މިރޭ ޝެރިފް ދަނޑުގައި ޔުނައިޓެޑުން އެ ޓީމާ ދެކޮޅަށް ކުޅޭ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ޔުނައިޓެޑްގެ ކޯޗު ޓެން ހާގް ބުނީ އެއްވެސް ވިސްނުމަކުން ބަލާއިރު، ޝެރިފާ ދެކޮޅަށް ކުޅޭ މެޗު ފަސޭހައިން ނެގޭނެ ގޮތެއް ނެތް ކަމަށެވެ.
"ވަރަށް ސާފުކޮށް ފެންނަން އެ އޮތީ، އެ މީހުން މިދިޔަ އަހަރު ރެއާލް މެޑްރިޑާއި ޝަހުތަރު ޑޮނެސްކް ވެސް އެ އޮތީ ބަލިކޮށްފައި. އެހެންވީމަ އެ ކްލަބްގެ ކިބައިގައި އާދަޔާހިލާފު ނަތީޖާ ނެރުމުގެ ފެންވަރު ހުރިކަން އެ އޮތީ ސާބިތުވެފައި. އަހަރެމެން ވިސްނުންތެރިކަމާ އެކު މި ކުރިމަތިލަނީ ކިހާ ވަރެއްގެ މެޗަކާކަން ވިސްނައިގެން ކުޅެން ޖެހޭނީ،" ޓެން ހާގް ބުންޏެވެ.
ޔުނައިޓެޑުން އެންމެ ފަހުން ކުޅުނު މެޗުގައި ސޮސިއެޑާޑާ ދެެކޮޅަށް ކުރިމަތިލިއިރު، އޮތީ ޖެހިޖެހިގެން ހަތަރު މެޗުން މޮޅުވެފަ އެވެ. އެކަމަކު، އެ ރެކޯޑް ނިމުމަކަށް އައީ ސޮސިއެޑާޑް އަތުން ބަލިވުމުންނެވެ. އެ ނަތީޖާއާ އެކު މި މެޗަށް ނުކުންނަން ޖެހުމުން އެއީ ޕްރެޝަރެއްތޯ އެހުމުން ޓެން ހާގް ބުނީ ފުޓްބޯޅައިގައި އެއްވެސް ކަހަލަ ޕްރެޝަރެއް ނެތް ވަގުތެއް ނާންނާނެ ކަމަށެވެ.
"ޔުނައިޓެޑްގެ ޓާގެޓަކީ ކޮންމެ މެޗެއް ވެސް މޮޅުވުން. އެހެންވީމަ، އެކަން ނުވާ ކޮންމެ ފަހަރަކީ ޕްރެޝަރެއް،" ޓެން ހާގް ބުންޏެވެ.
އަނިޔާގެ ސަބަބުން ޔުނައިޓެޑްގެ ފޯވާޑް މާކަސް ރަޝްފޯޑަށް މި މެޗުގައި ނުކުޅެވޭނެ ކަމަށް ޓެން ހާގް ވަނީ ބުނެފަ އެވެ. އެކަމަކު، ކްރިސްޓިއާނޯ ރޮނާލްޑޯ ޖެހިޖެހިގެން .ދެ ވަނަ މެޗުގައި ފުރަތަމަ އެގާރައިގައި ބޭނުންކުރާނެތޯ އެހި ސުވާލަށް ޓެން ހާގް ނިންމީ ސީދާ ޖަވާބެއް ނުދޭށެވެ.
