ދެހާސް ސާދަ ވަނަ އަހަރުން ފެށިގެން 24 ގައުމެއްގެ ސިޔާސީ ފަރާތްތަކަށް ނުފޫޒު ފޯރުވަން ރަޝިއާއިން ސިއްރުން 300 މިލިއަން ޑޮލަރު ހޭދަކުރި ކަމަށް އެމެރިކާއިން ތުހުމަތުކޮށްފި އެވެ.
ސްޓޭޓް ޑިޕާޓްމަންޓުން އެގޮތަށް ތުހުމަތު ކުރީ އެމެރިކާގެ ޖާސޫސީ ރިޕޯޓެއް ޑީކްލެސިފައި ކުރުމުން އޭގައިވާ މައުލޫމާތުގެ މައްޗަށް ބިނާކޮށްފަ އެވެ.
"އަޅުގަނޑުމެން ގަބޫލުކުރަނީ މިއީ އަދި ގަނޑުފެންގަނޑުގެ އެންމެ ކޮޅު ކަމަށް،" ރައީސް ޖޯ ބައިޑެންގެ ސަރުކާރުގެ އިސްވެރިޔަަކު ވިދާޅުވި އެވެ.
އެމެރިކާއިން އާއްމުކުރި ޖާސޫސީ ރިޕޯޓުގައި ވަކި ގައުމުތަކެއް އަދި އޮފިޝަލުންތަކެއްގެ ނަމެއް ނެތެވެ. އެކަމަކު އެއީ ހަތަރު ބައްރުގެ ގައުމުތައް ކަމަށް ވެ އެވެ.
އެމެރިކާ ސަރުކާރުގެ އޮފިޝަލް ވިދާޅުވީ ރަޝިއާގެ ފައިސާ ހޭދަކޮށް ނުފޫޒް ފޯރުވި ގައުމުތަކާ އެމެރިކާގެ ޖާސޫސީ އޮފިޝަލުން ވަކިން މައުލޫމާތު ހިއްސާ ކުރަމުންދާ ކަމަށެވެ.
އެމެރިކާއިން ތުހުމަތު ކުރާ ގޮތުގައި ޔޫރަޕްގެ ސިޔާސީ ޕާޓީތަކާއި އެކި އޮފިޝަލުންނަށް ފަންޑު ކުރަން ރަޝިއާއިން ގެންގުޅެނީ ވުޖޫދުގައި ނެތް ކުންފުނިތަކެކެވެ.
އެކަމާ ގުޅިގެން ރަޝިއާއިން ވަކި އެއްޗެއް ނުބުނެ އެވެ. މީގެ ކުރިން ރަޝިއާއިން ވެސް ވަނީ އެމެރިކާއިން އެހެން ގައުމުތަކުގެ ކަންކަމަށް ނުފޫޒު ފޯރުވާ ކަމަށް ތުހުމަތުކޮށްފަ އެވެ.
ކާނެޖީ މެލަން ޔުނިވާސިޓީގެ ތަފާސްހިސާބުން ދައްކާ ގޮތުގައި 1946 އިން 2000 ވަނަ އަަހަރާ ހަމައަށް އެމެރިކާއިން ވަނީ އެހެން ގައުމުތަކުގެ އިންތިހާބުތަކުގައި 80 އަށް ވުރެ ގިނަ ފަހަރު ނުފޫޒު ފޯރުވާފަ އެވެ. އޭގެ ތެރޭގައި ބަގާވާތްތަކާއި އިންގިލާބުތައް ނުހިމެނެ އެވެ.
