ދުނިޔޭގެ އެންމެ ބޮޑު މަހުޖަަނު އެލޮން މަސްކަށް 44 ބިލިއަން ޑޮލަރަށް ޓްވިޓާ ވިއްކާލަން އެ ކުންފުނީގެ ހިއްސާދާރުން ފާސްކޮށްފި އެވެ.
އެގޮތަށް ނިންމީ ކުންފުނީގެ އިންވެސްޓަރުންނާ އެކު ސޭން ފްރެންސިސްކޯގައި ހުންނަ މައި އޮފީހުން ބޭއްވި ކުރު ކޮންފެރެންސް ކޯލެއްގެ ތެރޭންނެވެ.
އެ ނިންމުމާ އެކު ޓްވިޓާއިން ދެން މަސައްކަތް ކުރާނީ ކޯޓުތައް މެދުވެރިކޮށް އެލޮން މަސްކަަށް ކުންފުނި ވިއްކާލުމަށެވެ.
މަސްކަށް ކުންފުނި ވިއްކާލަން ޓްވިޓާއިން އެއްބަސްވީ އެޕްރީލް މަހު އެވެ. އެކަމަކު ޓްވިޓާގެ ސްޕޭމް އަދި ބޮޓް އެކައުންޓްތަކާ ބެހޭ ގޮތުން އޮޅުވާލާފައިވާ ކަމަށް ބުނެ މަސްކް ފަހުން އެ ކުންފުނި ގަންނަން ބޭނުމެއް ނުވި އެވެ.
ޓްވިޓާ ގަންނަން ބޭނުންނުވާކަމަށް މަސްކް ބުނީ މި މަހު އެވެ. އެކަމަކު ޓްވިޓާއިން ބުނީ މަސްކް އެއްބަސްވި ގޮތަށް އަމަލު ކުރަން ޖެހޭނެ ކަމަށެވެ.
ޓްވިޓާއިން ބުނީ ބޮޓް އެކައުންޓްގެ ގޮތުގައި ހިމެނޭ ފަސް ޕަސެންޓަށް ވުރެ މަދު އެކައުންޓްތައް ކަމަށެވެ. ނަމަވެސް މަސްކް ގަބޫލުކުރާ ގޮތުގައި އެ އަދަދު އެއަށްވުރެ މަތިވާނެ އެވެ.
ޓްވިޓާގެ މިހާރުގެ އަގަކީ 32 ބިލިއަން ޑޮލަރެވެ. މަސްކް ހުށަހެޅީ 44 ބިލިއަން ޑޮލަރަށް ކުންފުނި ގަތުމަށެވެ.
މަސްކަށް ކުންފުނި ވިއްކާލަން ހިއްސާދާރުން ފާސްކުރުމާ އެކު ކޯޓުގައި އަޑުއެހުންތައް ކުރިއަަށް ދާނެ އެވެ. ޝަރީއަތް ފަށާނީ އޮކްޓޯބަރު މަހު އެވެ. މަސްކު ކުންފުނި ގަންނަން ޖެހޭނެތޯ ނިންމާނީ ކޯޓުންނެވެ.
