އެމެރިކާގައި ރޭޕިސްޓް މަރާލި ފުރާވަރު އުމުރުން ކުއްޖަކު 150،000 ޑޮލަރުން ޖޫރިމަނާކޮށް، ފަސް އަހަރުގެ ޕްރޮބޭޝަނަށް އަޔޯވާ ސްޓޭޓުގެ ކޯޓަކުން ހުކުމްކޮށްފި އެވެ.
އުމުރުން 17 އަހަރުގެ ޕީޕާ ލުވިސްގެ މައްޗަށް ހުކުމްކުރީ އޭނާ ރޭޕްކުރި ޒަކަރީ ބްރުކްސްގެ އާއިލާއަށް 150،000 އެމެރިކާ ޑޮލަރު ދިނުމަށެވެ.
ޕީޕާގެ އުމުރުން 15 އަހަރުގައި އޭނާ ރޭޕްކުރި ޒަކަރީގެ ގަޔަށް ވަޅި ހަރައި މަރާލީ 2020 ވަނަ އަހަރު އެވެ. މިދިޔަ އަހަރު އޭނާ ވަނީ ކޯޓުގައި އިއުތިރާފްވެފަ އެވެ.
އޭނާއަށް ކުރި ދަައުވާތަކަށް 20 އަހަަރުގެ ޖަލު ހުކުމެއްވެ އެވެ. އެހެން ނަމަވެސް، ކޯޓުން ކުރީ ފަސް އަހަރުގެ ޕްރޮބޭޝަން ހުކުމެކެވެ. އެ މުއްދަތުގައި ޕްރޮބޭޝަންގެ އުސޫލްތަކާ ހިލާފުވެއްޖެނަމަ 20 އަހަރުގެ ޖަލު ހުކުމެއް އައުން އެކަށީގެންވެ އެވެ.
ޕްރޮބޭޝަން އުސޫލްތަކުގެ ދަށުން ޕީޕާ އުޅެން ޖެހޭނީ ހާއްސަ ރެޒިޑެންޝަލް ފެސިލިޓީއެއްގައި ކަމަށާއި ފައިގައި ޓެގް ހަރުކުރަން ޖެހޭނެ ކަމަށް ކޯޓުން އެންގި އެވެ.
ރޭޕިސްޓުގެ އާއިލާއަށް ފައިސާ ދައްކަން އަމުރު ކުރީ މަޖުބޫރުވެގެން ކަމަށާއި އަޔޯވާގެ ގާނޫނުގެ ދަށުން އެ ނޫން ގޮތެއް ނެތްކަމަށް ކޯޓުން ބުންޏެވެ.
ރިޕޯޓުތައް ބުނާ ގޮތުން ޕީޕާ ލުވިސް ކުޑަައިރުން ފެށިގެން ގެވެށި އަަނިޔާއާ ކުރިމަތިވި އެވެ. އޭނާ 2020 ވަނަ އަހަރު ގެއިން ފިލައި، ގޯޅިގަނޑެއްގައި ނިދާފައި އޮއްވައި ފިރިހެނަކާ ދިމާވި އެވެ.
އެ ފިރިހެން މީހާ ޕީޕާ ގެންގޮސް، ހަށިވިއްކަން މަޖުބޫރު ކުރުވި އެވެ. ޕީޕާ ބުނީ ޒަކަރީ ނަމަކަށް ކިޔާ އުމުރުން 37 އަހަރުގެ ފިރިހެނަކު ތަކުރާރުކޮށް އޭނާ ރޭޕްކުރި ކަމަށެވެ.
ޕީޕާ ވަނީ 2020 ވަނަ އަހަރުގެ ޖުލައި މަހު ޒަކަރީގެ ގަޔަށް 30 ފަހަރު ވަޅި ހަރައި މަރާލައިފަ އެވެ. އޭނާ ބުނީ އެކަން ކުރީ އަމިއްލަ ފުރާނައަށް ބިރުން ކަމަށެވެ.
