ރައްޔިތުންގެ މަޖިލީހުގެ މެމްބަރުންގެ އަދަދު، ރާއްޖޭގެ އާބާދީއަށް އަންނަ ބަދަލާ ގުޅުވައި އިތުރުނުކޮށް، މިހާރު އޮތް އަދަދުގައި ހިފަހައްޓަން، ގާނޫނު އަސާސީއަށް ބަދަލު ގެންނަން ޖުމްހޫރީ ޕާޓީގެ ލީޑަރު ގާސިމް އިބްރާހީމް ބިލެއް ހުށަހެޅުއްވުމުން ކާށިދޫ ދާއިރާގެ މެމްބަރު އަބްދުﷲ ޖާބިރު އޭނާއަށް މިއަދު ތުހުމަތުތަކެއް ކުރައްވައިފި އެވެ.
ގާނޫނު އަސާސީއަށް ބަދަލު ގެނެސް، މެމްބަރުންގެ އަދަދު މިހާރު އޮތް ވަރުގައި ހިފަހައްޓަން ގާސިމް ހުށަހެޅުއްވި ބިލަށް ރައްޔިތުންގެ މަޖިލީހުގެ މިއަދުގެ ޖަލްސާގައި މިހާރު ކުރިއަށްދާ ބަހުސްގައި ޖާބިރު ވިދާޅުވީ މެމްބަރުންގެ އަދަދު ވަކި ވަރެއްގައި ހިފަހައްޓަން ބިލެއް ހުށަހެޅުއްވި އިރު މަޖިލީހުގައި މާމިނގިލި ދާއިރާ މިހާރު ވެސް ތަމްސީލުނުވާ ކަމަށެވެ.
ބިލު ހުށަހެޅުއްވީ ގާސިމް ތަމްސީލުކުރައްވާ އެ ދާއިރާއަށް ގޮނޑިއެއް އިތުރުވެދާނެތީ ކަމަށް ވެސް ޖާބިރު ތުހުމަތު ކުރެއްވި އެވެ.
ކާށިދޫ ދާއިރާގެ މެމްބަރު އަބްދުﷲ ޖާބިރު ރަސްމިއްޔާތެއްގައި ބައިވެރުވެވަޑައިގަންނަވަނީ. މާމިނިގިލި ދާއިރާގެ މެމްބަރު ގާސިމް އިބްރާހީމަށް އޭނާ މިއަދު ވަރަށް ބޮޑަށް ފާޑުވިދާޅުވި. ފޮޓޯ: މުހައްމަދު ޝާބިން/އަދަދު
"އަޑުގަނޑު ގަބޫލެއް ނޫން ދިވެހިރާއްޖޭގެ ޑިމޮކްރަސީ ފަހަތަށް ދާކަށެއް. ގާސިމް އިބްރާހީމް މި މައްސަލަ ހުށަހެޅުއްވި އިރު އިއްޒަތްތެރި މެމްބަރު މި މަޖިލީހަށް ވަޑައިނުގެން، އަދި މަޖިލީހަށް ދެން އަންނާން ޖެހޭ މީހާއަށް ވެސް ނާދެވޭ ގޮތަށް އޮންނަ [މިބިލުން ފުރުސަތު އެބަ ހަނިކުރޭ]،" ޖާބިރު ވިދާޅުވި އެވެ.
އޭނާ ވިދާޅުވީ މިހާރުވެސް މަޖިލީހުގައި 87 މެމްބަރުން ތިބި އިރު މަޖިލީހަށް ވަޑައިގަންނަވަނީ މަދު މެމްބަރުން ކަމަށް ވާތީ މަޖިލީހުގައި ދާއިރާތައް ތަމްސީލު ނުވާ ކަމަށެވެ. މަޖިލީހުގެ ޖަލްސާތަކަށް ވަރަށް މަދުން ނޫނީ ވަޑައިނުގަންނަވާ ގާސިމް ތަމްސީލުކުރައްވާ މާމިނގިލި ދާއިރާއާއި އޭނާއަށް ވުރެ ވެސް މަދުން ޖަލްސާތަކަށް ވަޑައިގަންނަވާ އަހުމަދު ސިޔާމް ތަމްސީލުކުރައްވާ މީދޫ ދާއިރާގެ ނަން މިސާލެއްގެ ގޮތުގައި ޖާބިރު ދެއްކެވި އެވެ.
"މާމިނގިލި ދާއިރާ ރެޕްރެޒެންޓް ނުވެ މިދިޔައީ. މީދޫ ދާއިރާ ރެެޕްރެޒެންޓް ނުވެ މިދިޔައީ އިއްޒަތްތެރި ރައީސް،" ޖާބިރު ވިދާޅުވި އެވެ.
އޭނާ ވިދާޅުވީ ރާއްޖޭގެ އާބާދީ އިތުރުވާނެ ކަމަށާއި އެ އިތުރުވާ އާބާދީ ރައްޔިތުންގެ މަޖިލީހުގައި ތަމްސީލުވާން ޖެހޭ ކަމަށެވެ. މެމްބަރުން މަދުކުރަން އުޅެނީ މެމްބަރުން ގަންނަން ޖެހޭ ވަގުތެއްގައި އަދަދު ގިނަވުމުން އުނދަގޫވާނެތީ ކަމަށް ވެސް އޭނާ ތުހުމަތުކުރެއްވި އެވެ.
