ގދ. މަޑަވެލި އަދި ހޯޑެއްދޫ ގުޅާލުމަކީ އެ ދެ ރަށުގެ ރައްޔިތުން ނުހަނު ބޭނުންވެފައި ތިބި ކަމެވެ. ދެހާސް ސަތާރަ ވަނަ އަހަރު އެ އުއްމީދު ފުރިހަމަ ވީ, ދެ ރަށުގެ މެދުގައި ދަމާލި ކޯޒްވޭއާ އެކު އެވެ. ނަމަވެސް، އުއްމީދު ކުރި ގޮތާ ހިލާފަށް ކޯޒްވޭ ވެގެން ދިޔައީ ވީ ފަސޭހަ އާއި އުފެދުނު ގުޅުމަށް ވުރެ ދެ ރަށަށް ވެސް ތަކުލީފަށެވެ.
ތަކުލީފަކަށް ވެގެންދިޔައީ މިހެންވެ އެވެ؛ ކޯޒްވޭ ހެދުމަށް ފަޅުތެރެއިން ދަމާލި ފަސްގަނޑު، އެ ރަށުގެ ގުދުރަތީ ފަސްގަނޑަށް ވުރެ އުހެވެ. އެއީ މަޝްރޫއުގެ އީއައިއޭ ރިޕޯޓާއި, ކޯޒްވޭގެ ޑައިޒައިންއާ ވެސް ހިލާފަށް ކޮށްފައި އޮތް ކަމެވެ.
"...ޑިޒައިންއާ އެއްގޮތަށް ކޯޒްވޭ އަޅާފައި ނެތުމުގެ ސަބަބުން ދިޔަވަރު ބޮޑުވާ ކޮންމެ ފަހަރަކު ރަށު ތެރެއަށް އެބަ ރާޅު އަރާ, އުދަ އެރުން ގިނަ ވެއްޖެ, ކޯޒްވޭއަކު ނެތް އޮއިވަރު ދެމޭހާ ޖާގައެއް," ހޯޑެއްދޫ ކައުންސިލްގެ ރައީސް ހުސެއިން ވާރިޝް ވިދާޅުވި އެވެ.
ވާރިޝް ވިދާޅުވި ގޮތުގައި, ކޯޒްވޭ އެޅި ފަހުން އެ ރަށުގެ ހަތް ހެކްޓަރުގެ ބިން, ބޭނުމެއް ނުކުރެވި ވަނީ ގެއްލިގެން ގޮސްފަ އެވެ. އެއީ, ކޯޒްވޭއާ ގުޅިގެން ބްލޮކްވާ ލޮނުގަނޑު އެ ސަރަހައްދަށް އަރައި, އަނެއް ފަރާތަށް ފައިބައިގެންދާތީ, އެ ބިމުގައި އެހެން އެއްވެސް ކަމެއް ކުރެވޭ ގޮތް ނުވާތީ އެވެ.
ގަދަ އަށް އުދަ އަރާ މޫސުމެއްގައި ރައްޔިތުން ނުކުމެ ކޯޒްވޭ ކަނޑާލަން ޖެހޭ ސަބަބަކީ ވެސް އެއީ ކަމަށް ވާރިޝް ވިދާޅުވި އެވެ.
ކޯޒްވޭ މިހާރު އޮތް ގޮތުން އުނދަގޫތަކާއި ގެއްލުންތައް ހުރި ނަމަވެސް، އެ ކޯޒްވޭގެ ސަބަބުން ހޯޑެއްދޫ އާއި މަޑަވެއްޔާ ދެމެދު އުފެދުނު ގުޅުމާއި ބަދަހިކަން ވަނީ ވަކި ނުކުރެވޭނެ ވަރުގަދަ ގުޅުމަކަށްވެފަ އެވެ. އުޅުމާއި ގުޅުން ވަނީ އެކުވެ އެކައްޗަކަށް ވެފަ އެވެ. އެހެންވެ، ފުރިހަމަ ކޯޒްވޭއެއް މުހިންމު ކަމަށް ކައުންސިލްގެ ރައީސް ފާހަގަ ކުރެއްވެވި އެވެ.
ދެ ރަށުގެ ގުޅުން އެބަ ބޭނުންވޭ, ހޯޑެއްދޫ މީހުން އެ އުޅެނީ މަޑެވެލި މީހުންނާ އިނދެގެން, އެ ރަށު މީހުން އެ އުޅެނީ ހޯޑެއްދޫ މީހުންނާ އިނދެގެން, ވަޒީފާގައި ދެކޮޅުގައި އެބަ އުޅޭ, ހޯޑެއްދޫއަކީ ދަނޑުވެރި ރަށެއް, މަޑަވެއްޔަކީ މަސްވެރި ރަށެއް, ހޯޑެއްދޫ މަސްވެރިން މަހަށް އެ ދަނީ މަޑަވެލީ މަސްދޯނިތަކުގައި, އެހެންވީމަ ޓްރާންސްޕޯޓޭޝަން މުހިންމޭ," ވާރިޝް ވިދާޅުވި އެވެ.
އެހެންވެ, މި ސަރުކާރުން ވެސް ވަނީ ދެ ރަށުގެ ދެމެދުގައި އާ ކޯޒްވޭއެއް އެޅުމުގެ މަޝްރޫއު އިއުލާންކޮށް, އެމްޓީސީސީއާ ހަވާލުކޮށްފަ އެވެ. އައްޑިހަ ނުވަ މިލިއަން ރުފިޔާގެ އެ މަޝްރޫއުއަށް ހޯޑެއްދޫއަށް މޮބަލައިޒްވުމުގެ މަސައްކަތް ކުރިއަށް އޮތް ދެތިން ދުވަހެއްގެ ތެރޭ ކުރާނެ އެވެ.
"އާ ކޯޒްވޭ އަޅަން ނިންމާފައި އޮތް ގޮތަށް އެކަން ކޮށްފިނަމަ, ކުރީގެ ކޯޒްވޭގެ ސަބަބުން މި ދިމާވާ މައްސަލަ އެއްކޮށް ހައްލުވެގެން ދާނެ," ވާރިޝް ވިދާޅުވި އެވެ.
އާ ކޯޒްވޭ އަޅަން ނިންމާފައިވަނީ ދަށުން ލޮނުގަނޑު ދައުރުވާ ގޮތަށެވެ. އެ ކޯޒްވޭއިން ހޯޑެއްދޫ އާއި މަޑަވެއްޔާ ދެމެދު އޮތް ފަޅު ރަށްތައް ވެސް ގުޅާލާނެ އެވެ. އޭގެ ތެރޭ ހޯޑެއްދޫގެ އިހްތިސޯސް ތެރޭ އޮތް ރަށަކާއި ދެ ރަށުގެ އިހްތިސޯސް ތެރެއަށް ވަންނާތީ ސަރުކާރަށް ނަގާފައި އޮތް ރަށެއް ހިމެނެ އެވެ.
