ރެޑްބުލް ހާފް ކޯޓު ތުރީ އޮން ތުރީގެ ރާއްޖޭގެ ކޮލިފައިން މިއަދު ފަށައިފި އެވެ.
ރެޑްބުލް ހާފް ކޯޓަކީ ތުރީ އޮން ތުރީގެ ދުނިޔޭގެ ޗެމްޕިއަނުން ވާދަކުރާ ފޯރިގަދަ މުބާރާތެކެވެ. ކުރިން "ރެޑްބުލް ރީން"ގެ ނަމުގައި ކުރިއަށްދިޔަ މުބާރާތް "ރެޑްބުލް ހާފް ކޯޓު"ގެ ނަމަށް ބަދަލުކޮށް ފުރަތަމަ ބާއްވާފައިވަނީ މިދިޔަ އަހަރެވެ.
ރެޑްބުލް ހާފް ކޯޓުގައި ހިމެނެނީ ކޮލިފައިން ބުރާއި ހުރިހާ ގައުމެއްގެ ޗެމްޕިއަނުން ވާދަކުރާ ވޯލްޑް ފައިނަލް ބުރެވެ. ކޮންމެ ގައުމަކުން ވެސް ކޮލިފައިން ބުރެއް ބޭނުން އަދަދެއްގެ ޓީމުތަކެއް ހިމަނައިގެން ކުރިއަށް ގެންދެވޭނެ އެވެ.
މިއަދު މާލޭ ޒުވާނުންގެ މަރުކަޒުގެ އެތެރޭ ކޯޓުގައި ފަށާފައިވާ ރާއްޖޭގެ ކޮލިފައިންގައި 16 ޓީމަކުން ވާދަކުރެ އެވެ. މި ފަހަރު ރާއްޖޭގެ ކޮލިފައިންގައި ވާދަކުރަނީ ފިރިހެން ޓީމުތައް އެކަންޏެވެ.
ރެޑްބުލް ހާފްކޯޓު ތުރީ އޮން ތުރީގައި މިއަދު ކުރިއަށްދިޔަ މެޗެއްގެ ތެރެއިން.--- ފޮޓޯ: އަބްދުﷲ އަބީދު/ ރެޑްބުލް
މި މަހުގެ ފަހުކޮޅު މާލޭގައި އޮންނަ ސާބާ މުބާރާތަށް ގައުމީ ގައުމީ އަންހެން ބާސްކެޓްބޯޅަ ޓީމު ތައްޔާރު ވަމުން ދާތީ މި އަހަރު އަންހެން ބައި ނުހިމަނަން ނިންމީ ކަމަށް މުބާރާތް އިންތިޒާމްކުރާ ޔޫރޯ މާކެޓިން އިން މައުލޫމާތު ދެ އެވެ.
ރާއްޖޭގެ ކޮލިފައިންގެ ޕާޓްނަރަކީ މޯލްޑިވްސް ބާސްކެޓްބޯލް އެސޯސިއޭޝަން އެވެ.
ރާއްޖެ ހިމެނޭ ގޮތަށް މި އަހަރު 20 ގައުމަކުން ވާދަކުރާނެ އެވެ. އެ ގޮތުން، 20 ގައުމުގެ ޗެމްޕިއަނުން ވާދަކުރާ ފައިނަލް ބުރު އޮންނާނީ މި މަހުގެ 28 އިން އޮކްޓޯބަރު 2 އަށް މިސްރު ގަ އެވެ.
ރެޑްބުލް ހާފް ކޯޓުގެ މިދިޔަ އަހަރުގެ މުބާރާތުގައި 13 ގައުމަކުން ފަސް ހާހަށް ވުރެ ގިނަ ކުޅުންތެރިން ވާދަކުރި އެވެ. މި ދިޔަ އަހަރުގެ ފައިނަލް ބުރުގެ އޮތީ އިޓަލީގެ ވެރިރަށް ރޯމްގަ އެވެ. މިދިޔަ އަހަރުގެ ޗެމްޕިއަންކަން ހޯދީ ދުނިޔޭގެ ތުރީ އޮން ތުރީގެ ލެޖެންޑު ޑުސާން ބުލުޓް ހިމެނުނު ސާބިއާގެ ޓީމެވެ.
