އަތޮޅުތެރޭގައި ދުއްވާ ވެހިކަލްތަކުން ނަގާ ފީ ރަށު ކައުންސިލްތަކަށް ލިބޭގޮތް ހަމަޖެއްސުމަށް ބޭނުންވާ މައުލޫމާތުތައް، މިހާތަނަށް 107 ކައުންސިލަކުން އެއްކޮށްފައިވާ ކަމަށް ލޯކަލް ގަވަމަންޓް އޮތޯރިޓީ (އެލްޖީއޭ)ގެ ސީއީއޯ އަފްޝަން ލަތީފް ވިދާޅުވެއްޖެ އެވެ.
ދެކުނުގެ ހުރިހާ ރަށަކަށް އަމާޒުކޮށްގެން ވިއަވަތި ރާއްޖެ ކޮންފަރެންސް ހުޅުވުމުގެ ރަސްމިއްޔާތުގައި ވާހަކަ ދައްކަވަމުން އަފްޝަން ވިދާޅުވީ ވެހިކަލްތަކުން ނެގޭ ފީ ކައުންސިލުތަކަށް ލިބިގެންދާނެ ގޮތެއް އަވަހަށް ހަމަޖެހިގެން ދިއުން މުހިންމު ކަމަށް ނިމިދިޔަ ފަނޯއްލަ ދަރުބާރުގައި ކައުންސިލަރުން ފާހަގަކުރައްވާފައިވާ ކަމަށެވެ.
އަދި އެކަން ކުރުމަށް ބޭނުންވާ ވެހިކަލްތަކާ ގުޅޭ މައުލޫމާތު 107 ކައުންސިލްތަކުން އެއްކޮށް، ޓްރާންސްޕޯޓް މިނިސްޓްރީއާ ހިއްސާ ކޮށްފައިވާކަމަށް އަފްޝަން ވިދާޅުވި އެވެ.
އަފްޝަން ވިދާޅުވީ އެލްޖީއޭއަކީ ކައުންސިލްތަކުގެ ބެލެނިވެރި ފަރާތްކަމުގައި ސިފަކުރުމަކީ ރަނގަޅު ގޮތެއް ނޫން ކަމަށެވެ.
އެއީ އަޅުގަނޑަށް އެހާ ހިތްގައިމު ބަހެއް ނޫން. ބެލެނިވެރިން ތިބޭނީ ކުޑަކުދިންގެ ނުވަތަ އަމިއްލައަށް ގޮތް ނިންމަން ދަތި ފަރާތްތަކުގެ. ގާނޫނުން އެލްޖީއޭ މަތިކޮށްފައިވަނީ ކައުންސިލްތަކުގެ ޒިންމާ އަދާކުރޭތޯ ބަލާ، އެހީތެރިކަން ފޯރުކޮށްދިނުމަށް
އޭނާ ވިދާޅުވީ ކައުންސިލުތަކުން އެލްޖީއޭއާމެދު ދެކޭގޮތް ބަދަލުވުން މުހިންމު ކަމަށެވެ. އެލްޖީއޭއަކީ ކައުންސިލްތަކުގެ އެކުވެރިއެއް އަދި އެހީތެރިއެއްކަން ފާހަގަކުރައްވަމުން އަފްޝަން ވިދާޅުވީ އެ އޮތޯރިޓީގެ އެންމެ އިސް ޒިންމާއަކީ އެ ގުޅުން ދަމަހައްޓާ، ލާމަރުކަޒީ ނިޒާމަށް މަސައްކަތް ކުރުން ކަމަށެވެ.
އެ މޭރުމުން ވާހަކަދައްކަވަމުން އޭނާ ވިދާޅުވީ މިއަހަރުގެ މިހާތަނަށް އަށް ކައުންސިލެއްގެ މޮނިޓަރިން ރިޕޯޓު ނިމި، މިމަސް ތެރޭ އިތުރު ދެ މޮނިޓަރިންއެއް ކުރިއަށް ގެންދިއުމަށް ރޭވިފައިވާ ކަމަށެވެ. އަދި އަތޮޅު ކައުންސިލްތަކުން، ރަށު ކައުންސިލްތައް މޮނިޓަ ކުރާނެ މެނުއަލްއެއް ވެސް އެކުލަވާފައިވާ ކަމަށް އޭނާ ވިދާޅުވި އެވެ.
ނަމަވެސް އެލްޖީއޭގެ މަގުސަދަކީ ކައުންސިލްތައް ކުށްވެރިކުރުން ނޫން ކަން ފާހަގަކުރައްވައި އަފްޝަން ވިދާޅުވީ އެލްޖީއޭ ވާންވާނީ ގޯހުން ކަމެއް ދާނަމަ އެކަން ރަނގަޅު ކުރަން އިރުޝާދުދޭ އެކުވެރިއަކަށް ކަމަށެވެ.
ރަސްމިއްޔާތުގައި ވާހަކަދައްކަވަމުން އަފްޝަން ވަނީ ފަނޯއްލަ ދަރުބާރުގައި މަޝްވަރާ ކުރި ކަންތައްތަކަށް އަލިއަޅުއްވާލާފަ އެވެ. އެގޮތުން ފިސްކަލް ފޯމިއުލާއަށް ގެންނަން ޖެހޭ ބަދަލުތަކާއި، އިހުތިސޯސްގައި ހިމެނޭ ރަށްތަކާއި، އިހުތިސޯސްގައި ރަށެއް ނުހިމެނޭ ރަށްރަށުގެ ވާހަކައާއި، އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ދައުރުގެ ބައްޓަންކުރަންވީ ގޮތުގެ އިތުރަށް އެ ކޮމިޓީގެ މެންބަރުން އިސްތިއުފާ ދިނުން މަދުކުރުން ފަދަ ކަންކަމާމެދު ތަފާތު ހިޔާލުތަކާއި، ތަފާތު ވިސްނުންތަކާއެކު މަޝްވަރާ ކުރެވުނުކަން އޭނާ ފާހަގަކުރެއްވި އެވެ.
