ދައުލަތުގެ ދަރަނި ދެއްކުމުގެ ބުރަ ކުޑަކުރަން އުފައްދާފައިވާ ސޮވަރިން ޑިވެލޮޕްމަންޓު ފަންޑުގައި ރައްކާކޮށްފައި ހުރި ފައިސާގެ އަދަދު 4.9 ބިލިއަން ރުފިޔާއަށް އިތުރުވެފައިވާ ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފި އެވެ.
ސަރުކާރުގެ މާލީ ހާލަތު ބަޔާންކޮށް ފިނޭންސުން ނެރުނު ވީކްލީ ފިސްކަލް ޑިވެލޮޕްމަންޓްސް ރިޕޯޓުން ދައްކާ ގޮތުގައި މި އަހަރުގެ މިހާތަނަށް އެ ފަންޑަށް 514.8 މިލިއަން ރުފިޔާ ޖަމާކޮށްފި އެވެ. އަދި އެކި ބޭނުންތަކަށް އިންވެސްޓުކުރަން ފަންޑުން ނަގާފައިވާ ފައިސާ އުނިކުރުމުން ބޭންކު ބެލެންސްގައި 1.5 ބިލިއަން ރުފިޔާ (100 މިލިއަން ޑޮލަރު) އެބަހުއްޓެވެ.
ސަރުކާރުގެ ބަޖެޓުކޮށްފައިވާ އަދަދުތަކަށް ބަލާއިރު، ސޮވްރިން ފަންޑަށް ޖަމާކުރަން ބަޖެޓުކޮށްފައިވާ 769.2 މިލިއަން ރުފިޔާ ޖަމާކޮށްފި ނަމަ މި އަހަރުގެ ނިޔަލަށް މި ފަންޑުގައި ފަސް ބިލިއަން ރުފިޔާ ހުންނާނެ އެވެ. މިއީ ފަންޑަށް ފައިސާ ޖަމާކުރަން ފެށިތާ ފަސް އަހަރުގެ ތެރޭގައި ޖަމާކުރެވުނު ފައިސާ އެވެ.
ސޮވްރިން ޑިވެލޮޕްމަންޓް ފަންޑަށް ޖަމާކުރި ފައިސާ
- 2017 (އޮކްޓޫބަރުން ފެށިގެން) - 336.76 މިލިއަން ރުފިޔާ
- 2018 - 1.31 ބިލިއަން ރުފިޔާ
- 2019 - 1.38 ބިލިއަން ރުފިޔާ
- 2020 - 393.65 މިލިއަން ރުފިޔާ
- 2021 - 453.76 މިލިއަން ރުފިޔާ
- 2022 (މިހާތަނަށް) - 514.8 މިލިއަން ރުފިޔާ
ސޮވްރިން ޑިވެލޮޕްމަންޓް ފަންޑަށް ޖަމާކުރަނީ ޓޫރިސްޓުންގެ އަތުން ނަގާ އެއާޕޯޓު ޑިވެލޮޕްމަންޓް ފީ އެވެ. މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ރެކޯޑުތަކުން ދައްކާ ގޮތުގައި މި ފަންޑަށް އެންމެ ގިނައިން ފައިސާ ޖަމާކުރީ 2018 އަދި 2019 ވަނަ އަހަރު އެވެ. އެ ދެ އަހަރުގެ ތެރޭގައި އެކަނި އެ ފަންޑަށް 2.7 ބިލިއަން ރުފިޔާ ޖަމާކޮށްފައިވާއިރު، މިއީ މުޅި ފަންޑުގެ ދެބައިކުޅަ އެއް ބަޔަށް ވުރެ ބޮޑު އަދަދެކެވެ.
އެކަމަކު ކޮވިޑު ބަލިމަޑުކަމުގެ ތެރޭގައި ޓޫރިޒަމަށް އައި ލޮޅުމާ އެކީ މި ފަންޑަށް ޖަމާކުރާ ފައިސާގެ އަދަދު ވަރަށް ބޮޑަށް ހީނަރުވި އެވެ. އެގޮތުން 2020 އަދި 2021 ގައި ފަންޑަށް ޖަމާކުރެވުނީ ޖުމްލަ 847.4 މިލިއަން ރުފިޔާ އެވެ. މިއީ އޭގެ ކުރީ އަހަރުތަކުގައި ޖަމާކުރި ފައިސާގެ ނިސްބަތުން ވަރަށް ދަށް އަދަދެކެވެ.
މި ފަންޑުގައި ހުރި ފައިސާގެ ތެރެއިން ބޮޑު ބަޔެއް ސަރުކާރުން ވަނީ ބޭރު ގައުމުތަކާއި ރާއްޖޭގައި ވެސް އިންވެސްޓުކޮށްފަ އެވެ. ކޮވިޑު ބަލިމަޑުކަމުގެ ދުވަސްވަރުގައި ޓީ-ބިލްތަކެއް ގަންނަން ބޭނުންކޮށްފައިވާކަން ވެސް ވަނީ ހާމަވެފަ އެވެ. ނަމަވެސް ކޮށްފައިވާ އިންވެސްޓްމަންޓުތަކުގެ ތަފްސީލެއް ފިނޭންސް މިނިސްޓްރީން އާންމު ނުކުރެ އެވެ.
ސަރުކާރުން ވަނީ މި ފަންޑުގެ އެންމެހާ ބާރުތައް ރައީސުލްޖުމްހޫރިއްޔާއަށާއި ފިނޭންސް މިނިސްޓަރަށް ދޭން މާލިއްޔަތު ގާނޫނު އިސްލާހުކުރަން ރައްޔިތުންގެ މަޖިލީހަށް ބިލެއް ހުށަހަޅާފަ އެވެ. މި ބިލު އޮތް ގޮތަށް ފާސްވެއްޖެ ނަމަ އެ ފަންޑުން ހަރަދުކުރާނެ ގޮތް ނިންމާނީ ފިނޭންސް މިނިސްޓަރުގެ ލަފާގެ މަތިން ރައީސުލްޖުމްހޫރިއްޔާ އެވެ.
މިހާރު މި ފަންޑު ބެލެހެއްޓުމުގެ ކަންކަން ކުރަމުން އަންނަނީ ފިނޭންސް މިނިސްޓްރީއާ އެކީ ވެފައިވާ އެއްބަސްވުމެއްގެ ދަށުން އެމްއެމްއޭއިންނެވެ.
