ރާއްޖޭގެ ކަނޑުތަކުގެ 30 މީޓަރުން ފުނުގައިވާ ސިއްރުތައް ހޯދައި ދިރާސާކުރުމަށް ފުރަތަމަ ފަހަރަށް ދިވެހި ސަރުކާރާއި، އިނގިރޭސިވިލާތުގެ މެރިން ރިސާޗް އިންސްޓިޓިއުޓް ނެކްޓަން ގުޅިގެން ފަށާ 35 ދުވަހުގެ މިޝަން އިއްޔެ ލޯންޗުކޮށްފި އެވެ.
މި މިޝަންގައި ދިވެހި 10 ސައިންޓިސްޓުންނާއި، ބޭރުގެ ސައިންޓިސްޓުން ހިމެނޭ ޓީމުން، ކުރިއަށް މި އޮތް 35 ދުވަހުގެ ތެރޭގައި ވ. އަތޮޅުން ފެށިގެން ދެކުނުގެ ކަނޑުތަކުގެ އެކި ސަރަހައްދުތަކުގައި ހައި-ޓެކް ދެ ސަބްމާސިބަލްސް އާއެކު ޑޭޓާ ނެގުމުގެ މަސައްކަތް ކުރާނެ އެވެ. - މި ދެ ހައި-ޓެކް ސަބްމެރިންގެ ތެރެއިން އެއް ސަބްމާސިބަލްސް ގައި 1000 މީޓަރު ފުނަށް ދެވޭނެ އެވެ.
"ރާއްްޖޭގެ ކަނޑުތަކުގެ ދިރުންތަކާ ބެހޭގޮތުން މިހާރު ލިބިފައިވާ މައުލޫމާތަކީ ޑައިވްކޮށްގެން ދެވޭ ހިސާބުން ލިބިފައިވާ މައުލޫމާތު. މިހާރު އެއަށްވުރެ ފުނަށް އެއްހާސް މީޓަރާ ހިސާބުން ޑޭޓާތަކެއް ކަލެކްޓް ކުރުން މީގެ ބޭނުމަކީ،" މިޝަންގެ ރާއްޖޭގެ ޓީމުގެ ލީޑަރު ޝާފިޔާ ނައީމް ވިދާޅުވި އެވެ - ޝާފިޔާ އަކީ، މިވަގުތު މޯލްޑިވްސް މެރިން ރިސާޗް އިންސްޓިޓިއުޓްގެ ޑިރެކްޓާ ޖެނަރަލެވެ. އޭނާ ވަނީ އެކުއަކަލްޗާ (ކަނޑުގެ މާހައުލުގެ ދިރުން ދިރުވައި އާލާކުރުން) ރޮނގުން މަތީ ތައުލީމު ހާސިލުކުރައްވައިފަ އެވެ.
ޝާފިޔާ ވިދާޅުވީ، ސަބްމާސިބަލް އެއްގައި ކެޕްޓަން އަކާއި އިތުރު ދެ ސައިންޓިސްޓުން ނުވަތަ އެކުއަނަޓުން ތިބެގެން ކުރާ ދަތުރުތަކުގައި އެންމެ ތިލައިން ފެށިގެން 1000 މީޓަރާ ހިސާބަށް ހުރި އެއްޗެހި ޑޮކިއުމަންޓް ކުރުމުގެ މަސައްކަތްކުރާނެ ކަމަށެވެ.
"ރާއްޖެއަކީ 99 ޕަސެންޓް ކަނޑުތަކަށް ވެފައި، އަދި އެނގެނީ ވަރަށް ކުޑަ މިންވަރެއް. މާހައުލަކީ ފުދޭ ވަރަކަށް ބޮޑަށް ގުޅި، ލާމެހިފައިވާ އެއްޗެއް. އެހެންވީމަ، ކަނޑު އަޑީގެ ބައޯ ޑައިވާސިޓީ ނުވަތަ ދިރުންތައް ހުރި ގޮތާ ބެހޭގޮތުން ނެގޭ މައުލޫމާތުތަކަކީ ވަރަށް ފުޅާ ދާއިރާއެއްގައި ބޭނުންކުރެވޭނެ މައުލޫމާތުތަކެއް،" އޭނާ ވިދާޅުވި އެވެ.
ތިރީސް ފަސް ދުވަހުގެ މި އެކްސްޕެޑިޝަންގައި ބައިވެރިވާ ސައިންޓިސްޓުންގެ ޓީމުގައި ދިވެހި 10 ބޭފުޅުންގެ އިތުރަށް، ޔޫކޭ، އިންޑިއާ، ސައުތު އެފްރިކާގެ މެރިން ތަޖުރިބާކާރުން ހިމެނެ އެވެ. މި ޓީމު ގޮވައިގެން އާރުވީ އޮޑީސީ ނަމަކަށް ކިޔާ އެކްސްޕެޑިޝަން ބޯޓުގައި ކަނޑައަޅާފައިވާ ކަނޑުގެ ސަރަހައްދުތަކުގައި ޑޭޓާ ކަލެޓް ކުރުމަށް ދުއްވާނެ އެވެ. އަދި މި އުޅަނދުގެ ދެ ސަބްމާސިބަލް، ޑައިވްތަކުގައި ބޭނުންކުރާނެ އެވެ. ކޮންމެ ސަބްމާސިބަލް އެއްގައި ކެޕްޓަންގެ އިތުރުން ތިބެވޭނީ ދެ ސައިންޓިސްޓުންނަށެވެ.
މި ދެ ސަބްމާސިބަލްސްގެ ތެރެއިން އާ އުޅަނދު، އާރްއީވީ އޯޝަންް-އޯންޑް އޯރެލިއާ އަކީ މިވަގުތު ދުނިޔޭގައި އޮތް މިފަދަ އެންމެ ތަރައްގީ ސަބްމާސިބަލްސްގެ ސެޓްފިކްޓް ލިބިފައިވާ އުޅަނދެކެވެ. 1000 މީޓަރަށް ދާނީ މި ސަބްމާސިބަލް ގަ އެވެ. ދެން އޮތް ސަބްމާސިބަލް ގައި އެކްސްޕްލޯ ކުރާނީ 30 މީޓަރުން ފެށިގެން 500 މީޓަރާ ދެމެދެވެ.
މި މިޝަން އިއްޔެ ލޯންޗުކުރިޔަސް، އަދި ޑައިވްތައް ފަށާފައެއް ނުވެ އެވެ. މިހާރު ކުރިއަށް ދަނީ ސަބްމެރިންތަކުގައި ކަނޑުގެ އަޑިއަށް ފީނުމުގެ ކުރިން ކުރަންޖެހޭ މަސައްކަތްތަކާއި ވާންޖެހޭ ތައްޔާރީތައް ކަމަށް ވެސް ޝާފިޔާ ވިދާޅުވި އެވެ.
