ސައުދީ އަރަބިއްޔާއިން އިންޓަނޭޝަަނަލް އެޓޮމިކް އެނާޖީ އެޖެންސީ (އައިއޭއީއޭ) އަށް 3.5 މިލިއަަން ޑޮލަރުގެ އެހީއެއް ފޯރުކޮށްދީފި އެވެ.
އޭގެ ތެރެއިން 2.5 މިލިއަން ޑޮލަރު ކަނޑައަޅާފަައި ވަނީ އޮސްޓްރިއާގައި ހުންނަ އައިއޭއީއޭގެ ލެބޯޓަރީތަކުގެ ފެންވަރު ރަނގަޅު ކުރުމަށެވެ.
އޭގެ އިތުރުން ނިޔުކްލިއާ ޓެކްނޮލޮޖީގެ ފައިދާ އެންމެ ރަނގަޅު ގޮތުގައި ހިފޭނެ ގޮތް ހެދުމަށް އައިއޭއީއޭގެ ގަވާއިދުތައް ވަރުގަދަ ކުރަން ވެސް ހޭދަކުރާނެ އެވެ.
އައިއޭއީއޭގެ މެމްބަރު ގައުމުތަކުން ރައްކާތެރިކަމާ އެކު ނިޔުކްލިއާ ޓެކްނޮލޮޖީ ބޭނުން ކުރުން ފަހިކުރުމަށް ވެސް އެ ފަންޑުގެ ބަޔެއް ކަނޑައަޅާނެ އެވެ.
ޖަނަވާރުތަކުގެ ޒަރިއްޔާއިން އިންސާނުންނަށް ޖެހޭ ބަލިތަކާ ދެކޮޅަށް ނިޔުކްލިއާ ޓެކްނޮލޮޖީ ބޭނުން ކުރުމުގެ މަސައްކަތަށް ވެސް އެއް މިލިއަން ޑޮލަރު ހަމަޖައްސާފައިވެ އެވެ.
ސައުދީ އަރަބިއްޔާއިން އައިއޭއީއޭއަށް ފައިސާގެ އެހީ ފޯރުކޮށްދީފައިވާ އިރު، އދ. ގެ އެޖެންސީން މި ވަގުތު ދަނީ އިރާނުގެ ސައިޓުތަކުން މުއްސަނދިކޮށްފައިވާ ޔުރޭނިއަމްގެ އަސަރު ފެނުނު މައްސަލަ ތަހުގީގު ކުރަމުންނެވެ.
މިދިޔަ ހަފްތާގައި އިރާނުގެ ފޮރިން މިނިސްޓަރު ވިދާޅުވީ ނިޔުކްލިއާ އެއްބަސްވުމާ ގުޅޭ މަޝްވަރާ ކުރިއަށް ދާތީ އެ ތަހުގީގު ހުއްޓާލަން ޖެހޭ ކަމަށެވެ.
ރައްދުގައި މިދިޔަ ހުކުރު ދުވަަހު އެމެރިކާއިން ބުނީ ތަހުގީގު ހުއްޓާލުމަކީ ނިޔުކްލިއާ އެއްބަަސްވުމަކަށް ދިޔުމުގެ ކުރިން ކުރާ ޝަރުތަކަށް ހަދައިގެން ނުވާނެ ކަމަށެވެ.
