ބްރިޖު މަސައްކަތްކުރާ ޕްލެޓްފޯމު ފަރަށް އަރައި ހިނގި ހާދިސާގައި އެ ސަރަހައްދަށް އެޅިފައި ހުރި ތަކެތި ނަގައި، ސާފުކޮށް ނިންމާފައިވާ ކަމަށް ބްރިޖު އެޅުމުގެ މަސައްކަތްކުރާ އެފްކޮންސް ކުންފުނިން ބުނެފި އެވެ.
މާލެ-ތިލަފުށި ބްރިޖު މަސައްކަތުގައި ބޭނުންކުރާ "ސެލްފް އެލެވޭޓިން ޕްލެޓްފޯމް" އެއް ވިލިމާލޭ ފަރަށް އެރީ މީގެ ގާތްގަނޑަކަށް ދެ ހަފުތާއެއްހާ ދުވަސް ކުރިންނެވެ. ބްރިޖު މަސައްކަތްކުރާ ކޮންޓްރެކްޓަރު އެފްކޮންސްއާ ހަވާލާދީ ޕްލޭނިން މިނިސްޓްރީން ބުނީ ޕްލެޓްފޯމް ފަރަށް އެރީ އެންކަރަށް ދިމާވި މައްސަލައަކުން ކަމަށެވެ.
މި ޕްލެޓްފޯމް އެތަނުން ނެގޭ ވަރުވީ ހާދިސާ ހިނގިތާ 12 ދުވަސް ފަހުންނެވެ.
ޕްލެޓްފޯމް ނުނަގާ ލަސްވި މައްސަލައިގައި ތިމާވެށި ރައްކާތެރިކުރަން ގޮވާލާ ޖަމިއްޔާތަކުން ވަނީ ކަންބޮޑުވުން ފާޅުކޮށްފަ އެވެ. އެ ޖަމިއްޔާތަކުގެ މައިގަނޑު ކަންބޮޑުވުމަކަށްވީ ޕްލެޓްފޯމް ފަރުގައި އޮންނަހާ ހިނދަކު ފަރަށް ގެއްލުން ލިބެމުން ދިޔުމެވެ.
އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ)އިން މީގެ ކުރިން ބުނެފައިވަނީ ފަރަށް ލިބިފައި ހުރި ގެއްލުން ބެލޭނީ ޕްލެޓްފޯމުގެ ބާކީ ހުރި ބައިތައް ނަގާ ސާފުކުރުމުން ކަމަށެވެ.
މިކަމާ ގުޅިގެން އެފްކޮންސް އިން މިރޭ ބުނީ އެ ތަކެތި ނެގުމުގެ މަސައްކަތް މިދިޔަ މަހުގެ 28 ވަނަ ދުވަހުން ފެށިގެން ކޮށް، މޫސުން އެންމެ ތަން ނުދިންނަމަވެސް މިއަދު ހަވީރާ ހަމައަށް މުޅީން ނިމިފައިވާ ކަމަށެވެ.
ފަރަށް ލިބުނު ގެއްލުން ދިރާސާކުރުމަށް އީޕީއޭއިން ސާވޭ ހެދުމަށް މިހާރު ތައްޔާރުވެފައިވާ ކަމަށް ވެސް އެފްކޮންސް އިން ބުންޏެވެ.
ޕްލެޓްފޯމް ނެގުން ލަސްވެގެން ކުއްލި މައްސަލައެއްގެ ގޮތުގައި ރައްޔިތުންގެ މަޖިލީހަށް ވެސް ވެއްދި އެވެ. އެ މައްސަލަ މަޖިލީހަށް ހުށަހެޅުއްވީ ވިލިމާލެ ތަމްސީލުކުރައްވާ އެ ދާއިރާގެ މެންބަރު އަހުމަދު އުޝާމެވެ. އެކަމަކު އެ ދުވަހު އެ މައްސަލަ ވަނީ ތަޅުމުން ބޭރުކޮށްލާފަ އެވެ.
މި ފަރަށް ލިބުނު ގެއްލުން ވަޒަންކޮށް ކޮންޓްރެކްޓަރު ޖޫރިމަނާ ކުރުމުގެ ބާރު ލިބެނީ އީޕީއޭއަށެވެ.
ސޯޝަލް މީޑީއާގައި އާންމުކޮށްފައިވާ ފޮޓޯތަކާއި ވީޑިއޯތަކުން ފެންނަ ގޮތުގައި ޕްލެޓްފޯމް އުރުނު ސަރަހައްދުގެ ފަރުމަތީގައި ޕްލެޓްފޯމުގެ ފައިތަކުން ވަކިވެފައިވާ ހަތަރު ދަގަނޑު ހޮޅި އޮވެ އެވެ.
ސަރުކާރުން ރެކޯޑު ހޭދައެއް ކޮށްގެން ހިންގާ މާލެ-ތިލަފުށި ބްރިޖް މަޝްރޫއަކީ 500 މިލިއަން ޑޮލަރު (7.6 ބިލިއަން ރުފިޔާ)ގެ އަގުބޮޑު މަޝްރޫއެކެވެ. ސަރުކާރުގެ އިގުތިސޯދީ ތަސައްވުރާ ގުޅޭ މި މަޝްރޫއުގެ މަސައްކަތް ނިމުމުން ގްރޭޓާ މާލޭ ސަރަހައްދުގައި ހިމެނޭ ހުރިހާ ރަށްތަކެއް ގުޅާލެވޭނެ އެވެ.
މިއީ އިގުތިސޯދީ ގޮތުން ފައިދާ ބޮޑު މަޝްރޫއުއެއް ނަމަވެސް، މި މަޝްރޫއު އިއުލާނުކުރެއްވުނު ދުވަހުން ފެށިގެން ވެސް ތިމާވެށީގެ ޖަމިއްޔާތަކުން ވަނީ މިއީ ތިމާވެއްޓަށް ގެއްލުން ބޮޑު މަޝްރޫއެއްގެ ގޮތުގައި ސިފަކޮށްފަ އެވެ.
އެގޮތުން މި ބްރިޖު މަސައްކަތާއި، އެ މަސައްކަތާ ގުޅިގެން ހިންގާ ގުޅިފަޅު ހިއްކުމުގެ މަސައްކަތުގެ ސަބަބުން އެ ސަރަހައްދުގެ ފަރުތަކަށް އިޔާދަނުކުރެވޭ ވަރުގެ ބޮޑުގެ ގެއްލުމެއް ލިބޭނެތީ އެ މަސަކަތްތައް ހުއްޓާލަން އެ ޖަމިއްޔާތަކުން ވަނީ ސަރުކާރަށް ގޮވާލާފަ އެވެ.
