ޖައްވަށް ބޭރުކުރާ ވިހަ ގޭހުގެ މިންވަރު ދެނެގަތުމަށް ބޭނުންކުރާ މައުލޫމާތު އެއްކުރުމާ ގުޅޭ ގަވާއިދުގެ ދަށުން އޭސީ ސާވިސް ކުރާ ވިޔަފާރިތަކާ ކަނޑާއި އެއްގަމުގެ ދަތުރުފަތުރުގެ ހިދުމަތްދޭ ހުރިހާ އެންމެނަށް ވިހަ ގޭސް ބޭރުވާ މިންވަރު ރެކޯޑުކޮށް، ބަލަހައްޓައި, އެންވަޔަރަމަންޓު މިނިސްޓްރީއާ ހިއްސާކުރަން މަޖުބޫރުކޮށްފި އެވެ.
އެންވަޔަރަމަންޓު މިނިސްޓްރީގެ އެ ގަވާއިދަކީ، ރާއްޖެއިން ބޭރުކުރާ ވިހަ ގޭސް މިންކޮށް، ދަފުތަރުކޮށް އަދި ވިހާ ގޭހުގެ މިންވަރު ކަށަވަރުކުރުމަށް ބޭނުންވާ އިދާރީ އިންތިޒާމުތަކާއި އިޖުރާއަތްތައް ބަޔާންކުރާ ގަވާއިދެވެ. މި ވިހަ ގޭހުގެ މިންވަރު ކަށަވަރު ކުރުމަކީ ޕެރިސް މުއާހަދާގައި ސޮއިކޮށްފައިވާ ހުރިހާ ގައުމަކަށް ލާޒިމުކަމެކެވެ.
މި ގަވާއިދުގެ ދަށުން މައުލޫމާތު އެއްކުރަން ޖެހޭ 13 މަސްލަހަތުވެރިން ވަނީ ކަނޑައަޅާފަ އެވެ. އޭގެ ތެރޭގައި ދައުލަތުގެ އިދާރާތަކާއި ބޮޑެތި ސިނާއަތްތަކާއި ހަކަތަ ބޭނުންކޮށްގެން ހިދުމަތްދޭ ހުރިހާ ދާއިރާއެއް ހިމެނެ އެވެ.
ވިހަ ގޭސް ބޭރުކުރާ މިންވަރު ރެކޯޑުކުރަން ޖެހޭ މަސްލަހަތުވެރިން
- ޔުޓިލިޓީ ރެގިއުލޭޓަރީ އޮތޯރިޓީ
- ޔުޓިލިޓީ ހިދުމަތްދޭ އެންމެހައި ވިޔަފާރިތައް
- ޓޫރިސްޓު ރިސޯޓުތަކާއި ޓޫރިސްޓު ފެސިލިޓީތައް
- މޯލްޑިވްސް ކަސްޓަމްސް ސާވިސް
- ސިނާއީ ދާއިރާ އާއި މެނުފެކްޗަރިން ދާއިރާގެ އެންމެހައި ފަރާތްތައް
- ރެފްރިޖަރޭޝަން ސިސްޓަމްތަކާއި އޭސީ ސާވިސްކުރާ އެންމެހައި ފަރާތްތައް
- ސިވިލް އޭވިއޭޝަން އޮތޯރިޓީ
- އެންވަޔަރަމެންޓަލް ރެގިއުލޭޓަރީ އޮތޯރިޓީ
- އެއާޕޯޓު އޮޕަރޭޓަރުން
- ކަނޑާއި އެއްގަމާއި ވައިގެ ދަތުރުފަތުރުގެ ހިދުމަތްދޭ އެންމެހައި ވިޔަފާރިތައް
- ހަކަތައިގެ ބާވަތްތައް އެތެރެކުރޭ ފަރާތްތަކާއި، އެފަދަ ތަކެތި އުފައްދާ ފަރާތްތަކާއި. ހަކަތައިގެ ހިދުމަތް ފޯރުކޮށްދޭ ފަރާތްތައް
މި ގަވާއިދު ތަންފީޒުކުރުމުގެ ގޮތުން އެންވަޔަރަމަންޓު މިނިސްޓްރީން ވަނީ އެ މިނިސްޓްރީއަށް ފޮނުވަން ޖެހޭ މައުލޫމާތު އެއްކޮށް، ބަލަހައްޓައި، ފޮނުވަން މަގުފަހި ކުރުމަށް ޓަކައި އިދާރީ އިންތިޒާމުތައް ކޮންމެ މަސްލަހަތުވެރިޔަކު ވެސް ހަމަޖައްސަން ޖެހޭނެ ކަމަށެވެ.
އިދާރީ ކަންކަން އެ ބަޔަކު އަމިއްލައަށް ހަމަޖައްސަން ޖެހުނަސް، ގަވާއިދުގައި ބަޔާންކޮށްފައިވާ ޒިންމާތަކާއި މަސްއޫލިއްޔަތުތައް އެންމެ ފުރިހަމައަށް އަދާކުަރަން މަސްލަހަތުވެރިންނަށް ބޭނުންވާ ތަމްރީނާއި ގާބިލުކަން ހޯދައިދޭން މިނިސްޓްރީން ޕްރޮގްރާމްތައް ހިންގަން ޖެހެ އެވެ.
