މި މަހުގެ 24-30 އަށް މާލޭގައި ބޭއްވުމަށް ހަމަޖެހިފައިވާ ސާބާ ވިމަންސް ޗެމްޕިއަންޝިޕުގެ ލޯގޯ މިއަދު ދައްކާލައިފި އެވެ.
ދެކުނު އޭޝިއާ ސަރަހައްދުގެ ގައުމުތަކުން ވާދަކުރާ އަންހެން ބާސްކެޓްބޯޅަ މުބާރާތުގައި މި އަހަރު ހަ ގައުމަކުން ވާދަކުރާނެ އެވެ. ރައުންޑް ރޮބިން އުސޫލުން ކުޅޭ މުބާރާތުގައި ވާދަކުރަނީ ރާއްޖެ، ސްރީ ލަންކާ، ނޭޕާލް، އިންޑިއާ، ބޫޓާން އަދި ބަންގްލަދޭޝް އެވެ.
މުބާރާތުގެ ލޯގޯ ރަސްމީކޮށް ލޯންޗުކޮށްދެއްވީ ކުޅިވަރާބެހޭ ވަޒީރު، އަހުމަދު މަހުލޫފު އާއި އެޑިއުކޭޝަން މިނިސްޓަރު އައިޝަތު އަލީ އެވެ.
ސަރަހައްދުގެ އަންހެން ބާސްކެޓްގެ އެންމެ ފޯރިގަދަ މުބާރާތުގެ ލޯގޯ ދައްކާލުމުގެ މި ރަސްމިއްޔާތުގައި ދެ ވަޒީރުން ވެސް ވަނީ ގައުމީ ޓީމުގެ ކުޅުންތެރިންނާއި ބައްދަލުކޮށް، މުބާރާތުގައި ގައުމު ފަހުރުވެރިވާ ކާމިޔާބީއެއް ހޯދުމަށް އެދިވަޑައިގެން ހިތްވަރު ދެއްވައިފަ އެވެ.
ސާބާ މުބާރާތަށް ފަރުމާކޮށްފައިވާ ލޯގޯއާ ގުޅޭގޮތުން ވާހަކަ ދައްކަވަމުން ބާސްކެޓްބޯޅަ އެސޯސިއޭޝަންގެ ރައީސް އަހުމަދު އާދަމް (އެޑަމް) ވިދާޅުވީ ލޯގޯ އަކީ ދިވެހިވަންތަ އަދި ދިވެހި ރާއްޖެ އާއި ގުޅޭ ގިނަ ކަންތައްތަކެއް ހިމެނޭނެ ލޯގޯ އެއް ކަމަށެވެ.
މި ލޯގޯގައި ބާސްކެޓްބޯޅައިގެ ފަރުމާ ހިމެނިފައިވާއިރު، ރާއްޖޭގެ މޫދާއި، އިރުއޮއްސޭ މަންޒަރު ސިފަވުމުގެ އިތުރުން ރާއްޖޭގެ ރައްތަކާއި ދިވެހިންގެ ފަހުރެއްގެ ގޮތުގައި އޮންނަ ތުނޑުކުނަލުގެ ފަރުމާ ވެސް ހިމާނާފައިވާނެ ކަމަށް އޭނާ ވިދާޅުވި އެވެ.
"ވަރަށް ބޮޑަށް ދިވެހިވަންތަ، ދިވެހިންނާއި ބާސްކެޓާއި ގުޅޭނެ ލޯގޯ އެއް މިއީ. ތުނޑުކުނަލުގެ ޑިޒައިން ފެންނާނެ، ރާއްޖޭގެ ކަނޑުތައް، އިރުއޮއްސޭ މަންޒަރު އޭގެ އިތުރުންވެސް މި ލޯގޯ އަށް ބަލާލީމަ ރާއްޖޭގެ ގިނަ ކަންކަން ފާހަގަވާނެ." އެޑަމް ވިދާޅުވި އެވެ.
ސާބާ ޗެމްޕިއަންޝިޕަށް ގައުމީ އަންހެން ޓީމު އަންނަނީ ވަރަށް ދުރާލާ ތައްޔާރު ވަމުންނެވެ. އެ ގޮތުން އިންޑިއާ އާއި ތައިލެންޑުގައި ކޭމްޕްތަކެއް ކުރިއަށް ގެންގޮސް އެކުވެރިކަމުގެ މެޗުތަކެއް ވެސް ކުޅެފައިވެ އެވެ. މިހާރު ގައުމީ ޓީމުގެ ފަރިތަކުރުންތައް ކުރިއަށްގެންދަމުން އަންނަނީ މާލޭގަ އެވެ.
އަންހެން ބާސްކެޓްބޯޅަ ޓީމުގެ ކޯޗު، ސްރީ ލަންކާގެ ސުޕުން ވިމާލް, މީގެ ކުރިން "އަދަދު" އަށް ދިން އިންޓަވިއުއެއްގައި ވަނީ މުބާރާތުގެ ތައްޔާރީތައް ދާ ގޮތާ މެދު ވަރަށް ބޮޑަށް ހިތްހަަމަޖެހޭ ކަމަށް ބުނެފަ އެވެ. ސުޕުން ހުރީ 2019 ވަނަ އަހަރުގެ ސައުތު އޭޝިއަން ގޭމްސްގައި އަންހެން ޓީމަށް ލޯ މެޑަލް ގެނެސްދިންއިރު، ވެސް ހުރި ރޫހުގައި މި ފަހަރު އިތުރަށް ރަނގަޅު ކުރުމަށް އަމާޒުހިފައިގެންނެވެ.
މިއީ ބާސްކެޓްގައި ގައުމީ އަންހެން ޓީމަށް މާލޭގައި ކުޅެލަން ލިބޭ ބައިނަލްއަގުވާމީ މި ފަދަ ފުރަތަމަ މުބާރާތެެވެ. މީގެ ކުރިން 2017 ވަނަ އަހަރު ސާބާގެ ފިރިހެން މުބާރާތް ރާއްޖޭން ހޯސްޓްކުރި އެވެ.
