ރައީސް ޖޯ ބައިޑެންއަކީ އެމެރިކާ "ދައުލަތުގެ ދުޝްމަނެއް" ކަމަށް އެ ގައުމުގެ ކުރީގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ޓްރަމްޕް އެގޮތަށް ވިދާޅުވީ އެފްބީއައިއިން ފްލޮރިޑާގައި ހުންނަ އެމަނިކުފާނުގެ ގެކޮޅު ބަލައި ފާސްކުރި ފަހުން ބޭއްވި ފުރަތަމަ އެއްވުމުގަ އެވެ.
ޕެންސިލްވޭނިއާގައި އެތައް ހާސް ސަޕޯޓަރުންނާ މުހާތަބު ކުރައްވަމުން ޓްރަމްޕް ތުހުމަތު ކުރެއްވީ އެފްބީއައި ހަތިޔާރަކަށް ހަދައިގެން އުޅޭ ކަމަށެވެ.
"ގެ ބަލައި ފާސްކުރުމަކީ އެމެރިކާގެ ތާރީހުގައި ވެސް ސަރުކާރަކުން ބާރުގެ ނާޖައިޒު ބޭނުން ކުރި އެންމެ ހައިރާންކުރުވަނިވި ގޮތް" ކަމަަށް ޓްރަމްޕް ވިދާޅުވި އެވެ.
ޓްރަމްޕް ޕެންސިލްވޭނިއާގެ އެއްވުމުގައި ސަޕޯޓަރުންނާ މުހާތަބު ކުރެއްވީ ރިޕަބްލިކަން ޕާޓީގެ ދެ ކެންޑިޑޭޓުންނަށް ކެމްޕެއިން ކުރުމަށެވެ.
ޑރ. މެހްމެތު އޯޒް ކެމްޕެއިން ކުރައްވަނީ ސެނެޓުގެ ގޮނޑިއަކަށެވެ. އަދި ސެނެޓަރު ޑަގް މެސްޓްރިއާނޯ ކެމްޕެއިން ކުރަައްވަނީ ޕެންސިލްވޭނިއާގެ ގަވަރުނަރު ކަމަށެވެ.
އެއްވުމުގައި ދެ ކެންޑިޑޭޓުން މާ ގިނަ ވާހަކަތަކެއް ނުދައްކަވަ އެވެ. އެއާ ހިލާފަށް އުމުރުން 76 އަހަރުގެ ޓްރަމްޕް ވަނީ ގާތްގަނޑަކަަށް ދެ ގަޑިއިރު ޕޯޑިއަމް ކައިރީގައި ހޭދަކުރައްވާފަ އެވެ.
އެމަނިކުފާނުގެ ސްޕީޗްގެ ބޮޑު ބައިގައި އެފްބީއައި އާއި ބައިޑެންގެ ސަރުކާރަށް ފާޑުވިދާޅުވި އެވެ. އެފްބީއައިއިން ތަހުގީގު ކުރަނީ ދައުލަތުގެ ސިއްރު ލިޔުންތަކެއްގެ މައްސަލަ އެވެ.
އެފްބީއައިއިން ބުނީ ސިއްރު ކަމަށް ފާހަގަކޮށްފައިވާ ގިނަ ހުސް ފޮށިގަނޑުތަކެއް ޓްރަމްޕްގެ ގެކޮޅުން ފެނުނު ކަމަށާއި ސިއްރު ލިޔުންތައް ފެނުނީ އެމަނިކުފާނުގެ އޮފީހުން ކަމަށެވެ.
