ބޮލީވުޑްގެ މަޝްހޫރު ބަތަލާ ޕްރިޔަންކާ ޗޯޕްރާ އަދި "ގޭމް އޮފް ތްރޯންސް"ގެ ރޮބް ސްޓާކްގެ ރޯލުން މަޝްހޫރުވި ރިޗާޑް މެޑެންލީޑް ރޯލުން ފެނިގެންދާ ސްޕައި ފްރެންޗައިޒް "ސިޓަޑެލް" އަކީ މިހާތަނަށް އުފެއްދި ދެވަނަ އަށް އެންމެ ހަރަދު ބޮޑު ސީރީޒް ކަމަށް ރިޕޯޓުތަކުގައި ބުނެފި އެވެ.
"އެވެންޖާސް: އެންޑް ގޭމް"ގެ ޑައިރެކްޓަރުން، ޖޯ ރޫސޯ އަދި އެންތަނީ ރޫސޯ، އުފައްދާ މި ސީރީޒް ފުރަތަމަ ބަޖެޓް ކުރެވުނީ 160 މިލިއަން ޑޮލަރަށެވެ.
"ދަ ހޮލީވުޑް ރިޕޯޓާ" ގައި ޝާއިއު ކޮށްފައިވާ ރިޕޯޓެއްގައިވާ ގޮތުން ސީރީޒް އުފެއްދުމުގައި ކުރިމަތިވި ހިޔާލު ތަފާތުވުންތަކާ ގުޅިގެން ކްރިއޭޓިވް ޓީމްގެ ވަރަށް ގިނަ ބަޔަކު ވަނީ "ސިޓަޑެލް" ދޫކޮށްލާފަ އެވެ.
މި ސަބަބާ ހުރެ ސީރީޒް އުފައްދާ ފަރާތަށް ވަނީ އިތުރު އެތައް ހަރަދުތަކާއެކު އަލުން ޝޫޓް ކުރަން ޖެހިފަ އެވެ.
ރިޕޯޓްތައް ބުނާ ގޮތުން ހަތް އެޕިސޯޑްގެ މި ސީރީޒް އުފެއްދުމަށް މިހާތަނަށް ގާތްގަނޑަކަށް 250 މިލިއަން ޑޮލަރު ވަނީ ހަރަދުކޮށްފަ އެވެ.
އެއީ ފުރަތަމަ ކަނޑައެޅި ބަޖެޓަށް ވުރެ 75 މިލިއަން ޑޮލަރު އިތުރު އަދަދެކެވެ.
ދެވަނަ އަށް އެންމެ އަގު ބޮޑު ސީރީޒަކަށް "ސިޓަޑެލް" ވެފައިވާއިރު، މިިހާތަނަށް އުފެއްދި އެންމެ އަގުބޮޑު ސީރީޒްގެ ލިސްޓްގެ އެއްވަނައިގައި އޮތީ މި މަހު އެމެޒަން ޕްރައިމްގައި ޕްރިމިއާކުރި "ދަ ލޯޑް އޮފް ދަ ރިންގްސް: ދަ ރިންގްސް އޮފް ޕަވާ" އެވެ.
ބެލެވޭ ގޮތުގައި މި ސީރީޒްގެ ފުރަތަމަ ސީޒަން އަށް އެކަނި ވެސް 465 މިލިއަން ޑޮލަރު ވަނީ ހަރަދުކޮށްފަ އެވެ.
