ބާމިންހަމް (ސެޕްޓެމްބަރު 3) - އިނގިރޭސި ޕްރިމިއާ ލީގުގައި މިރޭ މެންޗެސްޓާ ސިޓީ އާއި އެސްޓަން ވިލާ ބައްދަލުކުރި މެޗު 1-1 އިން އެއްވަރުވެއްޖެ އެވެ.
ވިލާގެ ސްޓޭޑިއަމް، ވިލާ ޕާކުގައި މިރޭ ކުޅުނު މެޗުގެ 50 ވަނަ މިނިޓުގައި ސިޓީ އަށް ލީޑު ހޯދައިދިނީ ނޯވޭގެ ފޯވަޑް އާލިން ބްރައުޓް ހާލަންޑް އެވެ. މިއީ ކެވިން ޑިބްރޭނާ ދިން މޮޅު ބޯޅައަކުން ހާލަންޑް ޖެހި ގޯލެކެވެ.
ބޮރޫޝިއާ ޑޯޓްމަންޑް އިން ސިޓީ އަށް މި ސީޒަންގައި ބަދަލުވި ހާލަންޑް ސީޒަން ފަށާފައިވަނީ ވަރަށް ރަނގަޅު ފޯމެއްގަ އެވެ. މިއީ މި ސީޒަންގެ ލީގުގައި ސިޓީ ކުޅުނު ފުރަތަމަ ހަ މެޗުގައި، ހާލަންޑް ޖެހި 10 ވަނަ ލަނޑެވެ. ހާލާންޑް ވަނީ ޕްރިމިއާ ލީގުގެ ސީޒަނެއްގައި ކުޅުނު ފުރަތަމަ ހަ މެޗުން 10 ލަނޑު ޖަހައި 1992 ވަނަ އަހަރު މިކީ ކުއިން ހަދާފައިވާ ރެކޯޑާ އެއްވަރުކޮށްފަ އެވެ.
އެކަމަކު، ލީޑު ނެގުމަށް ފަހު، ލިބުނު ފުރުސަތުތަކުގެ ބޭނުން ނުހިފުމުގެ ނަތީޖާ ސިޓީ އަށް ތަޖުރިބާ ކުރަން ޖެހުނެވެ. މެޗުގެ 74 ވަނަ މިނިޓުގައި އެސްޓަން ވިލާގެ ޖެމެއިކާ ފޯވަޑް ލެއޮން ބެއިލީ ވަނީ ލަނޑެއް ޖަހައި މެޗުގެ ނަތީޖާ އެއްވަރުކޮށްފަ އެވެ. މިއީ އެސްޓަން ވިލާގެ ޒުވާން މިޑްފީލްޑަރު، ޖޭކަބް ރަމްސީ އޭރިއާތެރެއަށް ބޯޅަ ހިފައިގެން ވަދެ، ހުރަސްކޮށްލި ބޯޅައެއް ގޯލުގެ މަތީ ކަނަށް ފޮނުވާލައިގެން ބެއިލީ ޖެހި ލަނޑެކެވެ.
ސިޓީގެ ގުންޑޮގާން (ވ) އަތުން ބޯޅަ ހޯދަން އެސްޓަން ވިލާގެ ލޫކަސް ޑީނިއާ މަސައްކަތްކުރަނީ
އޭގެ ފަސް މިނިޓް ފަހުން އެސްޓަން ވިލާގެ ފިލިއްޕޭ ކުޓީނިއޯ ވަނީ ގޯލަށް ބޯޅައެއް ފޮނުވާލައިފަ އެވެ. އެކަމަކު، މި ގޯލު ބަލައިނުގަތީ އެޓޭކް ފެށިއިރު، ކުޓީނިއޯ އޮފްސައިޑް މަގާމެއްގައި ހުރިކަމަށް ނިންމައިފަ އެވެ.
މިއީ މި ސީޒަންގައި ސިޓީ ކުޅުނު މެޗެއްގައި އެންމެ ލަނޑަކާ އެކު އެ ޓީމު ފުއްދާލި ފުރަތަމަ ފަހަރެވެ. ލީގުގައި ކުޅުނު ފުރަތަމަ ފަސް މެޗުގައި ސިޓީން ވަނީ 19 ލަނޑު ޖަހައިފަ އެވެ.
"އަހަރަމެންގެ އަތުގައި މެޗު އޮތްއިރު، ލީޑު ފުޅާކުރުމަށް ފުރުސަތުތައް ލިބުނު އެކަމަކު ފުރުސަތުތަކުގެ ބޭނުން ނުހިފުނު،" މެޗަށް ފަހު ސިޓީގެ ކޯޗު ޕެޕް ގާޑިއޯލާ ބުންޏެވެ. "ހުރަސްތައް ގޯސްވީމަ ލަނޑު ޖަހަން ލިބުނު ބައެއް ފުރުސަތުތައް ގެއްލުނު."
މި މެޗުގެ ނަތީޖާއާއެކު، ވިލާގެ ކޯޗު ސްޓީވަން ޖެރާޑަށް އޮތް ޕްރެޝަރަށް ލުއިކަމެއް ލިބޭނެ އެވެ. ސިޓީ އަތުން ލިބުނު ޕޮއިންޓާއެކު ޖެރާޑް ހުރީ ވަރަށް ހިތްހަމަޖެހިފަ އެވެ.
"މި ސީޒަންގައި މިހާތަނަށް މާ ގިނަ ޕޮއިންޓްތަކެއް ގެއްލިއްޖެ. ބަދަލެއް އެބަޖެހޭ ފެންނަން،" ޖެރާޑް ބުންޏެވެ.
ސިޓީ އެއްވަރުވުމުގެ ފައިދާ ނެގުމުގެ ފުރުސަތު އާސެނަލަށް އެބައޮތެވެ. އެ ގޮތުން އާސެނަލުން މާދަމާރޭ މެންޗެސްޓާ ޔުނައިޓެޑް ދަނޑުގައި މޮޅެއް ހޯދަައިފިނަމަ ލީގުގެ ކުރީގައި ހަތަރު ޕޮއިންޓަށް ލީޑުފުޅާ ކުރެވޭނެ އެވެ. އާސެނަލް އެއް ވަނައިގައި އޮތީ ފަސް މެޗުން 15 ޕޮއިންޓް ހޯދައިގެންނެވެ. ދެ ވަނައިގައި އޮތް ސިޓީ އާއި ތިން ވަނައިގައި އޮތް ޓޮޓެންހަމް ހޮޓްސްޕާސް އަށް ވަނީ ހަ މެޗުން 14 ޕޮއިންޓް ލިބިފަ އެވެ.
