ލިވަޕޫލް (ސެޕްޓެމްބަރު 3) - އިނގިރޭސި ޕްރިމިއާ ލީގުގައި މިރޭ ލިވަޕޫލާއި އެވަޓަން ލަނޑެއް ނުޖެހި 0-0 އިން އެއްވަރުވިއިރު، ޗެލްސީ އާއި ޓޮޓެންހަމް ހޮޓްސްޕާސް ކުޅުނު މެޗުތަކުން މޮޅުވެއްޖެ އެވެ.
ޗެލްސީން ވަނީ އަމިއްލަ ދަނޑުގައި ފަހަތުން އަރައި 2-1 އިން ވެސްޓް ހޭމް ޔުނައިޓެޑް ބަލިކޮށްފަ އެވެ. ފުލަމް އަތުން ޓޮޓެންހަމް މޮޅުވީ 2-1 އިންނެވެ. މި މޮޅާ އެކު ޓޮޓެންހަމް ވަނީ ހަ މެޗުން 14 ޕޮއިންޓް ހަމަކޮށް ލީގުގެ ކުރީގައި އޮތް އާސެނަލާ އެއް ޕޮއިންޓަށް ގާތަށް ޖެހިލައިފަ އެވެ.
ޓޮޓެންހަމް މި ވަގުތު ދެ ވަނައިގައި އޮތް ނަމަވެސް މިރޭ ފަހުން ކުޅޭ މެޗުން މެންޗެސްޓާ ސިޓީން އެސްޓަން ވިލާ ބަލިކޮށްފިނަމަ ދެ ވަނަ އަށް އަރާނެ އެވެ.
އެވަޓަން ދަނޑުގައި މިރޭ ލިވަޕޫލާ ދެކޮޅަށް ކުޅުނު މެޗުގައި ދެ ޓީމަށް ވެސް ގޯލު ޖަހަން ފުރުސަތު ލިބުނެވެ. ފުރަތަމަ ހާފުގައި އެވަޓަންގެ ޓޮމް ޑޭވިސް ޖެހި ބޯޅައެއް ގޯލުގެ ދަނޑިއަށް އަމާޒުވިއިރު، ލިވަޕޫލްގެ ޑާވިން ނޫނޭޒް އާއި ލުއިސް ޑިއާޒް ޖެހި ބޯޅައެއް ވެސް ދަނޑީގައި ޖެހިފަ އެވެ. ނޫނޭޒް ޖެހި ބޯޅަ ދަނޑި އަށް އަމާޒުވީ މި މެޗުގައި މޮޅު ކުޅުމެއް ދެއްކި އެވަޓަންގެ ކީޕަރު ޖޯޑަން ޕިކްފޯޑް އަތުގައި ޖެހިފަ އެވެ.
ފްރޭންކް ލަމްޕާޑްގެ ކޯޗުކަމުގައި ކުޅުނު އެވަޓަން އިން ވަނީ މި މެޗުގައި ގޯލެއް ޖަހައިފަ އެވެ. މެޗުގެ 69 ވަނަ މިނިޓްގައި އެވަޓަންގެ ކޮނާ ކޯޑީ ޖެހި ގޯލުން ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު ނިންމީ އޮފްސައިޑް ކަމަށެވެ.
އެވަޓަން އަށް ގޯލެއް ޖަހައިދޭން ނީލް މޯޕޭ އާއި ޑްވައިޓް މެކްނީލް ޖެހި ބޯޅަތައް ލިވަޕޫލްގެ ކީޕަރު އެލިސަން ބެކާ ވަނީ މަތަކޮށްފަ އެވެ. އަދި ލިވަޕޫލްގެ ރޮބާޓޯ ފިރްމީނޯ ޖެހި ދެ ބޯޅަ އަކާއި މެޗުގެ އިތުރު ވަގުތުގައި މުހައްމަދު ސަލާހު ޖެހި ޝޮޓް ވެސް ހުއްޓުވީ މެޗުގެ މޮޅު ކުޅުންތެރިޔާ ޕިކްފޯޑް އެވެ.
ޗެލްސީގެ ޗިލްވެލް (ކ) ވެސްޓް ހޭމްގެ ރައިސް އަތުން ބޯޅަ ހޯދަން މަސައްކަތް ކުރަނީ
ޗެލްސީ ދަނޑުގައި މިރޭ ވެސްޓް ހޭމް އިން ވަނީ ލީޑުނަގައިފަ އެވެ. ޗެލްސީގެ ކީޕަރު އެޑޮއާޑް މެންޑީ ހެދި ގޯހެއްގެ ފައިދާނަގައި ވެސްޓް ހޭމަށް ލީޑުނަގައިިދިނީ މިކޭލް އެންޓޯނިއޯ އެވެ. ކޯނަރެއްގައި ޗެލްސީ އޭރިއާތެރެއިން ޑެކްލަން ރައިސް ދިން ބޯޅަ އެންޓޯނިއޯ ވަނީ ގޯލު ރޮނގުމަތިން ގޯލަށް ފޮނުވާލައިފަ އެވެ.
ޗެލްސީ ކޮޅަށް ނަތީޖާ އަނބުރާލުމުގައި އެންމެ ބޮޑު ކްރެޑިޓެއް ހައްގުވަނީ ބެން ޗިލްވެލް އެވެ. މެޗުގެ 72 ވަނަ މިނިޓްގައި މާކް ކުކުރޭލާގެ ބަދަލުގައި ކުޅެން އަރައި، ޗިލްވެލް ވަނީ 76 ވަނަ މިނިޓްގައި ޗެލްސީ އަށް އެއްވަރުކޮށްދީފަ އެވެ. އަދި މެޗުގެ 88 ވަނަ މިނިޓްގައި އޭރިއާތެރެއިން ކައި ހަވާޓްޒް ގޯލެއް ޖަހައި ޗެލްސީ އަށް ލީޑުނަގައިދިން ގޯލު ޖަހަން ބޯޅަ ދިނީ ޗިލްވެލް އެވެ.
އިތުރު ވަގުތުގައި ގޯލެއް ޖަހައި، ވެސްޓް ހޭމްގެ މެކްސްވެލް ކޯނޭ އެ ޓީމަށް އެއްވަރުކޮށްދިން ނަމަވެސް ވީއޭއާރް އިން އެ ގޯލު ބަލައިނުގަންނަން ނިންމީ ކީޕަރު މެންޑީ އަށް ފައުލުކޮށްފައިވާތީ އެވެ.
އެންޓޯނިއޯ ކޮންޓޭގެ ޓޮޓެންހަމް އިން މިރޭ ފުލަމް ކޮޅަށް ގޯލުތައް ޖެހީ ޕިއޭ އެމީލް ހޮއިބިއާ އާއި ހެރީ ކޭން އެވެ. ފުލަމްގެ ގޯލު ޖެހީ ރަނގަޅު ފޯމެއްގައި ހުރި އަލެކްސަންޑަ މިޓްރޮވިޗް އެވެ.
ޕްރިމިއާ ލީގުގައި މިރޭ ކުޅުނު އެެހެން މެޗުތަކުގެ ނަތީޖާ އަށް ބަލާއިރު، ބްރެންޓްފޯޑުން ވަނީ 5-2 ލީޑްސް ޔުނައިޓެޑް ބަލިކޮށްފަ އެވެ. ނިއުކާސަލް ޔުނައިޓެޑާއި ކްރިސްޓަލް ޕެލަސް ލަނޑެއް ނުޖެހި އެއްވަރުވިއިރު، ނޮޓިންހަމް ފޮރެސްޓް އަތުން ބޯންމައުތު ވަނީ ފަހަތުން އަރައި 3-2 އިން މޮޅުވެފަ އެވެ. އަދި ވުލްވްސް ވަނީ 1-0 އިން ސައުތެމްޓަން އަތުން މޮޅުވެފަ އެވެ.
