އެމެރިކާއިން ޓައިވާނަށް 1.1 ބިލިއަން ޑޮލަރުގެ ހަތިޔާރު ވިއްކަން ނިންމުމުން ޗައިނާއިން ރުޅިވެރިކަން ފާޅުކޮށްފި އެވެ.
އެމެރިކާއިން ހުށަހެޅި ޑީލްގައި ހަމަލާ ޓްރެކް ކުރާނެ ރާޑަރު ސިސްޓަމަކާއި މަނަވަރާއި މިސައިލާ ދެކޮޅު ހަމަލާދެވޭ ސިސްޓަމް ހިމެނެ އެވެ.
އެމެރިކާގެ ހައުސް އޮފް ރެޕްރެޒެންޓޭޓިވްސްގެ ރައީސް ނޭންސީ ޕެލޯސީ މިދިޔަ މަހު ޓައިވާނަށް ކުރެއްވި ދަތުރަކީ 25 އަހަރުގެ ތެރޭގައި އެމެރިކާގެ އެހާ އިސް އޮފިޝަލަކު ކުރެއްވި ފުރަތަމަ ދަތުރެވެ.
އެމެރިކާގެ ވޮޝިންޓަންގައި ހުންނަ ޗައިނާގެ އެމްބަސީއިން ގޮވާލީ އެމެރިކާއިން އެ ޑީލް އަނބުރާ ގެންދިޔުމަށެވެ. އެހެން ނޫން ނަމަ ރައްދުގައި ފިޔަވަަޅު އަޅާނެކަމުގެ އިންޒާާރު ދިނެވެ.
ތަރުޖަމާނު ލިއު ޕެންގްޔޫ ވިދާޅުވީ އެ ޑީލްގެ ސަބަބުން އެމެރިކާ އާއި ޗައިނާގެ ގުޅުމަށް ސީރިއަސް އަސަރުތަކެއް ކުރާނެ ކަމަށެވެ.
ޗައިނާއިން ދެކޭ ގޮތުގައި ޓައިވާނަކީ އެ ގައުމުގެ ޕްރޮވިންސެކެވެ. ނަމަވެސް، ޓައިވާނުން ބުނަނީ އެއީ ވަކިން އޮތް މިނިވަން ދައުލަތެއް ކަމަށެވެ.
