ގދ. ތިނަދޫ އިން ގެއްލިގެން ރިޕޯޓުކުރި، އެރަށު ކަސްޓަޑުގެއާގޭ ހައްވާފާނު (ހައްވަހަންތަ) ފެނިއްޖެ އެވެ.
އުމުރުން 80 އިން މަތިވެފައިވާ ހައްވާފާނު ފެނުނީ، ރަށުގެ ރައްޔިތުން ނިކުމެ އޭނާ ހޯދަމުން ދަނިކޮށް، ފަޅުގެއެއްގެ ތެރޭގައި ވެއްޓިފައި އޮއްވައެވެ. އެއާއެކު، މީހުން ވަނީ ހައްވާފާނު ހޮސްޕިޓަލަށް ގެންގޮސްފަ އެވެ - މިވަގުތު އޭނާ އޮތީ ހޮސްޕިޓަލުގަ އެވެ. ވީ ކިހިނެއް ކަމެއް އަދި ސާފެއްނުވެ އެވެ.
ހައްވާފާނު ގެއްލިގެން ރިޕޯޓުކުރުމާއެކު އޭނާ ހޯދަން ރަށުގެ ގިނަ ބަޔަކު ވަނީ ތިނަދޫގެ މަގުތަކަށް ނިކުމެފަ އެވެ.
"އަޅުގަނޑުމެންނަށް ފެނިގެންދިޔައީ ތަފާތު އެކުވެރިކަމެއް. ހައްވާފާނު ހޯދަން ރަށުގެ ޒުވާނުންގެ ވެސް ބޮޑު ގުރޫޕެއް ނިކުތް. އެކި އުމުރުފުރާތަކުގެ އެތައް ބަޔަކު ނިކުތް. ބޮޑު ރަށަކަށް ވާތީ ވަރަށް ބޮޑަށް ހޯދައިގެން ފެނުނީ." ތިނަދޫ ކައުންސިލްގެ މެންބަރަކު "އަދަދަށް" މައުލޫމާތު ދެމުން ވިދާޅުވި އެވެ.
ހައްވާފާނު ނުފެނިގެން އުޅޭ ކަމުގެ ހަބަރު އާންމުވީ މިރޭ އިރާކޮޅު އެވެ.
