ދިވެހި އާޓިސްޓުންނަށް ދާއިރާއިން ހިލޭ ކިޔެވޭނެ ފުރުސަތުތަކާއި، ހުނަރު ތަމްސީލުކުރުމުގެ ފުރުސަތު ހޯދައިދިނުމަށް ޗައިނާ-ރާއްޖެ ކަލްޗުރަލް ސެންޓަރާއެކު މޯލްޑިވްސް އާޓިސްޓް ކޮމިއުނިޓީ (އެމްއޭސީ) އިން އެއްބަސްވުމެއްގައި ސޮއިކޮށްފި އެވެ.
ޗައިނާ އަކީ މިހާރުވެސް ދޭތެރެ ދޭތެރެއިން އާޓްގެ ދާއިރާއިން ރާއްޖެއަށް މިފަދަ ފުރުސަތުތައް ދޭ ގައުމެކެވެ.
އެމްއޭސީގެ ޗެއާޕާސަން އަހުމަދު އަޒުމީ (ބާޗީ) ވިދާޅުވީ، ކަލްޗުރަލް ސެންޓަރާއެކު ރަސްމީ އެއްބަސްވުމެއްގައި ސޮއިކުރުމުން އާޓިސްޓުންނަށް މިހާރު ޗައިނާއިން ފަހިކޮށްދޭ ފުރުސަތުތައް ގިނަވެ، ފުޅާވެގެންދާނެ ކަމަށެވެ. މިއީ ކުރިއަށް އޮތްތަނުގަައި ދިވެހި އާޓިސްޓުންނަށް ލިބިގެންދާނެ ކުރިއެރުމެއްގެ ގޮތުގައި އޭނާ ފާހަގަކުރެއްވި އެވެ.
"މިއީ އާޓިސްޓުންނަށް ލިބޭނެ ވަރަށް އުފާވެރި ހަވބަރަކަށް ވާނެ. މިފަދަ ފުރުސަތު ގިނަވި ވަރަކަށް ރާއްޖޭގެ އާޓިސްޓުންނަށް ބޭރުގެ ދުނިޔެއަށް ހުނަރާއެކު ނިކުތުމަށް މަގު ފަހިވެގެންދާނެ،" ބާޗީ ވިދާޅުވި އެވެ.
މި އެއްބަސްވުމުގެ ދަށުން، ޗައިނާގައި އޮންނަ އެގްޒިބިޝަންތަކުގައި ދިވެހި އާޓިސްޓުންގެ މަސައްކަތްތައް ތަމްސީލުކުރުމާއި، އެ ގައުމުގައި ބާއްވާ މުބާރާތްތަކުގައި ދިވެހި އާޓިސްޓުންނަށް ބައިވެރިވުމުގެ ފުރުސަތު ފަހިކޮށްދިނުމާއި އެ ގައުމުގެ ފަންނީ މޮޅެތި މީހުން ގެނެސްގެންނާއި ގައުމަށް ފޮނުވައިގެން ތަމްރީން ފުރުސަތު ފަހިކޮށްދިނުން ހިމެނެ އެވެ. އަދި އާޓް ދާއިރާއިން ހިލޭ ކިޔެވުމުގެ ފުރުސަތުވެސް މިހާރަށްވުރެ ބޮޑުތަން ފަހިވެގެންދާނެ އެވެ.
