އެމެރިކާގެ ކުރީގެ ރައީސް ޑޮނަލްޑް ޓްރަމްޕް އުފެއްދެވި ސޯޝަލް މީޑިއާ ޕްލެޓްފޯމް ޓްރުތް ސޯޝަލް ގޫގްލް ޕްލޭއިން މަނާކޮށްފި އެވެ.
ގޫގްލްއިން ބުނީ ޓްރުތް ސޯޝަލްއަކީ ގޫގްލްގެ ސިޔާސަތާ ހިލާފު ޕްލެޓްފޯމެއް ކަމަށެވެ. އެ ޕްލެޓްފޯމުން ޖިސްމާނީ އަނިޔާގެ އިންޒާރާއި ހަމަނުޖެހުމަށް ހިތްވަރުދޭ ކަމަށް ގޫގްލްއިން ބުންޏެވެ.
ގޫގްލް ޕްލޭގެ ނިންމުމާ އެކު އެންޑްރޮއިޑް ފޯން ގެންގުޅޭ މީހުންނަށް ޓްރުތް ސޯޝަލް އެޕް ޑައުންލޯޑް ކުރަން އުނދަގޫ ވާނެ އެވެ.
ޓްރުތް ސޯޝަލްގެ ސީއީއޯ ޑެވިން ނިޔުންސް މީގެ ކުރިން ބުނީ ގޫގްލްއަކީ މާކެޓް ހިސޯރުކޮށްގެން އުޅޭ "މޮނޮޕޮލީ" ކުންފުންޏެއް ކަމަަށެވެ.
ޓްރުތް ސޯޝަލް އެޕް ލޯންޗު ކުރީ މިދިޔަ ފެބްރުއަރީ މަހު އެޕަލްގެ އެޕް ސްޓޯރުގަ އެވެ. މިދިޔަ ހަަފްތާގައި ނިޔުންސް ބުނީ ގޫގްލް ޕްލޭގައި އެ އެޕް ހިމެނުމަކީ ގޫގްލްގެ އަތް މަަތީގައި އޮތް ކަމެއް ކަމަށެވެ.
އެހެން ނަމަވެސް ގޫގްލްއިން ބުނީ އެ ކުންފުނީގެ ސިޔާސަަތާ އެއް ގޮތަށް އަމަލު ކުރަން ޖެހޭނެ ކަމަށާއި އެކަން ކުރާނެތޯ ނިންމާނީ ޓްރުތް ސޯޝަލްއިން ކަމަށެވެ.
ޓްރުތް ސޯޝަލް ޕްރޮމޯޓް ކުރަނީ ހިޔާލު ފާޅުކުރުމުގެ މިނިވަންކަން ފުރިހަމައަށް ލިބިދޭ ޕްލެޓްފޯމެއްގެ ގޮތުގަ އެވެ. އެކަމަކު އެ ޕްލެޓްފޯމްގެ ޓާމްސް އޮފް ސާވިސްގައި ޕޯސްޓް ނުކުރެވޭނެ ގިނަ ވާހަކަތަކެއްގެ ލިސްޓު ހިމަނާފައިވެ އެވެ.
