ހަނދަށް ދާން އެމެރިކާގެ ޖައްވީ އިދާރާ ނާސާއިން އުފެއްދި އާ، ބިޔަ ރޮކެޓު ސްޕޭސް ލޯންޗް ސިސްޓަމް (އެސްއެލްއެސް) ލޯންޗުކުރުން ފަަސްކޮށްފި އެވެ.
ދަތުރު ފަސްކުރީ 100 މީޓަރު އުސް ރޮކެޓު ދުނިޔެއިން ނައްޓާލަން ބޭނުންވާ ވަރަށް އޭގެ އެއް އިންޖީންގެ ފިނިހޫނުމިން ތިރިނުކުރެވިގެންނެވެ.
އޭގެ ކުރިން ރޮކެޓުގެ އެންމެ މަތީކޮޅުގައި ރެނދުލާފައި ހުރި ކަމަށް ވެސް ބެލެވުނެވެ. އެކަމަކު ފަހުން ބުނީ އެއީ ފިނިހިފައިފައި ހުރުމުން ހީވިގޮތެއް ކަމަށެވެ.
އެސްއެލްއެސްއަކީ ނާސާއިން މިހާތަނަށް އުފެއްދި އެންމެ ބޮޑު ރޮކެޓެވެ. އެ ރޮކެޓު އުފެއްދީ އެސްޓްރޮނޯޓުން ހަނދަށް ގެންދިޔުމުގެ މަގުސަދުގަ އެވެ.
އެ ދަތުރު ރާވާފައި އޮތީ އިއްޔެ ކުރުމަށެވެ.
ފުރަތަމަ ދަތުރުގައި އިންސާނަކު ނެތި ދަތުރު ކުރަން ހަމަޖެހުނު ނަމަވެސް، އާޓެމިސް ޕްރޮގްރާމްގެ ދަށުން މުސްތަގްބަލުގައި އެ ރޮކެޓުގެ އެހީގައި އިންސާނުން ހަނދަށް ދަތުރު ކުރާނެ އެވެ.
އެސްއެލްއެސް ލޯންޗުކުރާ މަންޒަަރު ބެލުމަށް ގިނަ ބަޔަކު މަޑުކޮށްގެން ތިބި އިރު، ޓެކްނިކަލް މައްސަލަ ހައްލު ކުރެވިއްޖެ ނަމަ އަަންނަަ ހުކުރު ދުވަހު ނާސާއަށް އަލުން އެ ރޮކެޓް ލޯންޗު ކުރެވޭނެ އެވެ.
އެ ރޮކެޓު ޖައްވަށް ދަތުރުކޮށް، ދުނިޔެއާ ވަރަށް ދުރުން އޮރަޔޯން ނަމަކަށް ކިޔާ ކެޕްސޫލެއް ދޫކުރަން ހަމަޖެހިފައިވެ އެވެ. އޭގެ ފަހުން ހަނދު ވަށައި ބުރު ޖެހުމަށް ފަހު ދުނިޔެއަށް ދަަތުރުކޮށް، ޕެސިފިކް ކަނޑުގެ ހިސާބަކަށް ތިރިކުރާނީ ހަ ހަފްތާ ފަހުންނެވެ.
ފުރަތަމަ ދަތުރުގައި އޮރަޔޯން ކެޕްސޫލްގައި އެއްވެސް އެސްޓްރޮނޯޓަކު ނުތިބޭނެ އެވެ. އެކަމަކު މި ދަތުރުގައި ކަންކަން ރަނގަޅަށް ގޮސްފި ނަމަ 2024 އިން ފެށިގެން ހިންގާ މިޝަންތަކުގައި އެސްޓްރޮނޯޓުން ބައިވެރިވާނެ އެވެ.
