ލަންޑަން (އޮގަސްޓް 30) - ޓްރާންސްފާ ބާޒާރު ބަންދުވުމުގެ ކުރިން ޗެލްސީން އިތުރު ކުޅުންތެރިން ހޯދަންޖެހޭ ކަމަށް އެ ޓީމުގެ ކޯޗު ތޯމަސް ޓުޗެލް ބުނެފި އެވެ.
މިދިޔަ ސީޒަނަށް ފަހު ޗެލްސީން ގިނަ ކުޅުންތެރިންތަކެއް ދޫކޮށްލާފައިވާއިރު، މި ސީޒަނަށް ސްކޮޑް ވަރުގަދަ ކުރުމުގެ ގޮތުން މިހާތަނަށް އެ ޓީމުން ވަނީ ރަނގަޅު ކުޅުންތެރިންތަކެއް ގެނެސްފަ އެވެ. އެގޮތުން، ނަޕޯލީ އަށް ކުޅެމުންދިޔަ ސެނެގާލްގެ ޑިފެންޑަރު ކަލީދޫ ކުލިބާލީ އާއި މެންޗެސްޓާ ސިޓީ އަށް ކުޅެމުންދިޔަ ރަހީމް ސްޓާލިން އާއި ބްރައިޓަންގެ ލެފްޓް ބެކް ކުކުރޭލާ އާއި އެސްޓަން ވިލާ އަށް ކުޅެމުންދިޔަ އިންގްލެންޑްގެ ޒުވާން މިޑްފީލްޑަރު ކާނީ ޗުކްވުއެމެކާ އަދި އިޓަލީގެ ޒުވާން މިޑްފީލްޑަރު ސެޒާރޭ ސަސާޑޭއީ ހިމެނެ އެވެ.
ސްކޮޑް އިތުރަށް ވަރުގަދަ ކުރުމަށް، ޗެލްސީން ދަނީ ޓްރާންސްފާ ބާޒާރުގައި ހަރަކާތްތެރި ވަމުންނެވެ. އެ ގޮތުން ލެސްޓާ ސިޓީ އަށް ކުޅެމުންދާ ފްރާންސްގެ ޑިފެންޑަރު ވެސްލީ ފޮފާނާ އާއި ބާސެލޯނާގެ ފޯވަޑް ޕިއޭ އެމެރިކް އޮބާމަޔަން ހޯދުމަށް ޗެލްސީން މަސައްކަތް ކުރަމުންދާ ކަމަށް ރިޕޯޓްތައް ބުނެ އެވެ.
ޓުޗެލް ބުނީ ޗެލްސީގެ ސްކޮޑް އިތުރަށް ވަރުގަދަ ކުރުމަށް ބައެއް މަގާމުތަކަށް އިތުރު ކުޅުންތެރިން ބޭނުންވާ ކަމަށެވެ. އަދި ޓްރާންސްފާ ބާޒާރު ބަންދުވާން ކުޑަ ދުވަސްކޮޅަކަށްވެފައި ވާއިރު، އެންމެ ބޭނުންވާ ގޮތަށް ކުޅުންތެރިން ނުލިބުމަކީ އެކަށީގެންވާ ކަމެއް ކަމަށް ގަބޫލްކުރާ ކަމަށެވެ.
"ކޮންމެ ގޮތަކަށް ޓްރާންސްފާ ބާޒާރު ނިމުނަސް، އަހަރެން ބަލާނީ އަހަންނަށް ލިބޭ ސްކޮޑްގެ ބޭނުންކޮށްގެން ކަންތައްތައް ހައްލުކުރަން،" ޓުޗެލް ބުންޏެވެ.
ޗެލްސީން ވަނީ އެ ޓީމަށް ކުޅެމުން އައި އިނގިރޭސި މިޑްފީލްޑަރު، ރޮސް ބާކްލޭގެ ކޮންޓްރެކްޓް އުވާލައިފަ އެވެ. މީގެ އިތުރުން ޗެލްސީގެ އިނގިރޭސި މިޑްފީލްޑަރު، ކޮނާ ގެލަގާ ގަންނަން އިނގިރޭސި ކްލަބަކުން 32 މިލިއަން ޑޮލަރުގެ ހުށަހެޅުމެއް ލިބިފައިވާ ކަމަށް ވެސް މީޑިއާތަކުން ވަނީ ރިޕޯޓްކޮށްފަ އެވެ. އަދި ޗެލްސީން އަންނަނީ އެވަޓަންގެ އެންތަނީ ގޯޑަން ގަންނަން ކުރާ މަސައްކަތުގައި ކުރިހޯދުމުގެ ގޮތުން އެ ޑީލުގެ ތެރެއިން އެވަޓަން އަށް އަރްމާންޑޯ ބްރޯޖާ ދޫކޮށްލަން ވެސް ވާހަކަ ދައްކަމުންނެވެ.
އިނގިރޭސި ޕްރިމިއާ ލީގުގައި މިރޭ ސައުތުހެމްޓަންއާ ދެކޮޅަށް ޗެލްސީ ނުކުންނާނެ އެވެ.
