މ. ވޭވަށަށް ރައީސަކު ޒިޔާރަތްނުކުރާތާ 10 އަހަރު ފަހުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް އެރަށަށް ވަޑައިގެންފި އެވެ.
ވޭވަށަށް އެންމެ ފަހުން ރައީސަކު ވަޑައިގެންފައިވަނީ ރައީސް މުހައްމަދު ނަޝީދުގެ ވެރިކަމުގައި އެމަނިކުފާނެވެ. އެފަހުން ވަޑައިގެންނެވި ފުރަތަމަ ރައީސަކީ ރައީސް ސޯލިހް ކަމަށްވާއިރު، އެމަނިކުފާނު ވަނީ ވޭވަށަށް ވަޑައިގެން އެރަށު ބަނދަރާއި، އާ އިންޖީނުގެ ހުޅުވައިދެއްވައިފަ އެވެ.
ވޭވަށަށް ވަޑައިގެން ރައީސް ވަނީ އެރަށު ކައުންސިލާ ބައްދަލުކޮށް، ރައްޔިތުންނަށް ބޭނުންވާކަންކަން ސާފުކުރައްވާފަ އެވެ. ކައުންސިލުން ވަނީ ފާއިތުވެ ދިޔަ 10 އަހަރުގެ ތެރޭގައި ރައީސް ސޯލިހް ފިޔަވައި އެހެން އެއްވެސް ރައީސަކު ވޭވަށަށް ވަޑައިގެން އެރަށުގެ ރައްޔިތުންގެ ހާލަތު ބައްލަވާލައްވާފައި ނުވާކަން ފާހަގަކޮށް މިސަރުކާރުން ވޭވަށަށް ދެއްވާ ސަމާލުކަމަށް ޝުކުރު އަދާކޮށްފަ އެވެ.
މިވަގުތު ވޭވަށުގެ ރައްޔިތުން އެންމެ ބޭނުންވެފައިވާ ކަންކަމުގެ ގޮތުގައި ކައުންސިލުން ފާހަގަކުރީ، ކައުންސިލް އިދާރާގެ އާ އިމާރާތް އެޅުމާއި، އައިސްޕްލާންޓެއް ބެހެއްޓުމާއި، ސިއްހީ މަރުކަޒަށް އާ އެމްބިއުލާންސެއް ހޯދުމުގެ އިތުރަށް، އެ އަތޮޅު މުލަކު ފާލަން މަރާމާތުކުރުމެވެ. އެއީ ވޭވަށުގެ މަތީ ގުރޭޑުތަކުގެ ދަރިވަރުން ތައުލީމު ހާސިިލުކުރުމަށް މުލަކު ސްކޫލަށް ފެރީގައި ދަތުރުކުރާއިރު، އެރަށު ފާލަން ހަލާކުވެފައި އޮތުމުގެ ސަބަބުން ބައެއް ހާދިސާތައް ހިނގަމުން ދާތީ ކަމަށް ކައުންސިލުން ބުނެ އެވެ.
ވޭވަށު ކައުންސިލުން ފާހަގަކުރި ކަންތައްތައް ހައްލުކޮށްދިނުމަށް ސަރުކާރުގެ ކަމާ ގުޅުން ހުރި މުއައްސަސާތަކާއެކު ކުރިއަށް ގެންދަވާނެ ކަމުގެ ޔަގީންކަން ރައީސް ވަނީ ދެއްވާފަ އެވެ.
މ. އަތޮޅަށް ކުރައްވާ ރަސްމީ ދަތުރުފުޅުގައި ވޭވަށަށް ވަޑައިގެން އެރަށު ބަނދަރު ހުޅުވާދެއްވަމުން ރައީސް ވިދާޅުވީ މިސަރުކާރުން ވަކި ދާއިރާއެއް، ވަކި އަތޮޅެއް، ވަކި ރަށެއް ވަކި ބާކީއެއް ނުކުރާނެ ކަމަށާއި ވަކި ވިސްނުމެއް ވެސް ބާކީއެއް ނުކުރާނެ ކަމަށެވެ.
އަދި ދިވެހި ރައްޔިތުން ދިރިއުޅޭ ކޮންމެ ރަށެއް، އެއީ އާބާދީ ބޮޑަސް، ކުޑަޔަސް، ރައްޔިތުން ދިރިއުޅޭ ކޮންމެ ރަށެއްގައި ގާއިމުކޮށްދޭންޖެހޭ ހިދުމަތްތައް ގާއިމުކޮށްދެއްވާނެ ކަމަށް އެމަނިކުފާނު ވިދާޅުވި އެވެ.
މ. އަތޮޅުގެ ފަސް ރަށަކަށް ކުރައްވާ މި ދަތުރުފުޅުގައި ރައީސް ވަނީ މ. ރަތްމަންދޫ، މަޑުއްވަރީ، ދިއްގަރުގެ އިތުރުން ވޭވަށަށް ވަޑައިގެންފަ އެވެ. ރައީސް މިހާރު ހުންނެވީ ދަތުރުގެ ފަހު މަންޒިލް ކަމަށްވާ މ. މުލަކުގަ އެވެ.
