އެންމެ ފަހުން ރިސޯޓު ހަދަން ހުޅުވާލި ރަށްތަކުގެ ތެރޭގައި ހިމެނޭ ތ. ކާއްޑޫ ތަރައްގީކުރަން ހުށަހެޅި ބިޑު ބާތިލުކުރި މައްސަލައިގައި ބިޑު ހުށަހެޅި ކުންފުނިން ޓޫރިޒަމް މިނިސްޓްރީއާ ދެކޮޅަށް ސިވިލް ކޯޓަށް މައްސަލައެއް ހުށަހަޅައިފި އެވެ.
މި މައްސަލަ ސިވިލް ކޯޓަށް ހުށަހެޅީ ކާއްޑޫއަށް ބިޑު ހުށަހެޅި ހަމައެކަނި ފަރާތް ކަމުގައިވާ ޖަރުމަނުގެ ކްރޭމާ ޖީއެމްބީއެޗް އިންނެވެ.
ކްރޭމާއިން ޓޫރިޒަމާ ދެކޮޅަށް ދައުވާކޮށްފައި ވަނީ އެ ކުންފުނިން ހުށަހެޅި ބިޑު ޑޮކިއުމެންޓް އެ މިނިސްޓްރީން ބާތިލުކުރީ ރަށްތައް ދޫކުރާނެ އުސޫލުތައް ބަޔާންކުރާ "އިންސްޓްރަކްޝަން ޓު ބިޑާސް" ނުވަތަ "އައިޓީބީ"ގެ މާއްދާތަކާ ހިލާފަށް ކަމަށް ބުނެ އެވެ.
މި މައްސަލައިގައި ކްރޭމާއިން ކޯޓުގައި އެދެނީ އެ ކުންފުނީގެ ބިޑު ބަލައިގަނެ، ބިޑު ޑޮކިއުމަންޓުގައި ބުނާ ޝަރުތުތަކާ އެއްގޮތަށް ލެޓާ އޮފް އެވޯޑު ދޫކުރުމަށާއި ކާއްޑޫގައި ރިސޯޓެއް ތަރައްގީކުރުމުގެ ފުރުސަތު އެ ކުންފުންޏަށް ދިނުމަށެވެ. އަދި މައްސަލަ ނިމެންދެން ކާއްޑޫ އެހެން ފަރާތަކަށް އެއްވެސް ބޭނުމެއްގައި ދިނުން މަނާކޮށް ދައުލަތުގެ ކަމާބެހޭ އިދާރާތަކުގެ މައްޗަށް ވަގުތީ އަމުރެއް ނެރެދިނުމަށެވެ.
ކްރޭމާއިން ކޯޓުގައި ބުނީ އެ ކުންފުނީގެ ބިޑަކީ އައިޓީބީގައި ބުނާ މާއްދާތަކާ އެއްގޮތަށް ސައްހަ ބިޑެއް ކަމުން ބިޑު ބާތިލުނުވާނެ ކަމަށާއި، އެ ކުންފުންޏަށް ބިޑު ކާމިޔާބުވެފައިވާ ކަމަށެވެ. މިހެންކަމުން މި ރަށް އެހެން ބަޔަކަށް ދިނުމަކީ އެ ކުންފުންޏަށް "ގާނޫނީ ގޮތުން ހިމާޔަތް ލިބެން ޖެހޭ މައުލޫއީ ހައްގެއް ނުވަތަ ގާނޫނީ މަރުކަޒެއް އޮތުމުގެ އިހުތިމާލު ފާޅުކަން ބޮޑު ގޮތެއްގައި ގާއިމްވެފައިވާ" ކަމަށް އެ ކުންފުނިން ކޯޓުގައި ބުނެފައިވެ އެވެ.
މިކަންކަމަށް ރައްދު ދެމުން ޓޫރިޒަމްގެ ފަރާތުން ވަކާލާތުކުރަމުން ބަންޑާރަ ނައިބު އޮފީހުން ކޯޓުގައި ބުނީ ބިޑު ބާތިލުކުރީ އައިޓީބީގެ 25 ވަނަ މާއްދާގެ ދަށުން މިނިސްޓްރީއަށް ލިބިދޭ ބާރުގެ ދަށުން ކަމަށެވެ. މި މާއްދާގައި ބުނަނީ މިނިސްޓްރީން ބޭނުންވެއްޖެ ނަމަ ބިޑް ޕްރޮސެސް އެއްކޮށް ނުވަތަ ވަކި ރަށަކާ ގުޅޭގޮތުން ހުށަހެޅިފައިވާ ހުރިހާ ބިޑެއް ބާތިލުކޮށް، ނުވަތަ އެ ބިޑު ބަލައިނުގަތުމުގެ ފުރިހަމަ އިހުތިޔާރު ޓޫރިޒަމަށް ލިބޭ ކަމަށެވެ.
މިހެންކަމުން ކްރޭމާއިން އޮފާ ލެޓާ ދޭން އެދުނު ނަމަވެސް، އެ ސިޓީ ދޫކުރުމާއި ނުކުރުމަކީ މިނިސްޓްރީއަށް ލިބިދީފައިވާ އިހުތިޔާރީ ބާރެއް ކަމަށާއި އެ އޮފާ ނުލިބޭހާ ހިނދަކު އެ ރަށުގެ މައްޗަށް ކުންފުނީގެ މައުޟޫއީ ހައްގެއް ނޯންނާނެ ކަމަށް ދައުލަތުން ބުންޏެވެ.
މި މައްސަލައިގެ ވަގުތީ އަމުރު ކޯޓުން ނެރުނީ ޓޫރިޒަމް މިނިސްޓްރީއާ އެއްކޮޅަށެވެ.
އެގޮތުން ދައުލަތުން ފާހަގަކުރި ވާހަކަތަކަށް ބާރު ދެމުން ވަގުތީ އަމުރުގެ މައްސަލަ ބެއްލެވި ސިވިލް ކޯޓުގެ ގާޒީ ގާޒީ ނިމާލް ޖުނެއިދުގެ ނިންމުމުގައި ވަނީ އޮފާ ލެޓާ ދޫކޮށްފައި ނުވާއިރު ކާއްޑޫގެ މައްޗަށް ކްރޭމާގެ ހައްގެއް އުފަންވެފައިވާ ކަމަށް ބުނެވިދާނެ ކަމުގައި ނުދެކޭ ކަމަށެވެ.
ކްރޭމާއިން އެދުނު ގޮތަށް ވަގުތީ އަމުރެއް ނުނެރުނު ނަމަވެސް ބިޑު ބާތިލުކުރީ އައިޓީބީއާ ހިލާފަށް ކަމާ ބުނާ މައްސަލައިގެ ޝަރީއަތް ކުރިޔަށް ދާނެ އެވެ.
