ވަކި އަތޮޅެއް، ރަށެއް އަދި ވަކި ވިސްނުމެއް މި ސަރުކާރުން ބާކީ ނުކުރާނެ ކަމަށް ރައީސް އިބްރާހީމް މުހައްމަދު ސޯލިހު މިއަދު ވިދާޅުވެއްޖެ އެވެ.
ރާއްޖޭގެ އެންމެ އާބާދީ މަދު އެއް ރަށް ކަމަށްވާ މ. ވޭވަށަށް މިއަދު ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ރައީސް ވިދާޅުވީ މެދުރާއްޖެތެރެއަކީ (ވ،މ،ފ އަދި ދ. އަތޮޅު ހިމެނޭ ސަރަހައްދަކީ) ސަރުކާރުތަކުން ބާކީކޮށްފައި އޮންނަ ސަރަހައްދެއް ކަމަށާއި އެ ސަރަހައްދަށް ވަޑައިގެންނެވުމުން އެކަން ފާހަގަކުރެއްވޭ ކަމަށެވެ. އެމަނިކުފާނު ވިދާޅުވީ ސިއްހީ ހިދުމަތް ދިނުމާއި ސްކޫލްތައް އެޅުމާއި ބަނދަރު ހެދުން ފަދަ ކަންކަމުގައި ވެސް މެދުރާއްޖެތެރެ އޮތީ ބާކީކޮށްފައި ކަމަށެވެ.
"އެހެން ނަމަވެސް މިސަރުކާރުން ވަކި ދާއިރާއެއް، ވަކި އަތޮޅެއް، ވަކި ރަށެއް ވަކި ބާކީއެއް ނުކުރާނެ. ވަކި ވިސްނުމެއް ވެސް ބާކީއެއް ނުކުރާނެ،" ރައީސް ވިދާޅުވި އެވެ.
އެމަނިކުފާނު ވިދާޅުވި ގޮތުގައި ވޭވަށުގައި ވެސް ސަރުކާރުން އަންނަނީ ތަރައްގީގެ ގިނަ މަސައްކަތްތަކެއް ކުރަމުންނެވެ. އެކަމަކު އެރަށުގެ ތަރައްގީއަށް ކުރީގެ ސަރުކާރުތަކުން ހަރަދުކުރީ ގާތްގަނޑަކަށް ދެމިލިޔަނެއްހާ ރުފިޔާ އެވެ.
"އެހެން ނަމަވެސް މިއަދު ހަތަރު އަހަރު މިސަރުކާރަށް ވެގެން ދާއިރުގައި މި ރަށަށް އެކަނި 100 މިލިޔަނަށް ވުރެ ގިނަ ރުފިޔާ އަޅުގަނޑުމެން އެބަ ހަރަދުކުރަން،" ރައީސް ވިދާޅުވި އެވެ.
އެމަނިކުފާނު ވިދާޅުވި ގޮތުގައި ވޭވަށުގެ ބަނދަރާއި ރަށު ކޯޓާއި އިންޖީނުގޭގެ މަސައްކަތް ވެސް މިހާރު ކުރިއަށް އެބަ ދެ އެވެ. ރައްޔިތުން ބޭނުންވާ ވަސީލަތްތަައް ގާއިމްކުރުމުގެ މަސައްކަތް ސަރުކާރުގެ ޕްލޭނާ އެއްގޮތަށް ކުރިއަށްދާނެ ކަމަށް ވެސް އެމަނިކުފާނު ވިދާޅުވި އެވެ.
"އަޅުގަނޑުމެން ބޭނުންވަނީ ތިޔަ ބޭފުޅުންގެ އެހީތެރިކަމާއި ތިޔަ ބޭފުޅުންގެ އެއްބާރުލުން،" އެމަނިކުފާނު ވިދާޅުވި އެވެ.
މ. އަތޮޅަށް ރައީސް ކުރައްވާ ދަތުރުގައި އިއްޔެ އެެ އަތޮޅު ދިއްގަރަށާއި ރަތްމަންދުއަށް ވެސް ވަޑައިގެންނެވި އެވެ. ވޭވަށުން އެމަނިކުފާނު ދެން ވަޑައިގަންނަވާނީ މ. އަތޮޅުގެ ވެރިރަށް މުއްޔަށެވެ.
