ޒިއުރިކް، ސްވިޒަލެންޑް (އޮގަސްޓް 26) - ފީފާ އިން އެދުނު ގޮތަށް ކަންކަން ފުރިހަމަ ކުރުމާ އެކު އިންޑިއާގެ ސަސްޕެންޝަން އުވާލައިފި އެވެ.
ސުޕްރީމް ކޯޓުން އައްޔަންކުރި ތިން މެމްބަރުންގެ ކޮމިޓީގެ ބެލުމުގެ ދަށުން މި މަހުގެ 28 ވަނަ ދުވަހު އިންޑިއާ ފުޓްބޯޅައިގެ އިންތިހާބު ބާއްވަން ތައްޔާރުވަމުން ދަނިކޮށް، ފީފާ އިން އިންޑިއާ ސަސްޕެންޑްކުރީ މި މަހު 15 ވަނަ ދުވަހު އެވެ.
އިންޑިއާ، އަށް ފީދާގެ އަދަބު ލިބުމާ އެކު ގިނަ ބަޔެއްގެ ފާޑުކިޔުންތައް އަމާޒުވާން ފެށުމާ އެކު އިންޑިއާ ސަރުކާރުގެ އެދުމާ އެއްގޮތަށް އެ ގައުމުގެ ސުޕްރީމް ކޯޓުން ވަނީ ފީފާގެ އެންގުންތަކަށް ބޯލަނބަށް ނިންމައިފަ އެވެ.
އެ ގޮތުން މީގެ ފަސް ދުވަސް ކުރިން އިންޑިއާ ސުޕްރީމް ކޯޓުން ވަނީ އިންޑިއާ ފުޓްބޯޅަ ފެޑެރޭޝަން ހިންގުމާއި އާ އިންތިހާބެއް ބޭއްވުމަށް މެއި 18 ވަނަ ދުވަހު އައްޔަންކުރި ތިން މެމްބަރުންގެ ކޮމިޓީގެ މަސައްކަތް ނިމުމަކަށް ގެނެސްފަ އެވެ. ސުޕްރީމް ކޯޓުން ކަނޑައެޅި ތިން މެމްބަރުންގެ ކޮމިޓީގައި ހިމެނުނީ ރިޓަޔަކޮށްފައިވާ ޖަޖް، އަނިލް އާރް ދޭވް، ކުރީގެ ޗީފް އިލެކްޝަން ކޮމިޝަނަރު އެސްވައި ކުރޭޝީ އަދި އިންޑިއާ ގައުމީ ފުޓްބޯޅަ ޓީމުގެ ކުރީގެ ކެޕްޓަން ބާސްކަރު ގަންގޫލީ އެވެ.
އެ ކޮމިޓީ އަތުން އިންޑިއާ ފުޓްބޯޅަ ފެޑެރޭޝަން ހިންގުން ނަގައި، އިންޑިއާ ފުޓްބޯޅަ އިދާރާ ހިންގުން، އެކްޓިން ސެކްރެޓަރީ ޖެނެރަލެއްގެ ބެލުމުގެ ދަށަށް ގެންދިޔަ އެވެ. އަދި ފީފާ އިން އަންގާ އިސްލާހުތައް ހިމަނައިގެން އިންޑިއާ ފުޓްބޯޅަ ފެޑެރޭޝަންގެ އަސާސީ ގަވާއިދު ފާސްކުރުމުގެ މަސައްކަތް ފެށިތާ މާގިނަ ދުވަހެއް ނުވެ، ފީފާގެ ސަސްޕެންޝަން މި ވަނީ އުވާލައިފަ އެވެ.
ފީފާ ކައުންސިލުން ބުނީ ސަސްޕެންޝަން އުވާލި ނަމަވެސް އާ ލީޑަޝިޕެއް އިންޑިއާ ފުޓްބޯޅަ ފެޑެރޭޝަން ހިންގުމާ ހަވާލުވަންދެން، ކަންކަން ދާ ގޮތް ފީފާ އިން މޮނިޓާ ކުރަމުންދާނެ ކަމަށެވެ.
ސަސްޕެންޝަން އުވާލިއިރު، ފީފާ އިން ނިންމާފައިވަނީ އަންނަ އޮކްޓޫބަރު މަހު އިންޑިއާގައި ބާއްވަން ނިންމާފައިވާ 17 އަހަރުން ދަށުގެ އަންހެނުންގެ ވޯލްޑް ކަޕް ކުރިން ވެސް ރޭވިފައި އޮތް ގޮތަށް އިންޑިއާގައި ކުރިއަށް ގެންދިއުމަށެެވެ.
