އިސްތަންބޫލް، ތުރުކީ (އޮގަސްޓް 26) - މި ފަހަރުގެ ޔޫރޮޕާ ލީގުގައި މެންޗެސްޓާ ޔުނައިޓެޑާއި ސްޕެއިނުގެ ރެއާލް ސޮސިއެޑާޑް އެއް ގްރޫޕެއްގައި ވާދަކުރަން ޖެހިއްޖެ އެެވެ.
ޔޫރޮޕާ ލީގުގެ ގްރޫޕް އީގައި 2017 ވަނަ އަހަރުގެ ޗެމްޕިއަން، ޔުނައިޓެޑާއި ސްޕެއިނުގެ ސޮސިއެޑާޑްގެ އިތުރުން ދެން އޮތީ ދާދި ފަހުން ޗެމްޕިއަންސް ލީގުގައި ވެސް ކުޅުނު މޮލްޑޯވާގެ ޝެރިފް ޓިރާސްޕޯލް އާއި ސައިޕްރަސްގެ އޮމޯނިއާ އެެވެ. ހަތް ފަހަރު މޮލްޑޯވާގެ ޗެމްޕިއަންކަން ހޯދާފައިވާ ޝެރިފުން ވަނީ މިދިޔަ ސީޒަނުގެ ޗެމްޕިއަންސް ލީގުގައި ރެއާލް މެޑްރިޑް ދަނޑުގައި އެ ޓީމު ބަލިކޮށްފަ އެވެ.
ޔުނައިޓެޑުން މި ފަހަރުގެ ޔޫރޮޕާ ލީގުގައި ވާދަކުރަން ޖެހުނީ މިދިޔަ ސީޒަނުގައި އެ ޓީމަށް އިނގިރޭސި ޕްރިމިއާ ލީގުގެ ގަދަ ހަތަރަކުން ޖާގަ ނުލިބޭތީ އެވެ. ޔުނައިޓެޑްގެ ތަރި ކްރިސްޓިއާނޯ ރޮނާލްޑޯ ޗެމްޕިއަންސް ލީގު ކުޅޭ ކްލަބަކަށް ބަދަލުވާން މަސައްކަތް ކުރަމުން އައި ނަމަވެސް މިހާތަނަށް އެކަން ކާމިޔާބުވާ ގޮތެއް ނުވެ، މި ވަގުތުގެ ހާލަތަށް ބަލާއިރު، އޭނާ އަށް ވަނީ ކެރިއަރުގައި ފުރަތަމަ ފަހަރަށް ޔޫރޮޕާ ލީގުގައި ކުޅެން ޖެހިފަ އެވެ.
ޔޫރޮޕާ ލީގުގެ ގްރޫޕްތައް ބެހިފައިވާ ގޮތް: މެންޗެސްޓާ ޔުނައިޓެޑާއި އާސެނަލް ލައްވާލީ ނިސްބަތުން ބަލާއިރު ފަސޭހަ ގްރޫޕަކަށް
މީގެ ތިން ސީޒަން ކުރިން ޔޫރޮޕާ ލީގުގެ ފައިނަލުގައި ކުޅުނު އާސެނަލް ލައްވާލީ ނެދަލެންޑްސްގެ ޕީއެސްވީ އައިންދޯވަން އާއި ނޯވޭގެ ބޯޑޯ/ގިލްމްޑް އަދި ސްވިޒަލެންޑްގެ އެފްސީ ޒިއުރިކްއާ އެކު ގްރޫޕް އޭގަ އެވެ. ގްރޫޕް ބީގައި އޮތީ ޔޫކްރެއިންގެ ޑިނަމޯ ކިއެވް، ފްރާންސްގެ ރެނެސް، ތުރުކީގެ ފެނަބާޗޭ އަދި ސައިޕްރަސްގެ އޭއީކޭ ލަނާކާ އެވެ.
ހޯސޭ މޮރީނިއޯގެ ކޯޗުކަމުގައި މިދިޔަ ސީޒަނުގައި ޔުއެފާ ކޮންފަރެންސް ލީގު ޗެމްޕިއަންކަން ހޯދި ރޯމާ ހިމެނެނީ ބަލްގޭރިއާގެ ލުޑޮގޮރެޓްސް ރަޒްގާޑް އާއި ސްޕެއިންގެ ރެއާލް ބެޓިސް އަދި ފިންލެންޑްގެ އެޗްޖޭކޭއާ އެކު ގްރޫޕް ސީގަ އެވެ. ގްރޫޕް ޑީގައި އޮތީ ޕޯޗުގަލްގެ ބްރާގާ، ސްވިޑެންގެ މަލްމޯ، ޖަރުމަނުގެ ޔޫނިއަން ބާލިން އަދި ބެލިޖިއަމްގެ ޔޫނިއަން ސެއިންޓް-ޖިލޮއިސީ އެެވެ.
މައުރީޒީއޯ ސާރީ ކޯޗުކޮށްދޭ ލާޒިއޯ ހިމެނެނީ ނެދަލެންޑްސްގެ ފެޔަނޫޑް، ޑެންމާކްގެ މިޓްޔައެލަންޑް އަދި އޮސްޓްރިއާގެ ސްޓޫމް ގްރާޒްއާ އެކު ގްރޫޕް އެފްގަ އެވެ. ގްރޫޕް ޖީގައި ހިމެނެނީ ގްރީސްގެ އޮލިމްޕިއާކޯސް، އަޒަރުބައިޖާންގެ ގަރަބަޖް، ޖަރުމަނުގެ ފްރެއިބާގް އަދި ފްރާންސްގެ ނޯންޓެސް އެވެ.
ގްރޫޕް އެޗްގައި ސާބިއާގެ ރެޑްސްޓާ ބެލްގްރޭޑްގެ އިތުރުން ދެން އޮތީ ފްރާންސްގެ މޮނާކޯ، ހަންގޭރީގެ ފެރެންޗްވަރޯޝް އަދި ތުރުކީގެ ޓްރަބްޒޯންސްޕޯ އެވެ.
