އެމްޓީސީސީ ނޯތު ލީގުގެ ގްރޫޕް ޑީގެ މެޗުތައް ރ. އަލިފުށީގައި އިއްޔެ ފެށިއިރު، ފުރަތަމަ މެޗުން އަލިފުށި ރެކްރިއޭޝަން ކްލަބާއި ދުވާފަރު ސްޕޯޓްސް ކްލަބް 2-2 އިން އެއްވަރުވެއްޖެ އެވެ.
އެފްއޭއެމް ނޯތު ލީގުގައި ފުރަތަމަ ތިން ގްރޫޕްގެ މެޗުތައް މިހާރު ވަނީ ނިމިފަ އެވެ. އަލިފުށީގައި ކުރިއަށްދާ ގްރޫޕް ޑީގެ މެޗުތަކަކީ ރ. އަތޮޅުގެ ރަށްތަކުގެ ޓީމުތަކުގެ މެޗުތަކެވެ. ދުވާފަރާއި އަލިފުށީގެ އިތުރުން ދެން މި ގްރޫޕްގައި އޮތީ އުނގޫފާރެވެ.
އަލިފުށީ ޓާފް ދަނޑުގައި ވިއްސާރައިގެ ތެރޭގައި އިއްޔެ ފެށި މެޗުގެ ހަތަރު ވަނަ މިނިޓްގައި ދުވާފަރުން ލީޑުނެގީ އެ ޓީމުގެ އިސްމާއިލް މުހައްމަދު ހިލޭ ޖެހުމަކުން ޖެހި ގޯލަކުންނެވެ. ކުރިން ފުރަތަމަ ޑިވިޝަނުގައި ވެލެންސިއާ އަށް ކުޅުނު އިސްމާއިލް ޖެހި ބޯޅަ އަމާޒުވީ ގޯލުގެ ކައިރީ ކަނަށެވެ. މެޗުގެ 16 ވަނަ މިނިޓްގައި އަލިފުށީ ޑިފެންޑަރުން ހެދި ގޯހެއްގެ ފައިދާނަގައި ދުވާފަރުން ލީޑުފުޅާކުރި އެވެ. ދުވާފަރުގެ މުހައްމަދު އަލީ ޖެހި ބޯޅައެއް އަލިފުށީ ކީޕަރު އަބްދުއްސަދާދު އާދަމް ގައިގައި ޖެހިފައި ނުކުތް ވަގުތު އިސްމާއިލް ވަނީ ގޯލުގެ ކަނަށް ބޯޅަ ފޮނުވާލައިފަ އެވެ.
އަހުމަދު ނިމާދު (ނިމާ)ގެ ކޯޗުކަމުގައި ކުޅޭ ދުވާފަރުން ލީޑުފުޅާކުރިތާ ދެ މިނިޓް ފަހުން އަލިފުށީގެ ކެޕްޓަން، އާދަމް އިމްރާން (އިންނަ) ވަނީ އެ ޓީމަށް ގޯލެއް ޖަހައިދީފަ އެވެ. ހާފުގެ މެދެއްހާ ހިސާބުން އިންނަ ފޮނުވާލި ހިލޭ ޖެހުން ގޯލުގެ ކަނަށް ވަންއިރު، ދުވާފަރު ކީޕަރު ހުސެއިން ނައުފަލް އަށް އެ ބޯޅަ ހުއްޓުވަން މާ ބޮޑު ކަމެއް ނުކުރެވުނެވެ.
ދެ ވަނަ ހާފްގެ ކުޅުން ފަށައިގެން އަލިފުށިން ވަރަށް ބޮޑަށް ކުރިއަށް ޖެހިގެން ގޯލެއް ޖެހޭތޯ ކުރި މަސައްކަތް ވަނީ މެޗުގެ 65 ވަނަ މިނިޓްގައި ކާމިޔާބުކޮށްފަ އެވެ. މި ގޯލު ޖެހީ އޭރިއާތެރެއަށް ހުރަސްވި ބޯޅައަކަށް ހުސްކޮށް އަރައި ރަޒާން އަލީ އެވެ.
މެޗުން މޮޅުވާން ދުވާފަރާއި އަލިފުށިން ވެސް ގިނަ މަސައްކަތްތަކެއް ކުރި ނަމަވެސް ދެ ޓީމު އެއްވަރުވެގެން މެޗު ނިމުނީ އެވެ.
ނޯތު ލީގުގެ ގްރޫޕް ޑީގެ މެޗެއް ދެން އޮންނާނީ ހުކުރު ދުވަހު ހަވީރު އެވެ. ދުވާފަރު އެ ދުވަހުގެ މެޗުގައި ނުކުންނާނީ މުހައްމަދު ޝިޔާޒް (މޯހަން)ގެ ކޯޗުކަމުގައި ކުޅޭ އުނގޫފާރާ ދެކޮޅަށެވެ.
އެމްޓީސީ ނޯތު ލީގުގެ ފުރަތަަމަ ޑިވިޝަނުން ޖާގަ ހޯދާފައިވާ ޓީމުތަކަށް ބަލާއިރު، ދިއްދޫ ބްލެކްޒީނޯ ސްޕޯޓްސް ކްލަބް، ކުޅުދުއްފުށީ ޒިގްޒެޒް ފޯ ޔޫތު ލިންކޭޖް، އެސޯސިއޭޝަން ފޯ ފޯކައިދޫ ޔޫތު ޑެވެލޮޕްމަންޓް، ޔުނިޓީ ސްޕޯޓްސް، ކެނދިކުޅުދޫ ފުޓްބޯލް ކްލަބް އަދި ޓީމު ހޮޅުދޫ އެވެ. ދެން މި ގްރޫޕަށް ވަންނާނީ ގްރޫޕް ޑީގެ އެއް ވަނަ އާއި ދެ ވަނަ އެވެ.
އެފްއޭއެމުން 2023/2024 ވަނަ އަހަރު ދިވެހި ޕްރިމިއާ ލީގު ފުޅާކުރާއިރު، ރާއްޖެ ބެހިގެންދާނީ ހަަތަރު ޒޯން ލީގަކަށެވެ. ޒޯން އެކެއް ނުވަތަ ނޯތު ޒޯން ލީގުގައި ހިމެނެނީ ހއ، ހދ، ށ، ނ، ރ އެވެ. ޒޯން ދޭއް ނޫނީ ސެންޓްރަލް ޒޯން ލީގުގައި އޮތީ ބ، ޅ، ކ، އއ، އދ، ވ، މ، ފ، ދ އެވެ. ޒޯން ތިނެއް ނޫނީ ސައުތު ޒޯން ލީގުގައި އޮތީ ތ، ލ، ގއ، ގދ، ޏ، ސ އެވެ. އަދި ޒޯން ހަތަރަކީ މިހާރު މާލޭގައި ކުރިއަށްދާ ފުރަތަމަ ޑިވިޝަން ނޫނީ މާލޭ ލީގަށެވެ. މި ލީގުގައި ހިމެނޭނީ މާލެ، ހުޅުމާލެ، ވިލިމާލޭގެ ޓީމުތަކެވެ. ކޮންމެ ޒޯނެއްގައި ވެސް އެއް ވަނަ ޑިވިޝަނާއި ދެ ވަނަ އަދި ތިން ވަނަ ޑިވިޝަން އޮންނާނެ އެވެ.
ކޮންމެ ޒޯނެއްގެ އެއް ވަނަ ޑިވިޝަންގެ ޗެމްޕިއަން ޓީމު 2023/2024 ގެ ދިވެހި ޕްރިމިއާ ލީގަށް ކޮލިފައިވާނެ އެވެ. އެއީ ފުރަތަމަ ޑިވިޝަނުގައި އޮންނަ އަށް ކްލަބްގެ އިތުރުން ކޮންމެ ޒޯނެއްގެ ފުރަތަމަ ޑިވިޝަން ޗެމްޕިއަނުންނެވެ.
