'ހައުސް އޮފް ޑްރެގަން' ޕްރިމިއާކުރި ދުުވަހު 10 މިލިއަން މީހުން އެޗްބީއޯ މެކްސް އިން ފުރަތަމަ އެޕިސޯޑް ބަލާފައިވާކަމަށް އެ ސްޓްރީމިން ސާވިސް އިން ބުނެފި އެވެ. މިއީ އެޗްބީއޯގެ ތާރީހުގައި ވެސް، އާ ސީރީޒެއްގެ ޕްރިމިއާ ދުވަހު މިހާ ބޮޑު އޯޑިއަންސެއް ލިބުނު ފަހަރެވެ - ސީރީޒް ދައްކަން ފެށީ އާދީއްތަ ދުވަހުގެ ރެއެވެ.
ސްޕޮއިލާ އެލާޓް!
ހައުސް އޮފް ޑްރެގަން އަކީ، އެޗްބީއޯ އިން މީގެ ކުރިން ގެނެސްދިން 'ގޭމް އޮފް ތްރޯންސް' ގެ ޕްރީކުއެލް ސީރީޒް އެކެވެ. ފުރަތަމަ އެޕިސޯޑުން ފެންނަނީ، ގޭމް އޮފް ތުރޯންސް ގައި ހިނގާފައިވާ ކަންކަމުގެ 200 އަހަރު ކުރީގެ މާޒީގެ މުހިއްމު ހާދިސާތަކެކެވެ. ދުނިޔޭގައި ވެސް ބޮޑު މަގުބޫލުކަމެއް ހޯދި ގޭމް އޮފް ތްރޯންސް ނިމި މި ސީރީޒްގެ ވާހަކަ އެޗްބީއޯ އިން އާންމުކުރުމާއެކު ވެސް ބޮޑު ތަރުހީބެއް ލިބުނެވެ.
ޖޯޖް އާރްއާރް މާޓިންގެ ހިޔާލީ ވާހަކަ 'ފަޔާ އެންޑް ބްލަޑް' ގެ މައްޗަށް ބިނާކޮށްފައިވާ މި ސީރީޒްގައި ދައްކައިދެނީ 'ހައުސް އޮފް ޓާގޭރިއަން' ގެ ތެރޭގައި ތަހުތުގެ ދަހިވެތިކަމުގައި ފަށާ ސިޔާސީ ހަގުރާމަ އެކެވެ.
ތަހުތަށް ވާދަވެރިކަން ބޮޑުވެ، ވެރިކަން ކުރާ ޓާގޭރިއަން އާއިލާ ތެރޭގައި ހަސަދައިގެ ހުޅު ފަޅައިގެން ދަނީ، ސީރީޒް ފެށޭ އިރު ވެރިކަން ކުރާ ރަސްގެފާނަށް ފިރިހެން ދަރިއަކު ނުލިބުމުން އޭނާ އަށްފަހު ދެން ވެރިކަމަށް އަންނާނެ މީހަކަށް އަންހެން ދަރިފުޅު، ޕްރިންސަސް ރިނޭރާ ޓާގޭރިއަން ހަމަޖެއްސުމާ ގުޅިގެންނެވެ. ސީރީޒް ފެށޭ އިރު، ރަސްގެފާނަށް ފިރިހެން ދަރިއަކު ނެތުމުން، ތަހުތު ވާރުތަކުރާނެ ކަމަށް މީހުންނަށް ގަބޫލުކުރެވިފައި އޮތީ ރަސްގެފާނުގެ ފިރިހެން ކޮއްކޮ، އޭގަން ޓާގޭރިއަން އަށެވެ. އެކަމަކު އޭނާގެ ހުންނަ ހަރުކަށި ކަމާއި ރަހުމްކުޑަ ކަމުގެ ސަބަބުން ރަސްގެފާނުގެ އަރިސް މީހުންގެ ލަފާގެ މަތިން ތަހުތުގެ ތާރީހުގައި ފުރަތަމަ ފަހަރަށް އަންހެން، ރާނީއެއްގެ ގޮތުގައި ރިނޭރާ ހަމަޖައްސަ އެވެ.
މި ސީރީޒަށް ފުރަތަމަ ރޭ ލިބުނު ބޮޑު ކާމިޔާބީއާ އެކު ދެން ވެސް އޮތީ ވަރަށް ކާމިޔާބު ދުވަސްތަކެއް ކަމަށް ލަފާކުރެވެ އެވެ. ސީރީޒް ތަކާއި މޫވީސް ރޭޓްކުރާ ރޮޓެން ޓޮމާޓޯ ވެބްސައިޓުގައި 76 ޕަސެންޓް މީހުން ދީފައިވަނީ ވެސް ޕޮޒިޓިވް ރިވިއުސް އެވެ.
